3
Jon Unaaxaxadaan a taxaaturungi sal
(Mak 1:1-8; Luk 3:1-18; Jon 1:19-28)
1 Sin abia no leng Jon Unaaxaxadaan a xaalame ngali baais lalon xolot biil ina Judaia,
2 ma ga papaare, “Puxisbal amuina Maradaan in Balalangit a se atat.”
3 Ilawaa mu aila propet Aisaia ta papaare taman,
“Inan xa a ililei lalon xobel biil,
‘Taxaaturungi xan sal Orong,
xosaraa xan sal na tutiik.’ ”
4 Xan no uga Jon, di xosaraa taman no ulina kemal, ma xan biaal ulti balan di xosaraa taman xilkil ina matauteng. Xan luxaal no tsik ma daan ina matsii in lauteng.
5 No inaman in Jerusalem ma no xolot araraa Judaia ma no prowins araraa in Jodan, di ga tsuul laa sangan ia.
6 Ma di ga paare leng taman xadi no namaang tsaxa ma ga axadaani di lalon daansel Jodan.
7 Oro biaa ta lasi no daan Paarasi ma no Saadusi di ta xaalame sin abia xolot ta lo axaxadaan tia, ga paare ngali di, “Gim xan no tsi, no tsitsi tsaxa! Saa atewaai gim ngali sol sin xan minagaa Moroaa, biaa naba ta laa xaalame?
8 Gim na waalii xaa waawaan axaau ngali asen we, gim se puxisbal.
9 Ma gim nangaam adodo we, gim pupua ngali paare sin gim tsaa, Abaram ia nagiem mom. Iaa asaaiti gim, xaal sin abala no xaat Moroaa a pupua ngali atsapngen xakaa tsi Abaram.
10 Xula a se taxaaturung muina no ie. Ma nawe no sen ie araraa di xap waalii xaa waawaan axaau, naba tal lii ma naa lii laangen lalon ie.
11 “Iaa axadaani gim taman daan ngali puxisbal, oro mulina iaa iwaa xa, awatwat buxa ngen iaa. Iaa xap pupua ngali atsaxei xan no bubut. Naba axadaani gim taman Nantanua Pat, ma taman ie.
12 Xan pok biaa se papan no liman, ngali exasenlii no pinpin ina wit ma naba rii axaautsi xolot ina saali no pinpin ina wit, ma axumuli abia no wit laa lalon anuen atuturung ma na axaii abia no pinpin lalon abia ie, ta xap pupua ngali met.”
Jon axadaani Iesu
(Mak 1:9-11; Luk 3:21-22)
13 Mil Iesu ga es xaal Galili ga laa lalon daansel Jodan ngalibi Jon naba axadaani.
14 Oro Jon a xonon ngali tilbanti ia ga we, “A pupua ngali u ba axadaani iaa, o ngalisa u ga xaalame sangaaga?”
15 Iesu ga xisi, “Papaalii na se weaatia atalaa; A axaau ngali gita na xosaraa abala, ngali taxaa puaa no namaang ta tutiik araraa.” Ma Jon ga sirawaa.
16 Biaa Jon tii axadaani araraai Iesu, a es tsuul lalon daan, sin abia xolot ina leng, balalangit asuk tsalel, ma ga lasi Nantanuan Moroaa tii soriri xaal lapalaa malen buna ma tii ga tsila papan ia.
17 Ma ine xaal balalangit ga paare, “Ilawaa nugu Tsi, iwaa iaa ta titii buxaai; nugu tubudaan a manman papan ia.”