106
Iniyolteticayo israelitame
1 ¡Paquilisti!
¡Ma tijtascamatica TOTECO pampa yaya nelía cuali iyolo huan itaicnelijcayo amo quema tamis ica tojuanti!
2 ¿Ajquiya huelis quitamiijcuilos nopa cuajcualtzitzi tiochicahualnescayot cati TOTECO quichihua?
¿Ajquiya huelis tepohuilis nochi cati quichijtoc Toteco?
3 Quipiyaj paquilisti nopa masehualme cati nochipa quichijtinemij cati cuali huan cati xitahuac.
4 TOTECO, techelnamiquis na quema tiquintiochihuas huan tiquinmaquixtis momasehualhua.
5 Techcahuili ma niquitas cati cuajcualtzi tiquinchihuilis momasehualhua cati tiquintapejpenijtoc.
Xijcahuili para nojquiya ma nipaquis inihuaya.
Xijcahua ma nimopaquilismacas ica inijuanti cati moaxcahua.
6 Tojuanti nojquiya titajtacolchijtoque san se quej tohuejcapan tatahua.
Titaixpanoque huan tijchijtoque cati fiero.
7 Tohuejcapan tatahua amo quimachilijque nopa huejhueyi tiochicahualnescayot cati Toteco quichijqui ipan tali Egipto.
Yon amo quielnamijque para quipixqui hueyi iyolo ica inijuanti.
Inijuanti moyoltetilijque ica Toteco nepa campa nopa hueyi at cati itoca Chichiltic.
8 Pero Toteco quinmaquixti para ma quitepanitaca,
huan tenextili ihueyi chicahualis ipan nochi taltipacti.
9 Quiajhuac nopa hueyi at cati itoca Chichiltic huan quinahuati ma motajcoxelo.
Huan quej nopa quitapo se ojti huactoc quej elisquía huactoc tali,
huan quinchihualti tohuejcapan tatahua ma ipan panoca.
10 Quej nopa quinmaquixti huan quinchololti inimaco inincualancaitacahua.
11 Huan nopa at quinatzonpolihuilti inincualancaitacahua hasta amo mocajqui yon se cati amo mijqui.
12 Huan huajca tohuejcapan tatahua quineltocaque icamanal cati Toteco quinilhuijtoya.
Huan teipa huicaque huan quipaquilismacaque.
13 Pero sempa nimantzi quielcajque nochi cati Toteco quichijtoya.
Huan amo mochixque para Toteco ma quinmaca consejos.
14 ¡Amo! Nepa ipan huactoc tali quiyejyecojque Toteco Dios ica cati tahuel quinequiyayaj ma quinmaca.
Quena, quifuerzajhuijque ma quinmaca nopa tacualisti cati inijuanti quinequiyayaj.
15 Huajca Toteco quinmacac cati quitajtanijque,
pero nojquiya quintitanili cocolisti cati ica mijque miyac nopa masehualme.
16 Huan nopona campa quiquejquetztoyaj iniyoyoncal,
quichicoitaque Moisés,
huan quichicoitaque Aarón cati TOTECO quiiyocatalijtoya para ma eli itotajtzi.
17 Huajca motapo tali huan quintolo Datán, Abiram huan nochi cati quintoquiliyayaj.
18 Huan Toteco quititanqui tit ten ilhuicac,
huan quintamitati nopa taixpanoca tacame.
19 Nepa ipan tepet Horeb mochihuilijque se becerro ten oro huan ya nopa quihueyichijque.
20 Quitahuelcajque Toteco huan ihueyi chicahualis,
huan pejque quihueyimatij se becerro ten oro,
iixcopinca se tapiyali cati quicua xihuit.
21 Huan quej nopa quielcajque ininTeco Dios cati quinmaquixtijtoya,
yaya cati quichijtoya huejhueyi tamanti ipan tali Egipto,
22 huan ipan nopa hueyi at cati itoca Chichiltic.
23 Huajca Toteco quiijto para quintzontamiltisquía,
pero Moisés cati Toteco quitapejpenijtoya motajcoquetzqui,
huan quitajtani Toteco para amo ma quintzontamilti ica ihueyi cualancayo.
24 Teipa nopa israelitame amo quinejque calaquise ipan nopa tali cati nelía cuali,
pampa amo quineltocaque para Toteco quinmocuitahuisquía.
25 Huan ipan ininchajchaj pejque quiejelnamiquij TOTECO huan amo quitacaquilijque cati quinilhuiyaya ma quichihuaca.
26 Yeca Toteco Dios momatananqui huan tatestigojquetzqui para quintzontamiltisquía ipan nopa huactoc tali.
27 Quiijto para ininconehua quinsemanasquía huan quintitanisquía,
ipan sequinoc talme para ma itztotij quej sejcoyoc ehuani altepet ehuani.
28 Nojquiya ipan tali Peor tohuejcapan tatahua mosejcotilijque inihuaya cati quihueyichihuayayaj Baal,
huan hasta quinmacaque tacajcahualisti mijcatzitzi.
29 Huan ica ya ni quicualancamacaque Toteco.
Yeca Toteco quititanqui se hueyi cocolisti ininpani huan miyac mijque.
30 Huan Finees mosemacac huan motananqui,
huan quinmicti nopa masehualme cati ica inintajtacolhua quichijtoyaj ma huala nopa cocolisti.
Huan ica ya nopa motilquetzqui nopa cocolisti.
31 Huan ni cuali tamanti quichijqui para Finees ma quielnamictoca para nochipa quej se tacat cati cuali.
32 Nojquiya campa at Meriba,
nopa israelitame quicualancamacaque Toteco.
Quena, por inijuanti, Toteco cualanqui ica Moisés.
33 Pampa quichijque ma cualani Moisés,
huan ma camanaltitiquisa ica cati amo monequiyaya.
34 Huan nojquiya nopa israelitame amo quintzontamiltijque nochi nopa altepeme,
ipan nopa talme cati TOTECO quinnahuatijtoya ma quisosoloca.
35 San achi más mosejcotilijque inihuaya cati amo quitepanitayayaj Toteco,
huan nojquiya quichijque cati inijuanti momajtoyaj quichihuaj.
36 Quinhueyimatque ininteteyohua,
huan mohuejcatalijque ten Toteco,
huan ica ya nopa mocuapolojque.
37 Hasta quinmictijque ininconehua quej se tacajcahualisti para iajacahua Amocualtacat.
38 Huan pampa quinmictijque ininconehua cati amo teno quichijtoyaj para quinmacase nopa teteyome ten tali Canaán,
quinenpolojque nopa tali ica inieso.
39 Huan inijuanti nojquiya monenpolojque ica nochi tamanti fiero cati quichijque.
Pampa quema quinhueyichihuayayaj teteyome,
Toteco Dios quinitayaya quej elisquía momecatiyayaj ica seyoc cati amo inintahuical.
40 Yeca TOTECO tahuel cualanqui ica imasehualhua,
huan ayecmo quinejqui quinitas.
41 Huan quintemactili inimaco inincualancaitacahua cati ehuayayaj ipan nopa talme cati amo quitepanitayayaj Toteco,
para nopa masehualme ma quinnahuatica.
42 Huan quena, inincualancaitacahua quintaijyohuiltijque
huan tahuel quincocojque pampa itztoyaj inimaco.
43 Miyac huelta Toteco quinmanahui,
pero inijuanti quisenhuiquiliyayaj moyoltetilíaj ica ya.
Yeca teipa quicahuili ma tzontamica por inintajtacolhua.
44 Pero masque ya nopa quichihuayayaj,
Toteco quintacaquiliyaya quema quitzajtziliyayaj,
huan quinpalehuiyaya quema masehualme quintaijyohuiltiyayaj.
45 Quena, quielnamiquiyaya nochi cati quintajtolcahuilijtoya para quinchihuilis.
Yeca quintasojtac huan moyolcuetqui pampa tahuel quinicneliyaya.
46 Huan hasta quichijqui para inincualancaitacahua cati quintaijyohuiltiyayaj,
ma nojquiya quintasojtaca.
47 ¡TOTECO Dios, techmaquixti ten tocualancaitacahua!
Sempa techsentili ten campa hueli talme para tihuelise timitztascamatise ta cati titatzejtzeloltic,
huan para huelis tipaquise huan timitzhueyimatise.
48 Ma tijpaquilismacaca TOTECO Dios para nochipa,
yaya cati toTeco tiisraelitame.
Nochi imasehualhua ma quiijtoca:
“¡Quej nopa ma eli! ¡Paquilisti!”