3
Xan leng Orong
1 No turaaga so, talaawaa iaa sebula atalaa nanaalua ina inaatel laa sin gim. Sin abia no inaatel iaa tii xonon ngali awatwati gim ngali adodo tutiik taman no maarang gim ta se asasing sin.
2 Iaa xosaraa abala amuina iaa saan ngali gim na adodomi no totore biaa xan no propet pat Moroaa di tii paatinai ti tsaa. Iaa saan ngali gim na adodomi bula no asasing ina xida Orong Iesu Karisito iwaa xida untino, biaa no aposal di tii xaalame ngali asingan gim.
3 Asuk mamainaang buxa ngali gim na suk atii we sin abia no xapkap ina leng we, balawaa no unreret di ba tsap setauan sin Karisito naba ta mula. Di ba lo xoxosaraa no namaang tsaxa biaa naba ta atatoni di tsaa. Di ba paare sarsar taman sawe gim ta taltaalnge sin.
4 Ma di ba paare we a xubatsi ngali mula oro a xap mager mula. A se daraxe biaa ta paare weaatia. Giem paare we naba xap mula amuina biaa nagiem no iaaiaa setauan di se met araraa oro a xap tsaa xawas na putsi. No maarang a manman weaatia tsaa malen Moroaa ta axosngi xolkolmoxo.
5 Oro di saan ngali adodolii we, ti tsaa Moroaa a paare taman totore ga axosngi balalangit. Sin abia uk sal axosngi xolkolmoxo, ma balan pula ga bet tsuul lalon daan taman daan.
6 Ma ga xosor atsoti biaa xolkolmoxo ina inaman ti laamua taman daan. A tulen xaraxin langit ma ga baaii xolkolmoxo taman daan ma ga aliaani no maarang araraa ta tino.
7 Sin abia uk totore tii xosaraa balalangit ma balan pula. Moroaa a se paare we balalangit ma balan pula biaa ta manman talaawaa naba manman tsaa, ngalibi mil naba auki taman ie. A taxaariti no pupua sin leng biaa naba ta ininte sin no inaman araraa ma na xosor atsoti no inaman biaa di ta xap manglen ia. Mil naba auki balalangit ma balan pula.
8 Oro gim, no turaaga so, gim nangaam adodolii balawaa no maarang iaa ta asaaiti gim, leng axuuk a malen axuuk tausen ina miet ma axuuk tausan ina miet a malen leng axuuk, nan no matan Orong.
9 Oro Orong a xap aliil taman xan xuxubu malen biexaa inaman di ta adodo we aliil, a liliis adamis ngali no inaman amuina a xap saan ngali xosaraa atsoti xaal oro a saan ngali no inaman araraa di na puxisbal.
10 Oro Karisito naba mula sin abia leng, biaa naba ta mula, naba alolaa no inaman malen xa unpulapula. Sin abia leng ngarare lalon balalangit, ma balalangit naba maraamen. No maarang araraa nan balalangit: pal, uleng, ma no xadaxada, di ba dami araraa. Sin abia leng naba asen no maarang no inaman di ta se xosaraa papan balan pula ngali ininte sin di.
11 Asuk so we no maarang araraa naba maraamen malen abala, biaabi gim na adodo taman sal gim ba ta xosaraa no maarang sen we, nawe gim saan ngali Moroaa na atoaa o na ininte sin gim. Gim na tino tutiik ma lalon sal biaa ta atatoni Moroaa.
12 Gim na xosaraa malen abala gim ta liliis taman tinaalnge we xawas naba tsap sin abia leng biaa Moroaa naba ta axilangi we Karisito naba mula, ma gim na taxaa watwat ngali xosaraa ngali naba xaalame isagaa. Sin abia leng balalangit naba dami taman ie lelep biaa naba ta xosaraa no maarang balalangit ngali tsap malen daan.
13 Oro Moroaa a se xubatsi we naba xosaraa balalangit uul ma balan pula uul. No inaman araraa papan balan pula uul di ba xosaraa sawe ta tutiik mu. Balawaa mu no maarang abala giem ta liliis ngali naba tsap no.
14 Biaabi no turaaga so, amuina gim ta liliis ngali abala no maarang ngali tsap, gim na taxaa watwat ngali xosaraa mu sawe ta tutiik ngalibi Moroaa naba lasi gim malen gim mixat, ngalibi naba xap paare we gim xosaraa namaang tsaxa, ngalibi Moroaa naba lasi we gim man lalon malina mii ia.
15 Gim na xilalaa we amuina Orong a liliis adamis, ma ga aliil taman xan mulamula amuina a saan ngali tali xaa leng sin no inaman ngali puxisbal ngalibi naba pupua ngali atoaa di ma na xap tali ininte. Xida taamat so, Pol, iwaa ta atalaa bula abia uk maarang sin gim biaa talaawaa iaa ta asaaiti gim. Atalaa abala no maarang taman sinaae Moroaa ta tali sin ia.
16 Sin xan no inaatel araraa, atalaa no uk maarang ma di ga lelep ngali leng sin, ma no tangtangabaa di xap alengi axaautsi xan no totore, malen di ta xosaraa sin biexaa Inaatel Pat, biaa ga laamuangen di laa sin xadi no xirabas tsaa.
17 Oro gim no turaaga, gim se atii tsaa we balawaa no maarang naba tsap. Biaabi gim na tilaamamil ngalibi no inaman biaa no unlaklaxei lo, di ba xap laamuangen gim ngali laa palaaen abia mamainaang, sin biaa di ta asaaiti gim taman no daraxe. Nawe gim amusili di, gim ba se xap pupua ngali taltaalnge sin abia no maarang ta so.
18 Oro gim na tsik lalon amiimiilam ma sinaae ina xida Orong ma untino Iesu Karisito. Laa sin taman minaalam talaawaa ma laaliu! Aso.