1 Biaabi iu biaa u ta ininte atsoti biexaal, a xap num xa muina, ngali paare we u tutiik. Una lolong, Moroaa naba ininte sin iu ngali asosongi iu amuina sin abia uk sal u ta ininte atsaxati biexaal, ma u ga xoxosaraa bula abala uk namaang. 2 Gita atii we xan ininte Moroaa aso, biaa ta ininte sin no inaman biaa di ta xoxosaraa abala no mat laxen namaang morokon. 3 Iu taamat mu, u ininte sin abia no inaman, amuina di ta xoxosaraa abia no namaang oro iu tsaa u tigiri xoxosaraa abia no uk mat namaang biaa di ta xoxosaraa. U adodo we, u ba sol xuxii sin xan ininte Moroaa? 4 Moroaa tii suk axaau buxa sin iu. A xap isagaa ngali ininte sin nagim no namaang tsaxa ma ga liliis adamis, ngali u na xosaraa abia ta tutiik. Ngalisa u ta nan amagurusiki xan mamainaang? U na suk atii, sen muina Moroaa ga axaau sin iu, amuina a saan ngali una puxisbal. 5 Oro iu xo taban✡ ma u ga xap puxisbal. Xan minagaa Moroaa a suk tsik lot ngali epuske mii iu, amuina sin num xo taban. Sin abia leng no inaman araraa, di ba lasi xan ininte tutiik Moroaa. 6 “Moroaa naba tali no iliil axaau ma asosongi no inaman xuxuuk amusili senaara taamat o aina ta se xosaraa.”✡ 7 Moroaa naba tali tino laaliu, laa sin abia di, di ta liliis adamis sin no tinaxaa axaau, ma di ga tsatsel ngali minaalam ma mangmangle xa biaa Moroaa naba ta tali, ma biaa tino naba ta xap xa xapkap ina. 8 Oro biexaa inaman di adodo buxa ngali di tsaa ma di ga xap amusili abia xan no totore Moroaa ta so, oro di ga amusili no namaang morokon. Moroaa naba suk magaa buxa ngali di. 9 Moroaa naba suk tali sosong ma mamaet sin no inaman xuxuuk biaa di ta xoxosaraa no namaang morokon, lalaamua ina, a laa sin no Jiu ma mil ga laa bula sin no Gentail. 10 Oro minaalam ma mangmangle ma malina a laa sin no inaman araraa di ta xoxosaraa no namaang axaau, lalaamua ina a laa sin no Jiu ma mil a laa bula sin no Gentail. 11 Amuina Moroaa a xaa ininte sin no inaman araraa, sin abia uk sal. 12 Biexaa inaman, di ta xap atii lo, ma di ga xosaraa no namaang tsaxa. Di ba amusili sal laa sin minet. Biaa di, di ta atii lo, ma biaa di ta xosaraa namaang tsaxa paina lo, lo naba ininte sin di. 13 Amuina a xap abia di, di ta alongmen lo, di ba tsap tutiik laamuaan Moroaa; Oro biaa di mu, di ta long amusili lo, di ba tsap no untutiik. 14 Biaa no Gentail, di ta xap adi lo, oro biaa sin xadi namaang ina xalkale, di xosaraa no namaang axaau malen lo ta paare, asen we lo bia lalon xadi no butsa, ma di tsaa, di xap adi abia lo. 15 Di asen we, sawe lo ta paatinai, Moroaa atalaa lalon xadi no butsa, xadi no adodo lalon xadi no butsa asen we aso. Xadi no adodo ina xadi no butsa naba asaait nawe di xosaraa namaang axaau o namaang tsaxa. 16 Leng bia naba ta xaalame malen nugu inesaait mamainaang✡ ina Iesu ta paare, biaa Moroaa naba ininte sin xadi no tinaxaa xuxii ma no adodo xuxii no inaman sin Iesu Karisito.

17 Talaawaa iaa ba papaare sin gim biaa gim ta putsangi gim tsaa no Jiu. Gim taalnge sin xan lo Moses ma gim ga paraak taman Moroaa, 18 ma u ga atii senaara Moroaa ta saan ngali atsapngen ma u ga taton sin senaara ta suk axaau amuina xa a se asingan iu taman xan lo Moses, 19 ma iu atii so we, iu iwaa xa naba ta laamuangen biaa di, di ta baba, iu abia rarar laa sin abia di, di ta manman lalon lodo, 20 iu iwaa unaasasing ina no tangtangabaa ma iu iwaa unaasasing ina no madalak, amuina xan lo Moses asingan iu, ngali atik axaautsi Moroaa ma ngali atii senaara ta so. 21 Asen parawe sin iu tsaa? Iu asingan biexaa inaman taman xan no asasing Moroaa, asen parawe, iu xap xaa amusili senaara iu ta xaa asingan no inaman taman? Sin biaa u ta xaa baais we, pulapula a morokon, asen parawe, iu xaa pula? 22 U ta paare we, a xap tutiik ngali xa na matul mii iwaa xa ta xap xan tubu, oro asen parawe iu xaa matul mii iwaa xa ta xap num tubu? Iu, iwaa xa u ta xap saansili no malagan asen parawe, u xaa pula xaal lalon xadi no anuen tsutsungit no moroaa ababaa? 23 U ta paraak taman abia lo oro iu xap manglen Moroaa amuina iu xap amusili abia lo. 24 Propet Aisaia atalaa we, “No Gentail, di paare reret taman iesan Moroaa amuina sin gim no Jiu.”✡

25 Nawe iu amusili xan lo Moses; asuk axaau ngali iu na xasau✡ oro nawe iu laxei xan lo Moses naba malen iu tii xap xasau. 26 Biaabi nawe xa taamat a xap xasau, ga long amusili lo, Moroaa naba suk adodo so ngali ia, malen xa ina abia di, di ta se xasau. 27 Iwaa xa ta xap xasau oro ga long amusili lo, naba ininte sin iu, iwaa xa ta atii lo ma ga xasau oro a se laxei lo. 28 Amuina nawe xa taamat a tino malen xa Jiu, biaa a xap asen malen ia Jiu so. Malen mu nawe, di axasaui xa taamat, biaa a xap paatinai we ia so xan Moroaa. 29 Oro iwaa Jiu so, iwaa xan no adodo ta amusili xan no adodo Moroaa, ma biaa xaskasau,✡ maarang ina butsa sin Nantanua, a xap totore ina xan lo Moses. Biaa xan paipaʼii xa, a xap xaal sin taamat, oro axaal sin Moroaa.