3
Jon unaaxaxadaan a taxaaturungi sal
(Metiu 3:1-12; Mak 1:1-8; Jon 1:19-28)
1 Sin sangaul ma ga laa lima ina miet ina xan Maradaan Sisa Taiberias, iwaa xariin lalaamua ina gawaman Rom, Pontius Pailat tii tilaamamil sin Judaia, Erot Antipaas tii tilaamamil sin Galili, o xan taamat, ilaa Pilip, tii tilaamamil sin Ituria ma Terakonaitas, ma Lisanias tii tilaamamil sin Abilin.
2 Anas ma Kaiapas, delu tii no unsausawit lapalaa.
Sin abia no leng, xan totore Moroaa a xaalame sin Jon, xan tsi Sekaraia, ta manman lalon abia xobel biil.
3 Jon tii laa lalon no daan xolot ina Jodan ma ga baais taman, axaxadaan ngali puxisbal, ma ngali adodolii no namaang tsaxa.
4 Malen Inaatel Pat, Aisaia iwaa propet ta papatina:
“Inan xa a ililei lalon xobel biil ga we,
‘Taxaaturungi xan sal Orong,
xosaraa xan sal na tutiik!
5 Tuali no maxaaba araraa,
ma atutiki no buk na laa lapula.
No sal xoriik na tutiik
ma amadipi no xolot ta bukbuken.
6 Ma no inaman araraa, di ba lasi xan watwat Moroaa ta aleiwaai di.’ ”
7 Jon ga paare ngali abia malep di ta xaalame ngali adi axaxadaan sin ia, ga paare, “Gim xan no tsi, no tsitsi tsaxa! Saa atewaai gim ngali sol sin xan minagaa Moroaa, biaa naba ta laa xaalame?
8 Gim na waalii xaa waawaan axaau ngali asen we, gim se puxisbal. Ma gim nangaam adodo we, gim pupua ngali paare sin gim tsaa we, Abaram ia nagiem mom. Iaa asaaiti gim, xaal sin abala no xaat Moroaa a pupua ngali atsapngen xakaa tsi Abaram.
9 Xula a se taxaaturung muina no ie. Ma nawe no sen ie araraa di xap waalii xaa waawaan axaau, naba tal lii ma na lii laangen lalon ie.”
10 No inaman, di atsuraa, “O giem ba xosaraa sa?”
11 Jon ga xisi di, “Nawe xa ia xan no uga disdis ta lua, na tali xa sin xa taamat ta xap xaka, o nawe xa a ie luxaal na xosaraa weaatia bula.”
12 No unaalalet taakis, di xaalame ngali Jon naba axadaani di. Di le atsuraa Jon, “Unaasasing, giem ba xosaraa sa?”
13 Jon a xisi, “Gim nangaam alet buxaai xuxute ngen papan abia gim ta saansili.”
14 Mil biexaa unmakmaxil di atsuraa Jon, “Giem ba xosaraa sa?”
Jon a xisi di, ga we, “Gim nangaam ningi atuaai xaa xuxute sin no inaman ma nangaam daraxe tali xaa totore sin di ma gim na taton taman nagim no iliil.”
15 No inaman di tii lo liliis ma di ga adodo lalon xadi no butsa we, manaa Jon, ia mu Karisito.
16 Jon ga xisi di se araraa ga we, “Iaa axadaani gim taman daan, Oro iwaa naba ta xaalame mil sin iaa, xan xoror a watwat buxa ngen iaa. Iaa xap muun mamainaang buxa ngali lubati xan no bubut. Ia naba axadaani gim taman Nantanua Pat ma taman ie.
17 Xan pok biaa se lalon no liman, ngali exasenlii no pinpin sin no wit ngali rii axaautsi xolot ina saali no pinpin ina wit, ma axumuli no wit laa lalon anuen atuturung, oro na axaii no pinpin ina wit lalon abia ie ta xap pupua ngali met.”
18 Jon a tali inanaa watwat sin no inaman ma ga baais taman inesaait mamainaang laa sin di.
19 Oro biaa Jon ta imii King Erot papan no matan sin ta xosaraa no daan mat namaang tsaxa ma ta giwaa bula xan tubu turamasen, ilaa Erodias.
20 O Erot a sebula xosaraa xariin namaang tsaxa papan abia xan no namaang tsaxa, ga tali Jon nan anua lodo.
Jon axadaani Iesu
(Metiu 3:13-17; Mak 1:9-11)
21 Jon a lo axaxadaani no inaman araraa, o ga axadaani Iesu bula. O biaa Iesu tii ningning, balalangit asuk tsalel,
22 ma Nantanua Pat ga soriri xaalame papan malen buna. O inan xa axaal balalangit, ga we, “Iu nugu tsi, iwaa iaa tii suk titii buxaai ma iaa taton sin iu.”
No iesan no inaman sin xan matenbung Iesu
(Metiu 1:1-17)
23 Xan no miet Iesu a se no sangaul a tuul o ga atiltsoli xan inatalil. No inaman di adodo we Iesu ia xan tsi Josep,
Josep ia xan tsi Eli,
24 Eli ia xan tsi Matat,
Matat ia xan tsi Liwai,
Liwai ia xan tsi Meltsi,
Meltsi ia xan tsi Janai,
Janai ia xan tsi Josep,
25 Josep ia xan tsi Matatias,
Matatias ia xan tsi Emos,
Emos ia xan tsi Naum,
Naum ia xan tsi Esli,
Esli ia xan tsi Nagai,
26 Nagai ia xan tsi Maat,
Maat ia xan tsi Matatias,
Matatias ia xan tsi Semein,
Semein ia xan tsi Josek,
Josek ia xan tsi Joda,
27 Joda ia xan tsi Joanan,
Joanan ia xan tsi Resa,
Resa ia xan tsi Serubabel,
Serubabel ia xan tsi Salatiel,
Salatiel ia xan tsi Neri,
28 Neri ia xan tsi Meltsi,
Meltsi ia xan tsi Adi,
Adi ia xan tsi Kosam,
Kosam ia xan tsi Elamadam,
Elamadam ia xan tsi Er,
29 Er ia xan tsi Josua,
Josua ia xan tsi Eliʼesa,
Eliʼesa ia xan tsi Jorim,
Jorim ia xan tsi Matat,
Matat ia xan tsi Liwai,
30 Liwai ia xan tsi Simeon,
Simeon ia xan tsi Juda,
Juda ia xan tsi Josep,
Josep ia xan tsi Jonam,
Jonam ia xan tsi Eliakim,
31 Eliakim ia xan tsi Melea,
Melea ia xan tsi Mena,
Mena ia xan tsi Matata,
Matata ia xan tsi Naitan,
Naitan ia xan tsi Dewit,
32 Dewit ia xan tsi Jesi,
Jesi ia xan tsi Obet,
Obet ia xan tsi Boas,
Boas ia xan tsi Salmon,
Salmon ia xan tsi Nason,
33 Nason ia xan tsi Aminadap,
Aminadap ia xan tsi Admin,
Admin ia xan tsi Aram,
Aram ia xan tsi Esron,
Esron ia xan tsi Peres,
Peres ia xan tsi Juda,
34 Juda ia xan tsi Jakop,
Jakop ia xan tsi Aisak,
Aisak ia xan tsi Abaram,
Abaram ia xan tsi Tera,
Tera ia xan tsi Naor,
35 Naor ia xan tsi Seruk,
Seruk ia xan tsi Reu,
Reu ia xan tsi Pelek,
Pelek ia xan tsi Eber,
Eber ia xan tsi Sala,
36 Sala ia xan tsi Kaanan,
Kaanan ia xan tsi Apaxad,
Apaxad ia xan tsi Siem,
Siem ia xan tsi Noa,
Noa ia xan tsi Lamek,
37 Lamek ia xan tsi Matusela,
Matusela ia xan tsi Enok,
Enok ia xan tsi Jared,
Jared ia xan tsi Maxalalel,
Maxalalel ia xan tsi Kaanan,
38 Kaanan ia xan tsi Enos,
Enos ia xan tsi Set,
Set ia xan tsi Adam,
Adam ia xan tsi Moroaa.