55
Se netatajtili ten se masehuali cati quicajcayajqui ihuampo
1 NoTeco Dios, techtacaquili quema nimotatajtía ica ta.
Amo ximotati quema nimitztzajtzilía.
2 Techtacaquili huan technanquili,
pampa tahuel nimotequipachohua huan nichoca pampa nitaijyohuía.
3 Nocualancaitacahua nechtzajtzilíaj chicahuac huan quinequij nechmictise.
Tahuel nechcualancaitaj huan ica nochi inincualancayo nechtepotztocatihualahuij para nechtzontamiltise.
4 Nelía nechcocohua noyolo pampa nechitzquía se hueyi majmajti.
5 Quena, tahuel nimajmahui huan nihuihuipica.
6 ¡Cuali elisquía sinta nijpiyasquía noeltapal quej quipiya se paloma para huelisquía nipatantehuas huan nimosiyajquetzati!
7 Quena, nicholosquía hasta nepa campa huactoc talme cati mopantíaj huejca huan nepa nimocahuasquía.
8 Nimoisihuiltisquía para nicholos huan nimotatis ten nochi ni taijyohuilisti cati hualajtoc nopani.
Eltoc quej se hueyi ajacat hualajtoc cati tamitasosolohua.
9 Toteco, xiquintzontamilti nocualancaitacahua.
Xijchihua ma mocuapoloca inijuanti iniselti quema camanaltij.
Na niquitztoc para nochi tatehuíaj campa hueli ipan ni moaltepe.
10 Tayohua huan tonaya masque itztoque cati quiyahualojtinemij ni altepet ipan itepa para quimocuitahuise ten tocualancaitacahua,
inijuanti cati nica ehuani iniselti motehuíaj se ica seyoc ipan ni altepet.
11 Tatajco nopa altepet quichihuaj miyac tamanti cati amo cuali,
huan amo onca tatepanitacayot.
Ipan tianquis huan campa hueli momictíaj,
tachtequij huan tacajcayahuaj.
12 Amo elqui se nocualancaitaca cati nechcajcayajqui,
pampa sinta quej nopa eltosquía, huajca niquijyohuijtosquía.
O hueltosquía nicholos huan nimotatis.
13 Pero elqui se cati nemiyaya nohuaya,
se cati nechyacanayaya huan cati nonelhuampo.
14 Quena, elqui yaya cati sentic timopohuiliyayaj nopa tamanti cati tijpixtoyaj ipan toyolo,
huan cuajcualtzi timocamanalhuiyayaj quema san sejco tiyahuiyayaj ipan mochaj, Toteco Dios.
15 Ma talochmiquica nochi nocualancaitacahua huan ma yaca hasta micta quema noja yoltoque,
pampa ipan ininchaj huan ipan iniyolo san onca tajtacolot.
16 Pero na san nijtzajtzilis Toteco Dios para ma nechmaquixti.
Huan quena, temachti yaya nechmaquixtis.
17 Na nimotatajtis ica ijnaloc, ica tajco tona huan ica tiotac.
Huan yaya nechtacaquilis huan nechnanquilis.
18 Ipan tatehuilisti yaya nechmanahuis,
masque tahuel miyac nocualancaitacahua nechtehuise chicahuac.
19 Toteco Dios cati ipa itztoc huan tanahuatijtoc hasta ten huejcajquiya,
yaya nechtacaquilis huan quintzontamiltis.
Pampa nocualancaitacahua amo quipataj ininemilis cati fiero,
yon amo quitepanitaj itanahuatil.
20 Nopa masehualme cati amo cuajcualme momatananaj para quintehuíaj hasta inihuampoyohua.
Quiixpanoj nopa camanali cati quichihuaj inihuaya sequinoc.
21 Quitequihuíaj camanali cati nelcuajcualtzi huan yamanic quej mantequilla,
pero ipan iniyolo san moilhuíaj quenicatza tatehuise.
Nochi cati quiijtohuaj eltoc alaxtic quej aceite,
pero ixtacatzi teyolcocohuaj ica camanali quej quema timotzontequis ica macheta.
22 Nochi motequipachol xijcahua imaco TOTECO huan yaya mitzmacas temachili.
TOTECO amo quicahuas ma huetzi se cati quitepanita.
23 Pero ta tinoTeco Dios,
tiquintitanis nocualancaitacahua ipan nopa ostot cati tahuel huejcata.
Nopa temictiani huan istacatini amo itztose yon tajco ten ininemilis,
pampa amo huejcahuase itztose ipan ni taltipacti.
Pero na nochipa nimotemachis ipan ta para techmaquixtis.