6
Tinabel laa sin no muun
1 “Gim na tilaamamil, gim na xap xosaraa nagim no namaang tutiik lalon no matan no inaman ngali di ba lasi. Nawe gim ba xosaraa weaatia, naba xap nagim xa xixiis sin nagim Mom balalangit.
2 “Biaa u ta tabali no muun, u nangaam xuina tail ngali asaait leng taman malen no xalam lua di ta xaa xosaraa lalon anua sausawit, ma lalon no sal, ngali no inaman di ba manglen di. Iaa asaaiti gim taman so, di se alet araraai xadi no xixiis.
3 Oro biaa u ta tabali no muun, u nangaam poroklii num lima xaiaar na atii semaarang num lima mua ta xosaraa,
4 ngali biaa num no tinabel naba xuxii no, ngalibi num Mom iwaa ta xaa lasi semaarang u ta xosor axuina naba tabiel xisi sin iu.
Sausawit
(Luk 11:2-4)
5 “Ma biaa gim ta sausawit, gim nangaam malen no xalam lua, amuina di saan ngali til sausawit lalon no anua sausawit ma lalon no tsigur ina sal ngali no inaman di ba lasi di. Iaa asaaiti gim taman so, di se adi araraai xadi no xixiis.
6 Oro biaa u ta saan ngali sausawit, u na tsiga laa naanua, tsaxali num mat ma u na sawit laa sin num Mom, iwaa u ta xap pupua ngali lasi. Mil num Mom iwaa ta lasi sawe u ta xaa xosor axuina naba tali xa xixiis sin iu,
7 ma biaa gim ta sausawit gim nangaam ngurnguruk malen no muun taltaalnge; amuina di adodo we di ba longmien di taman xadi no papaare ta xuduxudu.
8 Gim nangaam malen di, amuina nagim Mom a se atii tsaa semaarang gim ta saansilii sin, sin gim ta xap mager atsuraa.
9 “Balawaa se gim ba ta sawit sen we,
“ ‘Nagiem Mom in balalangit,
iesaam a pat,
10 num maradaan na xaalame,
num sirsiir giem ba xosor puaa
lalon balan pula malen tia balalangit,
11 U na tabali giem taman tsoki sin no leng xuxuuk.
12 Adodolii nagiem no namaang tsaxa,
malen giem bula giem ta se adodolii xadi no namaang tsaxa biexaal,
13 nangaam laamuangen giem lalon xonkonon,
oro gii mulangen giem sin aia morokon.’
14 “Amuina nawe gim adodolii xadi no namaang tsaxa no inaman di ta xosaraa sin gim, nagim Mom in balalangit naba adodolii nagim no namaang tsaxa bula.
15 Oro nawe gim xap adodolii xadi no namaang tsaxa no inaman, nagim Mom naba xap adodolii nagim no namaang tsaxa.
Namaang ina el
16 “Biaa gim ta el, gim nangaam mat birawis malen no xalam lua di ta xaa xosaraa, di xaa mata xixiin ngali asen sin no inaman malen di el. Iaa asaaiti gim taman so, di se adi araraai xadi no xixiis.
17 Oro biaa u ta el, u na patsaa xuaam taman wel ma u na silii no mataam,
18 sinsa no inaman di ba xap nen xilalaa malen u el, oro num Mom mu iwaa u ta xap lasi, ma num Mom iwaa ta xaa lasi no maarang u ta xosor axuina no, naba tali num xixiis.
No mat maarang axaau balalangit
(Luk 12:33-36)
19 “Gim nangaam axumuli nagim xaa maarang axaau lalon abala balan pula, biaa no ibaiba ma ros naba ta xosor atsoti, ma biaa no unpulapula di ba ta baxi anua ngali pulaxi no.
20 Oro, gim na axumuli nagim xaa maarang axaau tsaa tade balalangit. No ibaiba ma ros naba xap atsoti, ma no unpulapula di ba xap baxi anua ma di na pulaxi.
21 Amuina sen xolot u aturungi num no mat maarang axaau lalon, num butsa bula naba manman sin abia xolot.
22 “Biaa no mataam, biaa laam ina isua. Nawe no mataam axaau, no isuaam araraa naba suk us taman laleng.
23 Oro nawe no mataam morokon, isuaam araraa naba us taman lodo. Nawe biaa laleng lalon iu a lodo, biaa lodo naba lot buxa.
24 “A xap xa na pupua ngali taxaa paina xaa manmanel na lua. U ba ngutsulen iexa o u ba titii iexa, o u ba lolong amusili iexa o u ba palolii iexa. Gim ba xap pupua ngali taxaa sin Moroaa ma xuxute bula.
Nangaam lolbiir
(Luk 16:13; 12:22-31)
25 “Biaabi iaa ga asaaiti gim, gim nangaam lolbiir ngali nagim tino, sawe ngali ngani o nunngi, o ngali no isuaam, sawe gim ba alen. Tino a lot buxa ngen luxaal, ma biaa isua a lot buxa ngen uga?
26 Gim na lasi no maan nan wang, di xap soksok o tatat o axumuli luxaal laa lalon anuen atuturung. Oro nagim Mom tsaa in balalangit a tamtabali di. Moroaa adodo aloti gim buxa ngen no maan.
27 Saa ina gim sin xan lolbiir a pupua ngali asumaa xa pu xolot ina leng na xuuk sin xan tino?
28 “O ngalisa gim ta lolbiir ngali no uga? Gim na lasi no nanaal in lauteng di ta tsik, di xap taktaxaa o xaili sua.
29 Oro iaa asaaiti gim, sin xan matmirmir Solomon, tii xap pupua ngali amatmirmiri no isuaan ngen abala no nanaal.
30 Nawe Moroaa amatmirmiri no palis in lauteng weaatia, biaa ta man atalaawaa o nowa di lii lalon ie. Moroaa naba pupua ngali alen gim. Nagim tinaalnge asuk dokdok buxa.
31 Lowas, gim nangaam lolbiir buxa ngali paare, ‘Giem ba se ngani sa?’ o ‘Giem ba se nunngi sa?’ o ‘Giem ba se alen sa?’
32 No muun taltaalnge di sol amusili abala no daan mat maarang, ma nagim Mom in balalangit, atii we, gim muun ngali abia no.
33 Oro, gim na tsalei xan maradaan setauan ma xan namaang tutiik, ngali naba tali balawaa no mat maarang araraa sin gim bula.
34 Biaabi gim nangaam lolbiir ngali nowa, amuina nowa naba lolbiir ngali ia tsaa. No leng xuxuuk a ie xirabas pupua ngali ia tsaa.