80
Netatajtili para Toteco ma quicualtali tali Israel huan imasehualhua
1 ¡Ta cati tiinintamocuitahuijca israelitame huan techyacana quej tielisquíaj timoborregojhua,
techtacaquili!
Ta cati timosehuijtoc tatajco nopa ilhuicac ehuani cati inintoca querubines ilhuicac ehuani,
ximohuijtzoma quentzi huan techtacaquili quema timotatajtíaj.
Xijnexti mohueyi chicahualis huan mohueyitilis cati petani.
2 Xijchihua para nochi tiisraelitame,
hasta nojquiya iniixhuihua Efraín, Benjamín huan Manasés,
ma tiquitaca quenicatza timotananas huan techmanahuis ica mohueyi chicahualis.
3 Toteco Dios, techchihua ma timocuepaca ica ta.
Techtachili ica se moxayac cati senpactoc.
Techicneli huan techmaquixti.
4 TOTECO, ta tiDios Cati Tijpiya Nochi Chicahualisti,
¿hasta quema tamis ticualantos ica tojuanti huan amo tijtacaquilis quema timotatajtíaj?
5 Techmacatoc ma tijcuaca pantzi ica choquisti, huan ma tiquica toixayo.
6 Tijcajtoc ma techpinahualtica nopa talme cati techyahualohuaj huan ma techhuetzquilica tocualancaitacahua.
7 Toteco Dios, ta tiDios Cati Tijpiya Nochi Chicahualisti, xijchihua ma timocuepaca ica ta.
Techtachili ica moxayac cati senpactoc.
Techicneli huan techmaquixti.
8 Techhualicac ten tali Egipto quej tielisquíaj se xocomeca tzonti cati selic.
Tiquinquixti nopa sequinoc masehualme cati amo mitzixmatque huan nopona techtojqui.
9 Tijcualtali nopa tali huan elqui quej tijpixque miyac tonelhuayohua.
Huan tijtemitijque nopa tali.
10 Nopa tepeme tiquintamitzajque ica toecahuil.
Huan tielque quej tiocuame cati huejcapantique cati moaxcahua, Toteco.
11 Tichamanque huan moscaltijque tomacuayohua.
Huan toecahuil tiisraelitame ajsic hasta campa nopa hueyi at cati itoca Mediterráneo huan hasta campa nopa hueyat Éufrates.
12 Huajca ¿para ten ayecmo techmocuitahuía?
Eltoc quej tijtamisosolo itepanyo moxocomeca mil huan tijcahua ma quitamicuaca nochi ojpayani.
13 Inijuanti itztoque quej cuapitzome cati hualahuij huan tapoxoníaj yahualtic ten tojuanti,
huan eltoc quej nopa tecuanime ya techtamicuaj.
14 Yeca Toteco Dios Cati Tijpiya Nochi Chicahualisti timitztajtaníaj,
ximocuepa huan techtiochihua.
Techhualtachili ten nopona ilhuicac,
xiquita quenicatza tiitztoque huan xijmocuitahui ni moxocomecamil.
15 Quena, xijmocuitahui cati ta tijtojqui huan nopa ichamanca cati cuali tijtatzquiltijtoc.
16 Pampa tocualancaitacahua techhuejhuelojtoque huan techtatijtoque.
¡Xiquintzontamilti ica mohueyi cualancayo!
17 Xijmaca chicahualisti nopa telpocat cati tiquicnelía huan tijtapejpenijtoc para tanahuatis.
18 Quej nopa ayecmo quema timitztahuelcahuase.
Techmaca yancuic nemilisti huan sempa timitznotzase huan timotatajtise moixpa ta.
19 Techchihua ma timocuepaca sempa ica ta, TOTECO,
ta tiDios Cati Tijpiya Nochi Chicahualisti.
Sempa techtachili ica se moxayac cati senpactoc.
San ica ta motapalehuil timomaquixtise ten tocualancaitacahua.