Inesaait Mamainaang
Luk
tii Atalaa
1
Inesaait mamainaang laa sin Tiopilis
1 Balawaa inaatel a laa sin iu, taamat orong Tiopilis.
Xuduxudu ina biexaal di se xonon ngali atalaa no sen maarang tii taxaa puaa labatina giem.
2 Di tii tali xadi totore abia no inaman di tii setauan lasi no maarang taman no matan di, di no untinaxaa ina totore.
3 Biaabi iaa tsaa bula, iaa se tirei usili abala no maarang araraa tii tiltsoli xaal ti, ma axaau bula ngali iaa ba atal axaautsi laa sin iu abala no maarang tii tsap.
4 Iaa xosaraa abala ngali u ba atii soina abala no maarang di tii se asingan iu taman.
Angelo asaaiti Sekaraia taman Jon Unaaxaxadaan
5 Sin xan no leng King Erot in Judaia, iexa unsausawit iesan Sekaraia ina xan matenbung Abaija, no unsausawit. Xan tubu Elisabet bula ia ina xan matenbung Aron.
6 Delu suk tutiik lalon no matan Moroaa sin amumusili xan no lo Orong araraa ma a xap xa namaang tsaxa sin delulu.
7 Oro was mu, a xap xadelu xaa tsi, amuina Elisabet a xap alalet tsi a le pupua sin delu ta se maas ma xuaala.
8 Biaa leng Sekaraia mii no uk untinaxaa di ta taktaxaa o ia ga taxaa malen unsausawit laamuaan Moroaa.
9 No unsausawit, di tii axilangi Sekaraia sin namaang ina uraura, ngali tsiga lalon Xan Anua Moroaa ngali axaii no pilogo ta tso mamainaang.
10 Sin abia leng ngali axaii no pilogo, no unlanglangaari di tsap exumule lokobel ina Xan Anua Moroaa ma di ga lo sausawit.
11 Xan angelo Orong, ga asemat sin papel lima mua ina ibe tsutsungit taman no pilogo, biaa ta tso mamainaang.
12 Biaa Sekaraia ta lasi angelo, asuk olol ma ga mataa.
13 O angelo ga paare ngali, “Nangaam mataa Sekaraia, num sausawit, Moroaa a se longmien. Num xuaala Elisabet naba taana xa tsi taamat ma u ba a tsoxo iesani taman Jon.
14 U ba suk us taman tataton amuina sin ia. Xuduxudu ina inaman di ba suk papaalam buxa sin xan tsinap,
15 amuina naba us taman Nantanua Pat biaa ta manman tsaa lalon balan xan nagaa ma naba taamat lot lalon no matan Orong ma naba xap nun waain o no mat laxen daan tangtangabaa, ma xan tino naba us taman Nantanua Pat setauan tsaa sin di ta xap mager taxaana.
16 Naba gii mulangenai xuduxudu ina inaman in Israel, xaalame sangan Orong, xadi Moroaa.
17 Ma naba laamuaan Orong, lalon nantanua ma lalon xan xoror Elaija. Ngali putsi xadi no butsa no mom ngali di ba adodo ngali xadi no tsi ma no xolout ngali adi xadi sinaae no untutiik, ma ngali taxaaturungi inaman ngali xan tsinap Orong.”
18 Sekaraia atsuraa angelo, “Naba sen tsap we abala maarang? Iaa se maas ma nugu tubu bula a se xuaala.”
19 Angelo a xisi, “Iaa Gebriel, iaa tiltil lalon no matan Moroaa, ga tulen iaa ngali le asaaiti iu taman balawaa inesaait mamainaang.
20 Lasi! U ba ngusbong pupua sin leng balawaa maarang naba ta tsap amuina u xap taltaalnge sin nugu no totore. Balawaa maarang naba tsap, sin leng Moroaa tsaa ta se xubatsi.”
21 No inaman di se maara liliis ma di ga adodo xuduxudu amuina Sekaraia a se laa paate buxa tala nan Xan Anua Moroaa.
22 Sekaraia a es tsuul o ga xap pupua ngali papaare. Di ga se atixi malen a lasi xa binalang nanen lalon Xan Anua Moroaa amuina ta xosaraa mu no axixila laa sin di ma ga xap papaare.
23 Mulina xan tinaxaa Sekaraia a se xap, o ga se mula laa lokobel.
24 Mulina abia, xan xuaala, Elisabet, ga se tiaan ma ga manman mu naanua no uleng alima.
25 Elisabet ga paare, “Orong tii xosaraa abala maarang ngali iaa sin abala no leng, ga saali nugu minangel sin sa, no inaman di tii we, iaa xap alalet tsi.”
Angelo asaait taman xan tsinap Iesu
26 Xan no uleng Elisabet a se paasxuk o Moroaa ga tulen angelo Gebriel laa Nasaret, lalon xariin xolot Galili.
27 A laa tsap sangan iexa aina uul ta xap mager matul mii xa taamat, iesan Maria. Di tii axanei ia ngali maxis sin iexa taamat iesan Josep ina xan matenbung Dewit.
28 Angelo a laa, ga paare, “Lasiaat axaau Maria, Orong a saansili buxaai iu ma ga tilaamamil buxa susum.”
29 Maria asuk adodo xuduxudu sin abia no totore angelo ta asaait taman ga paare, “Ngalisa so ta le tali abala no inesaait weaatalaa.”
30 Angelo a paare sin Maria, “Nangaam mataa, Maria, Moroaa ataton sin iu.
31 Ma lasi, u ba tiaan ma u ba taana xa tsi, ma u ba a tsoxo iesani, Iesu.
32 Naba ies lot buxa ma di ba putsangi, Xan Tsi Moroaa ta suk lapalaa buxa. Orong Moroaa naba tali xan muina xalkale Dewit sin,
33 ma naba til laamuangen xan no inaman Jakop laaliu. Xan Maradaan naba xap xa xapkap ina.”
34 Maria atsuraa angelo, “Naba tsap sen parawe abala, amuina iaa xap mager matul mii xa taamat?”
35 Angelo ga xisi, “Nantanua Pat naba tsuul xaalame papan iu, ma xan xoror Moroaa. Iwaa lapalaa suk se naba le ngaati iu. Iwaa tsi u ba ta taxaali naba tsap Tsi Pat ma di ba putsangi Xan Tsi Moroaa.
36 Ma Lasi, num mixap, Elisabet, a se xuaala o talaawaa a se tiaan. No inaman di tii we naba xap alalet tsi o talaawaa a se paasxuk xan no uleng taman bal tsi.
37 Amuina a xap xawas we Moroaa a xap pupua ngali xosaraa!”
38 Maria a xisi, “Iaa xan untutule Orong. Axaau biaa maarang u ta paatina na tsap susugu!” Mil Angelo ga se papaalii Maria.
Maria a laa tatanginai Elisabet
39 Sin abia xolot ina leng Maria ataxaaturung ma ga isagaa laa lapalaa lalon biexa inaman laba papan no buk Judaia.
40 A es tsiga lalon xan anua Sekaraia ma ga paare sin Elisabet, “Lasiaat axaau.”
41 Biaa Elisabet ta alongmen Maria ta, “Lasiaat axaau ngali ia,” iwaa tsi lalon balan asuk giis. Ma Nantanua Pat asuk tsigaii xan tino Elisabet.
42 Elisabet asuk paare lot weaatala, “Moroaa a se atubudaani iu buxa labatina no aina ma a se atubudaani bula iwaa tsi u ba ta taxaane.
43 O ngalisa iu tii saansili iaa, biaa ngali xan nagaa nugu Orong naba xaalame sangan iaa?
44 Biaa iaa ta alongmen inaam ilawaa tsi nan balaaga asuk giis taman taton.
45 Atubudaani iwaa xa ta taltaalnge ngali abia maarang Orong ta we naba tsap sin.”
Xan ananaan Maria
46 Maria a paare we,
“Nantanuaaga aminaalami Orong.
47 Nantanuaaga a paalam sin Moroaa nugu untino,
48 amuina adodo buxa,
ngali aina untutule gomsaa mu.
Talaawaa no utmilmil araraa di ba putsangi iaa tubudaan.
49 Ngali iwaa Belaba a xosaraa abala maarang lot ngali iaa–
Iesan a pat.
50 Xan biirbirum naba suk laa sin abia di, di ta mataatina ma manglen ia.
Xan titii bula naba laa sin xadi no tsi ma naba laa bula sin xadi no utmilmil.
51 A se atsapngen no xariin maarang taman no liman.
A se saali no namaang ina paraak lalon no balan di ma di ga laa lalon xadi no adodo.
52 Moroaa atsiklii no lalaamua lot sin xadi no Maradaan,
Oro alet alabati abia di, di ta mangmagus.
53 Atabali abia di, di ta itol, taman no maarang axaau,
Oro a tulen lii no inaman untang gomsaa.
54 Moroaa a se tiltsomi xan no untutule in Israel,
ngali adodomi xan biirbirum,
55 Sin Abaram, ma xan no utmilmil laaliu,
malen sen maarang ta asaaiti xida no mom taman.”
56 Maria a manman mii Elisabet pupua no uleng a tuul o mil ga mula laa tatan.
Elisabet a taana Jon
57 Leng se ngali Elisabet naba se taxaana xan madalak o ga taana tsi taamat.
58 No matenaanua atataaen mii xan no mixap, di lasi xan xariin biirbirum Orong sin ma di ga suk taton mii ia.
59 Ilawaa tsi dokdok xan no leng a se paasaatuul o di ga le axasaui. Di wena a tsoxo iesani taman Sekaraia amuina iesan xan mom.
60 Oro xan nagaa ga paare, “A xap! Gita ba putsangi iesan ilaa Jon.”
61 Di ga paare ngali ia, “A xap xa labatina num matenbung iesan na malen abia ies.”
62 Di laa ma xosaraa no axixila laa sin xan mom, ngali saa iesan xan tsi.
63 O ga atsura ngali xawas ngali atatal papan, ga atatal weaatala, “Iesan ilaa Jon.” Biaa di araraa, di ga suk olol.
64 Tiwaa tsaa ngutsina asuk tsalel ma ga sebula papaare o ga suk paʼii Moroaa.
65 No matenaanua atataaen, di lasi abala no maarang ta tsap, di ga mataa ma inesaait ina ga suk sol isagaa laa lalon no xobel lapalaa papan no buk Judaia.
66 Biaa di ta alongmen abala, di suk adodo xuduxudu lalon xadi no butsa ma di ga atsura weaatala, “Ilawaa tsi naba tsap sen mat laxen taamat mil?” Amuina di lasi liman Orong ta manman mii ia.
Xan ananaan Sekaraia
67 Nantanua Pat atsigaii xan mom Jon, ilaa Sekaraia, ma tii ga tali xan totore propet:
68 “Na ga paʼii Orong, iwaa xida Moroaa no Israel
amuina a se xaalame ngali tiltsomi gita ma gii mulangenai xan no inaman.
69 Moroaa a se tali xariin taamat watwat sin gita, iwaa naba ta tsap xida untino,
ia ina xan matenbung Dewit, iwaa xan untutule Moroaa.
70 Xan no propet pat Moroaa di tii se asaait taman abala no maarang setauan tsaa
71 Moroaa naba tali ilawaa taamat watwat ngali aleiwaa gita sin xida no matenkorot,
ma sin xadi watwat abia di, di ta ngutsulen gita.
72 Moroaa tii se asen xan biirbirum laa sin xida no iaaiaa
ma ga adodomi ta xubatsi xan totore pat.
73 Moroaa ga puris ngali xida mom Abaram:
74 Ngali gii tsaxali gita sin xadi watwat xida no matenkorot,
ma ngali gita ba pupua ngali taxaa ngali ia ma gita na xap mataa,
75 Gita na tsap tutiik ma pat lalon no matan Moroaa sin xida no leng se araraa.
76 Ma iu, nugu tsi, mil di ba putsangi iu xan propet Moroaa Iwaa in Lapalaa suk se.
Ngali u ba laamua setauan, ngali taxaaturungi sal ngali xan tsinap Orong.
77 Ngali u ba taal sinaae sin xan no inaman biaa sinaae ina aleiwaai no inaman,
ngali adodolii xadi no mat namaang tsaxa.
78 Amuina ngali xan biirbirum xida Moroaa,
biaa pal ta xaalame lapalaa atsilangi gita, axaal balalangit
79 Ma naa tsila papan biaa di, di ta manman lalon lodo,
ma sin abia di bula sin maliip ina minet.
Ngali asen sal sin no xaden gita lalon sal ina malina.”
80 Ma iwaa tsi a se lot ma ga watwat sin nantanuaan. A manman nan xobel biil, til sin leng ta asemat nan no matan no inaman Israel.