8
Unsausawit lapalaa ina xuxubu uul
1 Muina senaara gita ta papaare taman abala: gita ie xida unsausawit lapalaa, iwaa Iesu ta xale sin lima mua ina xan muina xalkale Moroaa tade balalangit.
2 Ma xan inatalil malen xa unsausawit lapalaa sin abia Xolot Pat Buxa. Lalon abia anuenmoxo so biaa Orong ta tumaraa, a xap taamat.
3 Moroaa axilangi no unsausawit lapalaa ngali tali no tinabel ma tsutsungit. Sin abala muina, Iesu xida unsausawit lapalaa naba ie tinabel bula ngali tsutsungit.
4 Nawe nii manman tsaa tala nan balan pula, nii ba xap tsap xa unsausawit, amuina biexaa unsausawit se bala ngali tali tsutsungit amusili xan lo Moses.
5 Xadi inatalil malen no unsausawit lalon abia Xolot Pat Buxa, biaa puapua ma maliip ina sawe ta manman balalangit. Biaabi Moroaa tii ga atewaai Moses biaa tii tumaraa anuenmoxo, ma ga paare, “Una tilaamamil ngali xosaraa no maarang araraa, amusili abia ngitngit, biaa iaa tii asen sin iu, papan buk.”
6 Oro inatalil Iesu tii adi, a suk axaau buxa ngen abia xadi tinaxaa no unsausawit, malen biaa xuxubu ta we, ia unmalina ina, ma ga suk axaau buxa ngen abia xuxubu xabaar, ma ga axoxos papan xuxubu mamainaang.
7 Nawe nanaaxuuk ina xuxubu asuk mamainaang buxa, biaa Moroaa naba xap xosaraa xa nanaalua ina xuxubu.
8 Oro Moroaa tii tatanginai no mamaet sin no inaman ma ga paare;
“Orong a paare, ‘Leng biaa naba xaalame,
biaa iaa ba ta xosaraa xa xuxubu uul
mii no inaman in Israel
ma no inaman in Juda.
9 Naba xap malen xuxubu in ti
iaa tii xosaraa mii xadi no iaaiaa
Biaa iaa tii giwaa di sin no liman di
ma iaa ga laamuangen atsuulngi di xaal Igip;
Amuina di tii xap so sin nugu xuxubu
biaabi iaa ga taaltalu sin di.’
10 Orong a paare we, ‘Balawaa xuxubu uul, biaa iaa ba ta xosaraa
mii no inaman in Israel, sin abia leng so ina
iaa ba aturungi nugu no lo lalon xadi no adodo
ma iaa ba atalaa lalon xadi no butsa.
iaa ba tsap xadi Moroaa
ma di ba tsap nugu no inaman.
11 Xa taamat naba xap asingan bula xaa matenaanua atataaen
o xa taamat, na xap paare ngali turumasen ngali atii Orong.
Amuina di araraa di ba atii iaa
xaal sin abia di ta dokdok laa pupua sin biaa di ta lot.
12 Ma iaa ba adodolii xadi no namaang morokon
ma iaa ba xap adodomi bula xadi no namaang tsaxa.’ ”
13 Biaa Moroaa ta paare taman abala “xuxubu uul,” alengi we; biaa nanaaxuuk ina xuxubu a se xabaar ma ga se xap xaka tinaxaa; ma dokdok mu naba se maraamen.