76
Se huicat cati huicaque quema ya tatanque
1 Ipan tali Judá huan hasta nochi tali Israel nochi masehualme quiixmatij Toteco Dios para nelía hueyi.
2 Itiopa eltoc ipan altepet Jerusalén.
Quena, ipan tepet Sion eltoc ichaj.
3 Nopona quipojpostejqui nochi tamanti ininteposhua tocualancaitacahua.
4 ¡Nopa tepeme cati eltoque ten huejcajquiya amo quipiyaj iniyejyejca quej tepet Sion quipiya!
5 Nopa tocualancaitacahua cati más quipiyayayaj chicahualisti,
quintamitacuijcuilijque.
Toixpa tepejtoque mictoque.
Yon se ten inijuanti ayecmo hueli quitananas imax para techtehuis.
6 Quema ta tiToteco, cati tiiDios Jacob, tiquinajhuac nopa cahuayojme huan cati tejcotoyaj ininpani,
nochi huetzque hasta talchi.
7 ¡Yeca nochi quiitaj para tahuel titemajmati!
Huan amo aqui huelis quiijyohuis ijcatos moixpa quema tahuel ticualantoc.
8 Hasta nepa ilhuicac titayolmelahua para titetatzacuiltis.
Huan ni taltipacti majmajqui huan amo molini moixpa,
9 quema timotananqui, Toteco Dios,
para tiquintatzacuiltis cati quichihuaj cati amo cuali,
huan para tiquinmanahuis nochi cati moechcapanohuaj ipan ni taltipacti.
10 Ta tijtequihuía inincualancayo masehualme para sequinoc ma mitzhueyimatica.
Huan tijtequihuis para más monextis moyejyejca.
11 Xijchihuaca nochi cati anquitajtolcahuilijtoque TOTECO para anquichihuase.
Sese ma quihualica nopa tamanti cati quitencahuilijtoc para quimacas Toteco Dios.
Monequi ma tijhueyitepanitaca huan ma tiquimacasica,
12 pampa yaya quintamiltilía ininemilis nopa huejhueyi tayacanani.
Quichihuas para nochi tanahuatiani ipan taltipacti ma quiimacasica.