☰ Rom 16
16
Pol a suei atatoni no untaltaalnge in Rom
1 Iaa we ina paatinai no maarang ta axaau taman Pibi, moton giem, iwaa untutule ina xan matenaanua Moroaa tia Senkeria. 2 Gim na suei atatoni ia lalon Orong sin sal ta tutiik ina xan no untaltaalnge Moroaa, ma gim na tiltsoxomi ia sin sen maarang ta muun sin, amuina tii se tiltsoxomi xuduxudu ina inaman ma iaa tsaa bula.
3 Gim na tali nugu lasiaat axaau sin Prisila ma Akuila nugu no uk untinaxaa lalon xan inatalil Iesu Karisito. 4 Delulu se atataen minet ngali tilbanti biexaal biaa di ta xonon ngali sas amantei iaa. Iaa ma xan no matenaanua araraa Moroaa ina no Gentail bula, giem putsangi axaau sin Moroaa ngali delulu. 5 Lasiaat axaau bula laa sin abia xan matenaanua Moroaa di ta tsap esuei lalon xadelu anua. Gim na tali lasiaat axaau sin nugu xos ina turaaga, Epenetus, iwaa tii laamua ngali puxisbal laa sin Karisito tala Asia. 6 Tali nugu lasiaat axaau sin Maria iwaa ta taxaa watwat ngali gim. 7 Gim na putsangi lasiaat axaau sin Andronikus ma Junia nugu no uk matenbung no Jiu ma inaman ina nugu inaman labalaba ma delu tii no uk xaus mii iaa lalon anua lodo. No aposal di atik axaautsi di ma di tii taltaalnge sin Karisito setauan sin iaa. 8 Gim na putsangi lasiaat axaau sin Ampilatus iwaa iaa ta titii lalon Orong. 9 Gim na putsangi lasiaat axaau sin Urbanus nagiem uk tinaxaa lalon Karisito, ma Stakis iwaa nugu xos ina turaaga. 10 Gim na putsangi lasiaat axaau sin Apelis iwaa Moroaa ta se xonon ma sirawaa lalon Karisito. Gim na putsangi lasiaat axaau sin xan matenaanua Aristobulus. 11 Gim na putsangi lasiaat axaau laa sin Erodion iwaa nugu uk matenbung. Ma gim na putsangi lasiaat axaau sin xan matenaanua Narsisus biaa di tii manman lalon Orong. 12 Gim na putsangi lasiaat axaau laa sin Trapena ma Traposa, delu arie taxaa watwat lalon Orong, ma gita na putsangi lasiaat axaau laa sin Pesis iwaa nugu xos turaaga, iexa aina ta taxaa watwat lalon Orong. 13 Gim na putsangi lasiaat axaau sin Rupus iwaa Orong ta se axilangi; mii xan nagaa bula iwaa ta tsap malen nugu nagaa bula. 14 Gim na putsangi lasiaat axaau laa sin Asinkritus, Pilegon, Emes, Patrobas, Emas, ma xida no taamat ma no motogo lalon Orong mii di. 15 Gim na putsangi lasiaat axaau laa sin Pilologus, Julia, Nereus mii moton ma Olimpas, ma no untaltaalnge mii di. 16 Gim na putsangi lasiaat axaau sin gim xuxuuk taman engur, biaa ta pat ma xan no Matenaanua Moroaa araraa lalon Karisito di putsangi, lasiaat axaau laa sin gim.
17 Iaa ningi awatwati gim, nugu no taamat ma no motogo, ngali gim na tilaamamil sin abia di, di ta xaa xosaraa no engangaae labatina gim ma di ta asingan gim taman no maarang ngali xosaraa gim ngali xol palaaen abia asasing axaau gim ta se adi, gim na man palaaen di. 18 Amuina biaa no mat inaman, di xap taxaa laa sin xida Orong Iesu Karisito; oro di taxaa ngali di tsaa ma taman xadi no totore ta teng axaau no ma taman paipaʼii, di ta tali sin no inaman, di apanaai abia no inaman, di ta xap atii we, di no inaman tsaxa. 19 No inaman sin no daan xolot, di se alongen we gim lolong amusili xan totore Moroaa, iaa ga suk taton sin gim oro iaa saan ngali gim na sinaae sin senaara ta axaau ma gim na leiwaa sin senaara ta morokon.
20 Iwaa Moroaa ina malina naba axaxaitsaa Saatan paina no xaden gim.
Xan amiimiilam xida Orong Iesu Karisito naba manman mii gim.
21 Timoti iwaa nugu uk untinaxaa a putsangi lasiaat axaau laa sin gim; mii Lusias ma Jaison ma Sosipata nugu no mixap.
22 Iaa Tetius, iaa tii atalaa abala inaatel, ma iaa putsangi lasiaat axaau bula sin Orong.
23 Gaius a putsangi lasiaat axaau laa sin gim. A tilaamamil sin iaa ma balawaa xan Matenaanua Moroaa atala.
Erastus iwaa untilaamamil ina no tang ina abala inaman labalaba ma nagiem taamat Kuartus, delu putsangi lasiaat axaau laa sin gim.
24 Iaa sawit we xan amiimiilam xida Orong Iesu Karisito, naba manman mii gim araraa. Aso.
Pol aminaalami Moroaa
25 Talaawaa, minaalam na laa sin ia iwaa ta pupua ngali xosor awatwati gim sin tinaalnge amusili nugu inesaait mamainaang ma biaa babaais ina Iesu Karisito ma amusili abia inesaait xuxii tii se asemat biaa tii man xuxii xaal ti laamua. 26 Oro talaawaa a se asemat sin xadi no inaatel no propet, sin xan banam Moroaa ta tino laaliu, ngalibi no inaman labalaba di soro taltaalnge ma long amusili ia. 27 Giem langlangaari sin iu iwaa unsinaae Moroaa mu, gita ba aminaalami ia laaliu sin Iesu Karisito! Aso.
☰