3
TOTECO quinojnotzqui Samuel
1 Huan nopa piloquichpiltzi Samuel quipalehuiyaya Elí huan quej nopa quitequipanohuayaya TOTECO. Huan ipan nopa tonali TOTECO amo más quinnojnotzayaya masehualme para quinilhuis se camanali. Amo talojtzitzi quincamanalhuiyaya quej achtohuiya.
2 Huan Elí ya eliyaya nelhuehuentzi huan ya popoyotiyaya. Huan se tonali Elí mosiyajquetztoya ipan ichaj,
3 huan Samuel cochtoya ipan itiopa TOTECO campa icaxa Toteco Dios. Huan tajco yohual quema nopa taahuili cati tiopan calijtic noja taahuijtoya,
4 TOTECO quinojnotzqui Samuel:
―¡Samuel!
Huan Samuel tananquili:
―Nica niitztoc.
5 Huan nimantzi mijquejqui huan yajqui quiitato Elí huan quiilhui:
―Nica niitztoc. ¿Para ten technotztoc?
Huan Elí quinanquili:
―Na amo nimitznotztoc. Xiya ximotecati sempa.
Huajca Samuel sempa motecato.
6 Huan TOTECO sempayano quinojnotzqui huan quiijto:
―¡Samuel!
Huan Samuel sempa yajqui quiitato Elí huan quiilhui:
―Nica niitztoc. ¿Para ten technotztoc?
Huajca Elí quinanquili:
―Na amo nimitznotztoc. Xiya ximotecati sempa.
7 Huan Samuel ayemo quiixmatiyaya TOTECO pampa amo quema quinojnotztoya.
8 Huan TOTECO sempa quinojnotzqui Samuel ica expa, huan Samuel sempa yajqui quiitato Elí huan quiilhui:
―Nica niitztoc. ¿Taya tijnequi ma nijchihua?
Huajca Elí quimachili para eliyaya TOTECO cati quinojnotzayaya Samuel,
9 huajca quiilhui:
―Xiya huan ximoteca. Huan sinta sempa mitznojnotzas, huajca xiquijto: ‘TOTECO, techilhui taya tijnequi pampa nimotequipanojca huan nimitzcactoc.’
Huajca quej nopa Samuel yajqui huan motejqui sempa.
10 Huan TOTECO hualajqui sempa, huan moquetzqui nopona huan quinojnotzqui quej achtohuiya. Huan quiilhui:
―¡Samuel, Samuel!
Huajca Samuel quinanquili:
―TOTECO, techilhui taya tijnequi pampa nimotequipanojca huan nimitzcactoc.
11 Huajca TOTECO quiilhui Samuel:
―Xiquita, nijchihuas se tamanti ipan tali Israel, huan cati quicaquis hasta itacaquilis quicocos.
12 Nijchihuas nochi tamanti fiero cati niquilhuijtoc Elí para nijchihuas ica ichaj ehuani.
13 Niquilhuijtoc para niquintatzacuiltis nochi ichaj ehuani para nochipa por inintajtacol itelpocahua cati ya quimati. Itelpocahua techahuilmajtoque huan yaya amo quintacahualtijtoc.
14 Huan ya niquilhuijtoc Elí para amo quema niquintapojpolhuilis nopa tajtacoli cati quichijtoque masque techmacase miyac tacajcahualisti o ofrendas para ma nimoyoltali.
15 Teipa Samuel motejqui sempa hasta tanesqui. Huan huajca mijquejqui huan caltapo ipan tiopamit quej momajtoya quichihua nochipa, pero majmahuiyaya quipohuilis Elí cati TOTECO quiilhuijtoya.
16 Pero Elí quinotzqui huan quiilhui:
―¡Nocone, Samuel!
Huajca Samuel quinanquili:
―Nica niitztoc.
17 Huajca Elí quiilhui:
―¿Taya mitzilhuijtoc Toteco Dios? Nimitztajtanía para amo techtatili yon se teno cati TOTECO mitzilhuijtoc. Sinta techtatilis se tenijqui, ma TOTECO mitztatzacuilti.
18 Huajca Samuel quiilhui Elí nochi cati TOTECO quiilhuijtoya huan amo teno quitatili. Huajca Elí quiilhui:
―Yaya TOTECO cati mitznojnotztoc. Ma quichihua cati yaya quiita para cuali quichihuas.
19 Huan Samuel moscaltijtiyajqui huan TOTECO itztoya ihuaya huan quipalehuiyaya. Huan mochijqui nochi nopa camanali cati TOTECO quiilhuijtiyajqui Samuel para teyolmelahuas.
20 Huan nochi israelitame ten tali Dan ica huejcapa huan hasta altepet Beerseba ica tatzinta quimatque para nelía Samuel eliyaya se itajtolpanextijca TOTECO cati itztoc xitahuac.
21 Huan TOTECO monextijtinenqui iixpa Samuel ipan altepet Silo para ma quiixmati. Huan quimacayaya camanali para teyolmelahuas.