15
1 Panoc miyac tonali huan ajsic ipohual para quitequise trigo. Huan Sansón yajqui quipaxaloto isihua pampa quinequiyaya ihuaya itztos. Huan quihuiquili se pilchivojtzi huan quiilhuito itata:
―Nijnequi nicalaquis campa nosihua itztoc ipan icuarto.
Pero itata nopa ichpocat amo quicahuili ma calaqui,
2 huan quiijto:
―Na nimoilhui ya tijcajtejtoya huan yeca nijmactili mohuampo. Pero nijpixtoc seyoc noichpoca cati más pisiltzi. ¿Amo tiquita más yejyectzi? Huajca ya ximocuili quej ipataca.
3 Huan Sansón quiijto:
―Ayecmo aqui huelis techtajtacoltis ica cati fiero nimechchihuilis anfilisteos, pampa amo cuali antechchihuilijtoque.
Sansón quitati ininpixquilis ica cayochime
4 Huan Sansón yajqui huan quinitzqui 300 cayochime huan quincuitapililpi ojome cayochime huan tatajco ten sese ome inincuitapilhua quinilpili se ticuahuit.
5 Teipa quitati nopa ticuahuit huan quinmajcajqui nopa cayochime ma motalojtiyaca campa inintatoc nopa filisteos. Quej nopa tami tatac nopa trigo cati noja moquetztoya huan cati ya quitectoyaj ipan inimil. Nojquiya tatac inixocomeca mil huan nochi inincua ten olivo. Nochi cati quitoctoyaj tatac.
6 Huan nopa filisteos quiijtojque:
―¿Ajquiya quichijqui ya ni?
Huan tananquilijque:
―Sansón quichijqui, yaya cati imontica nopa tacat cati ehua altepet Timnat pampa quiquixtili isihua huan quimactili cati inelhuampo ipan nopa nenamictili.
Huan nopa filisteos hualajque huan quitatijque nopa sihuat ihuaya itata.
7 Huan quema Sansón quimatqui cati quichijque nopa filisteos, quinilhui:
―Pampa anquichijque ya nopa, ama amo nimosiyajquetzas hasta nimechtzontamiltis.
8 Huan quintamimicti nochi filisteos nopona huan amo quintasojtac. Teipa yajqui para itztoti nechca tepet Etam campa onca se ostot ipan tet.
Sansón temicti ica icamachal omiyo se burro
9 Huan nopa filisteos yajque mochihuatoj ipan tali Judá nechca altepet Lehi.
10 Huan tali Judá ehuani quintatzintoquilijque:
―¿Para ten anhualahuij nica?
Huan nopa filisteos tananquilijque:
―Tihualahuij tiquitzquiquij Sansón para tijcuepilise por cati techchihuilijtoc.
11 Huan mosentilijque eyi mil israelita tacame ten tali Judá huan yajque campa Sansón ipan nopa tet nechca Etam huan quiilhuijque:
―¿Amo tijmati nopa filisteos quipiyaj tequiticayot ica tojuanti huan inimaco tiitztoque? ¿Para ten tiquintehuijtoc quej ni?
Huan Sansón quinnanquili:
―San niquincuepilijtoc cati techchihuilijtoque.
12 Huajca nopa Judá ehuani quiilhuijque:
―Tihualahuij para timitzitzquise huan timitztemactilise inimaco nopa filisteos.
Huan Sansón quinnanquili:
―Xijtestigojquetzaca Toteco para amo antechmictise.
13 Huan nopa Judá ehuani tananquilijque:
―¡Amo! Amo timitzmictise. San timitzitzquise huan timitztemactilise inimaco.
Huajca quincahuili ma quitatacatzoca ica ome mecat cati yancuic huan quichihualtijque ma quisa ten nopa tepet.
14 Huan Sansón ajsito nepa altepet Lehi ilpitoc, huan nopa filisteos quisacoj tahuejchijtihualahuij para quinamiquise. Pero Itonal TOTECO motali ipan Sansón, huan nopa lazo cati yancuic cati ica quiilpitoyaj elqui quej nopa icpat lino cati tatatoc, nochi cocotocac huan Sansón mocajqui majcajtoc.
15 Huan quipanti se pilburrojtzi icamachal omiyo cati noja yancuic eltoya huan quitananqui huan ica ya nopa quinmicti mil tacame.
16 Huajca Sansón quiijto:
“Ica se burro icamachal omiyo,
nijchijqui se tamontomit.
¡Amo! Nijchijtoc nelía ome tamontomit
ica se burro icamachal omiyo,
pampa ica niquinmicti mil tacame.”
17 Huan quema tanqui camanalti, quimajcajqui nopa camachali, huan nopona quitocaxti Ramat Lehi. (Ramat Lehi quinequi quiijtos Tepet Ten Icamachal Omiyo Se Burro.)
18 Huan teipa Sansón pejqui amiqui tahuel huan motatajti ica TOTECO huan quiijto: “Nelía hueyi cati tijchijtoc ica nomax pampa techmaquixtijtoc tiisraelitame ten nopa filisteos. Huajca ama, amo techcahuili ma niamijcamiquis huan nimocahuas inimaco cati amo mitzneltocaj.”
19 Huajca Toteco Dios quicoyoni nopa tet nopona nechca Lehi huan mexqui at. Huan Sansón atic huan pejqui quipiya más chicahualisti. Huan quitocaxti nopona Enhacore. (Enhacore quinequi quiijtos Nopa Ameli Ten Nopa Tacat Cati Motatajti.) Huan nopa ameli hasta ama eltoc nopona nechca Lehi.
20 Huan Sansón quinyacantiyajqui israelitame para 20 xihuit pero nopa filisteos noja quinahuatiyayaj nopa tali.