3
No minaxis
1 No aina minaxis lalon abala uk sal gim na adokdoki gim tsaa ma lolong amusili nagim no maxis ngalibi, nawe xaal ina abia di ta xap taltaalnge sin xan totore Moroaa, nagim namaang axaau naba xosaraa nagim no maxis ngali taltaalnge sin Karisito,
2 biaa di ta lasi namaang mixat ma mangmangle sin nagim no tino.
3 Gim na xap amirmiri no isuaan gim ngali gim na mat geramis, malen gim ta xa ili no ulin xo ma ngali xuten no bis ta goul ma alen no uga xadi no iliil ta laa lapalaa.
4 Oro gim na poroklii nagim no namaang axaau, na xosaraa gim na mat geramis, biaa namaang mangmagus ma ina xale adamis ina nantanua, biaa naba ta xap maraamen, biaa naba suk axaau buxa nan no matan Moroaa.
5 Amuina balawaa sal no aina pat in ti laamua di tii taltaalnge sin Moroaa ma di tii ga mat geramis, biaa di tii manglen xadi no maxis ma long amusili di.
6 Malen Sera iwaa tii adokdoki ma amusili Abaram ma ga putsangi ia xan manmanel. Gim xan no tsaxana Sera, nawe gim xosaraa namaang ta tutiik, ma gim ga xap papaalii xa na amataatinai gim.
7 Sin abia uk sal, gim no taamat gim na sinaae axaau sin nagim xalkale mii nagim no tubu, gim na manglen nagim no tubu amuina di xap watwat malen gim no taamat, ma gim mii di, gim ba adi abia tino biaa Moroaa ta tali gomsaai laa sin gim. Gim na xosaraa abala ngalibi na ba xap xawas na tilbanti gim ngali sawit laa sin Moroaa.
Sosong ngali xosaraa namaang tutiik
8 Xapkap ina, gim se araraa gim na tino lalon malina mii no turan gim araraa, gim na tilaamamil sin gim xuxuuk ma gim na etitii engen gim malen nagim no taamat tsaa ma gim na axaau sin gim xuxuuk, ma gim na adokdoki gim tsaa.
9 Gim nangaam xisi namaang morokon taman namaang morokon ma gim nangaam paare amoki xa ta paare amoki gim oro gim na atsuraa Moroaa ngali atubudaani ia amuina Moroaa a ilei gim ngali gim ba tapkina abia tubudaan.
10 Amuina Inaatel Pat tii paare,
“Saa ia ta titii tino
ma ga saan ngali lasi no leng axaau,
na suk tilbanti nan xaliman sin papaare tsaxa,
ma no bulina sin papaare daraxe.
11 U na suk taaltalu sin namaang morokon ma una xosaraa namaang axaau,
ma una suk tsalei malina ma una taxaariti.
12 Amuina no matan Orong atsoktsokmat sin no inaman tutiik,
ma no talingan alolong ngali xadi no sausawit,
Oro no matan Orong a xap saan ngali lasi biaa di, di ta xosor morokon.”
13 Nawe gim watwat ngali xosaraa no namaang axaau, asuk so xa naba xap tsaapi gim.
14 Oro Moroaa naba atubudaani gim nawe gim alet sosong ngali xosaraa biaa namaang ta tutiik. “Nangaam mataa sin senaara di ta mataatinai; gim nangaam us taman minataa.”
15 Oro lalon nagim no butsa gim na axosngi Karisito malen Orong. Gim na tigiri taxaaturung ngali tali xa xixiis sin no inaman araraa, biaa saa ta atsuraa gim ngali sen muina gim ta liliis taman tinaalnge sin Karisito. Oro gim na xisi di taman mangmagus ma mangmangle.
16 Nagim no adodo lalon butsa na suk leng axaau ngalibi biaa di ta paare tsaxa ngali nagim no namaang axaau lalon Karisito, gim ba amangieli di ngali xadi no ie tsaxa.
17 Na ba suk axaau nawe xan sirsiir Moroaa ngali saaen sosong ngali xosaraa namaang axaau ngen ngali xosaraa namaang morokon.
18 Amuina Karisito tii met axuuk mu ngali gita araraa, ia taamat tutiik ma ga met ngali no inaman tsaxa ngali laamungen di laa sin Moroaa. No inaman di tii sas amantei xan pakpak oro tii tino mula lalon nantanua.
19 Lalon abala sal tii laa baais sin no tanua lalon anua lodo.
20 Ti laamua biaa no tanua di tii xap lolong ma amusili Moroaa biaa tii liliis adamis lalon abia xan no leng Noa biaa di tii tumaraa tsaa abia mono. Lalon mono no inaman di paasaatuul mu di tii tuo sin abia xarang,
21 ma balawaa xarang a til axilangi axaxadaan biaa talaawaa ta atoaa gim bula ma balawaa axaxadaan a xap ngali gureli no pun sin no isua oro balawaa xuxubu gim ta xosaraa laa sin Moroaa ngali gim ba tsap mixat lalon no matan Moroaa. Balawaa axaxadaan atoaa gim amuina Iesu Karisito a se tapaas mula xaal sin minet,
22 iwaa ta se tsiga balalangit ma ga xale sin xan lima mua Moroaa. Tiwaa Iesu a ie xoror ma banam araraa patanginai no angelo ma no tanua.