18
Iwaa ta lot buxa lalon Maradaan ina Balalangit
(Mak 9:33-37; Luk 9:46-48)
1 Sin abia leng no tsi asasing di xaalame sangan Iesu ma di ga atsura, “Saa lot buxa lalon abia Maradaan in Balalangit?”
2 A ilei iexa tsi dokdok xaalame sangan ma ga le atilngi labatina di.
3 Ma ga paare, “Iaa asaaiti gim taman so, nawe gim xap putsi ma tsap malen no tsi dokdok, gim ba xap tsiga lalon abia Maradaan ina balalangit.
4 Biaabi, saa ia ta adokdoki ia tsaa malen aila tsi dokdok, a suk lot buxa lalon abia Maradaan ina balalangit.
5 Ma saa ia ta suei atatoni xa tsi dokdok sin iesaaga, a suei atatoni iaa.
6 “Oro nawe xa a xosaraa xa ina abala no tsi dokdok, di ta taltaalnge sin iaa, ngali litke lalon namaang tsaxa, naba axaau buxa ngali di na ataxiwaa xa xaat ngali amimii grein ulti inan ngali aliaani lalaman.
7 Xaraxin xirabas naba tsap lalon xolkolmoxo amuina di xosaraa no inaman, di ga xol sin namaang tsaxa. Asuk so balawaa no namaang tsaxa naba tsap, oro xaraxin xirabas naba tsap sin xa ta atsapngen abala no namaang tsaxa!
8 Nawe limaam o xaim a xosaraa iu ngali litke sin namaang tsaxa, u na xitiplii ma u na lii laa. Naba axaau buxa ngali tino taman ta xap xa limaam o xa xaim ngen no limaam ta lua mii no xaim ta lua o di na lii iu lalon ie ta xap metmet.
9 Ma nawe mataam a xosaraa iu ngali litke sin namaang tsaxa, luapelii ma u na lii laa. Naba suk axaau buxa ngali u na tino taman mat ta xuuk, ngen abia no mat ta lua ma di na lii iu nan ie ina Edes.
Totore puapua ina sipsip ta xaapina
10 “Gim nangaam nen amagurusiki xa ina abala no tsi dokdok. Amuina iaa asaaiti gim we, xadi no angelo nan balalangit, di tigiri laklasi no matan nugu Mom nan balalangit.
12 “Nagim adodo asen we? Nawe xa taamat a ie sangsangaul ina no sipsip o iexa ina abia no sipsip ga es tangtangabaa, a pupua ngali naba suk papaalii abia no 99 sipsip ma na suk laa tsalei aiwaa sipsip ta es tangtangabaa?
13 O nawe naba tatanginai, aso maase iaa asaaiti gim, naba suk taton buxa ngali aia sipsip ta xuuk ngen abia 99 ina sipsip, di ta xap es tangtangabaa.
14 Sin abia uk namaang mu nagim Mom in balalangit, a xap siir ngali xa ina abala no tsi dokdok, di na xaapina.
Namaang tsaxa sin xumul ina no untaltaalnge
15 “Nawe num taamat a xosaraa namaang tsaxa sin iu, u na tulis asen xan namaang tsaxa, lolobet mu ina gululu. Nawe alongmen iu, u se gii mulangenai ia.
16 Oro nawe naba xap lolong, giwaa xa na xuuk o na lua mii iu ngali biaa totore naba leng taman alua o a tuul ina tiltsoxoti.
17 Oro nawe a xap lolong tsaa, u na asaaiti xan matenaanua Moroaa; ma nawe a xap lolong bula sin abia xumul, gim na xosaraa ia malen xa Gentail o xa unaalalet taakis.
18 “Iaa asaaiti gim taman so, sen maarang gim ta xubatsi tala nan balan pula, ia naba xubatsi bula tade balalangit, O sen maarang gim ta lubati tala lalon balan pula, naba lubati bula balalangit.
19 “Asuk so, Iaa sebula asaaiti gim, nawe lo taamat lalon xolkolmoxo delu ukbal taman xawas delu ta atsura ngali, naba xosor puaa ngali delulu sin nugu Mom balalangit.
20 Amuina nawe alua o a tuul ina taamat di tsap etudim sin iesaaga, iaa manman mii di.”
Totore puapua ina untutule tsaxa
21 Mil Pita ga xaalame sangan Iesu ma ga atsuraa, “Orong, aisa iaa ba ta adodolii no namaang tsaxa nugu taamat ta xosaraa sin iaa? Pupua sin apaasaalua ina xoxot iaa ba ta adodolii?”
22 Iesu a xisi, “Iaa asaaiti gim, a xap paasaalua ina xoxot, oro no sangaul a paasaalua ma ga laa paasaalua ina xoxot.
23 “Biaabi, Maradaan ina balalangit a malen king ta we na atutiki xadi no xiba xan no untutule.
24 Ga se atiltsoxoli ngali atutiki no xiba o iexa taamat ta ie xiba sin ta pupua malen sangaul ina tausen xiis goul, di tii ga giwaa ia laa sin xan manmanel.
25 Amuina sin ta xap pupua ngali uul xisi abia xan xiba, iwaa manmanel asuk tali papaare watwat ngali iwaa taamat ma xan tubu ma xadelulu no tsi ma xan no maarang araraa di na sune taman no, ngali uul xisi xan xiba.
26 “Iwaa untutule a sage putput laamuaan ia ma ga ningi awatwati. ‘Ben liliis adamis ngali iaa ba uul xisi araraai abia no maarang araraa.’
27 Iwaa xan manmanel aia untutule asuk titii buxaai ia ma ga suk adodolii araraai abia xan xiba ma ga papaalii ia ga laa.
28 “Oro biaa iwaa untutule ta tsuul laa lokobel atatanginai iexa xan uk untutule bula ta ie xiba sin, ta pupua malen sangsangaul ina xuxute. A logotsi ia ma ga atiltsoli ngali partsi inan. Ga asaaiti awatwati, ‘Uul xisi num xiba sin iaa.’
29 “Mil xan uk untutule ga sage putput lapula ma ga suk ningi awatwati, ‘U na ben man adamis liliisi iaa ngali iaa ba uul xisi nugu xiba.’
30 “Oro a xap lolong. A laa ma ga atsigili aia untutule nan anuen lodo, til sin naba ta uul xisi xan xiba
31 Biaa biexaa uk untutule, di ta lasi sawe ta tsap, di suk magaa ma di ga laa asaaiti manmanel taman no sen maarang ta tsap.
32 “Mil manmanel ga ilei atsigili aia untutule ma ga asaaiti, iu morokon ina untutule, iaa adodolii araraai num no xiba, amuina u ta ningi awatwati iaa.
33 Ngalisa u ta xap ie biirbirum sin num uk untutule malen iaa ta ie biirbirum sin iu?
34 Sin xan minagaa xan manmanel asuk tali ia laa nan anua lodo ma di ga tali xariin sosong sin, laa pupua naba ta uul xisi xan xiba.
35 “Sin abala namaang nugu Mom balalangit naba xosaraa wengenai gim xuxuuk weaatia, nawe gim xap adodolii so xadi no namaang tsaxa nagim no taamat xaal lalon nagim no butsa.”