7
144,000 ina xan axixila Moroaa
1 Mil ina abala iaa tii lasi no angelo ta et di ta tiltil sin no tsigur ta et ina balan pula ngali tilkaali no matan maal ta et ina balan pula. Ngali tilbanti xa maal ngali naba xap maal papan balan pula o papan laman o papan xa ie.
2 Mil iaa ga lasi iexa angelo ta xaalame lapalaa nan selina, ta taxaanai, xan axixila Moroaa iwaa ta tino. A ilei lot ngali abia no angelo ta et biaa Moroaa ta se tali xoror sin di ngali tsaalen pula ma laman, a paare,
3 “Gim nangaam tsaalen pula o no ie pupua sin gita ba ta aturungi xan axixila Moroaa sin no ielan xan no untutule xida Moroaa.”
4 Mil iaa tii ga longmien abia xoxot ina abia di, no angelo di tii aturungi xan axixila Moroaa sin di: 144,000 axaal sin no matenbung araraa in Israel.
5 No angelo di tii aturungi xan axixila Moroaa sin xan matenbung Juda 12,000,
sin xan matenbung Ruben 12,000,
Sin xan matenbung Gaad 12,000
6 xan matenbung Asaa 12,000,
Sin xan matenbung Napetali 12,000,
Sin xan matenbung Manase 12,000,
7 Sin xan matenbung Simeon 12,000,
Sin xan matenbung Liwai 12,000,
Sin matenbung Isakaa 12,000,
8 Sin xan matenbung Sebulon 12,000,
Sin xan matenbung Josep 12,000,
Sin xan matenbung Benjamin 12,000.
Biaa xaraxin malep lalon uga disdis iaas
9 Mil sin abala iaa nanen ma laamuaan iaa, xaraxin malep biaa xa ta xap pupua ngali iesei, xaal sin no inaman labalaba araraa ma no matenbung, no inaman, ma no laxen totore di ta tiltil laamuaan abia muina xalkale ma talaa laamuaan aia Sipsip Dokdok. Di tamtuel lalon no uga disdis iaas ma di ga taxaanai no laxe ina baibai nan no liman di.
10 Ma di ga xuup lot buxa:
“Atotoaa axaal sin xida Moroaa
Iwaa ta tsotso papan muina xalkale
ma laa sin iwaa Sipsip Dokdok.”
11 No angelo araraa di tiltil ulti muina xalkale ma ulti no xusaak ma biaa no tanua tuo ta et. Di sage putput laamuaan abia muina xalkale ma di ga langaari laa sin Moroaa,
12 ma di ga paare
“Aso!
Paipaʼii ma minaalam
ma sinaae ma putsangi axaau ma mangmangle xa
ma xoror ma watwat
laa sin xida Moroaa, laaliu ma laaliu.
Aso!”
13 Mil iexa ina no xusaak ga atsuraa iaa, “No saa abia, di ta ugauga lalon no uga iaas, ma itaa di xaal?”
14 Iaa xisi, “Nugu Orong u atii.”
Ma ga paare, “Balawaa no inaman, di no untaltaalnge di ta se aiepatsaa araraai biaa xaraxin xonkonon, di se guraii xadi no uga disdis ma di ga aiaasi no lalon xan dal iwaa Sipsip Dokdok.
15 Biaabi
“Di ga manman laamuaan xan muina xalkale Moroaa
ma di ga langaari sin ia lasiaat ma nabing nan Xan Anua Moroaa
ma iwaa ta tsotso papan muina xalkale naba apalasaa xan anuasel papan di.
16 ‘Di ba xap bula itol
Di ba xap bula marua.
Pal naba xap bula pale di
ma na xap alapaa di.’
17 Amuina iwaa Sipsip Dokdok lolobet ina muina xalkale naba tsap xadi untilaamamil
naba laamuangen di laa nan keke ina daan ina tino.
‘Ma Moroaa naba siwaa lii no didin mat araraa sin xadi no matan.’ ”