16
Toteco techmacas cati cuali
1 Techmocuitahui, Toteco Dios,
pampa ipan ta nimotemachijtoc para techmanahuis.
2 TOTECO, na nimitzilhuijtoc:
“Ta tinoTeco huan amo aqui seyoc cati huelis nechpalehuis.”
3 Niquinicnelía inijuanti cati mitzneltocaj cati itztoque ipan nopa tali.
Inijuanti cati nelía cuajcualtzitzi iniyolo.
4 Pero mojmosta más motequipachose masehualme cati quintoquilíaj sequinoc inintaixcopincayohua.
Na amo quema nijtencahuas se tacajcahualisti iniixpa inintaixcopincayohua,
yon amo quema niquintocaxtisquía.
5 San ta, TOTECO, nimitzpixtoc,
yeca ayecmo teno nijtemos.
Ta techmaca nochi notacualis huan noa cati nechpolohua para niitztos.
Nonemilis huan nochi cati nijpixtoc eltoc momaco huan nijmati nelía temachti.
6 Nopa lazo cati ica techtatamachihuili campa nijselijtoc huetzqui campa nelía cuali tali.
Nelía tacuajcualtzi campa techmacatoc.
7 Nimitzhueyichihuas, TOTECO,
pampa techconsejomaca.
Tajco yohual techmaca motalnamiquilis huan technextilía ipan noyolo taya monequi nijchihuas.
8 Nochipa nimoilhuía ten ta, TOTECO,
huan pampa tiitztoc nonechca, amo teno nopantis.
9 Yeca ipan noyolo nelía nijpiya paquilisti.
Nochi notacayo motemachijtoc ipan ta.
10 Pampa amo tijcahuas notacayo ipan ostot,
yon amo tijcahuas ma palani itacayo Yaya Cati Tatzejtzeloltic.
11 Technextilis catijqui ojti quipiya nemilisti.
Nijpiyas hueyi paquilisti nepa campa ta tiitztoc.
Quena, oncas hueyi paquilisti para nochipa nepa campa monejmat.