10
Jesús quinnextililo ica in mosihuacahualistli
1 Jesús oquixohuac de ompa huan ohuilohuac ipan in tlali Judea huan ic oc se lado den atentli itoca Jordán. Huan oc sepa oyahque teitahque miyac tlacatl, huan oquinnextililoc quen nochipa.
2 Huan sequin fariseos oteahsitohque in Jesús, huan oquitemohque ica tlen cuali teteluisque, huan otetlahtlanihque:
―¿Tlen tiquihtos; quicahuilihtoque in tlacatl quicahuas isihuau?
3 Yehhuatzin oquinnanquililoc:
―Tel, ¿tlen omechtequiuti itlahcuilol in Moisés?
4 Yehhuan otenanquilihque:
―Moisés oquincahuili maquimaca in sihuatl in amatl den mosihuacahualistli huan ijcon quicahuas.
5 Jesús oquinnanquililoc:
―Moisés omechihcuilui inon tlanahuatili tleca tepitzautoc namoyolo.
6 Huan ahmo ijcon omonec in Dios queman omochiu in tlalticpactli huan omochiu in tlacatl huan in sihuatl.
7 Omonec in tlacatl maquicahua itata huan inana huan mamosechihua ihuan isihuau.
8 Huan in ome mochihuasque san seya. Ijcon ayacmo ome, omochiuque san seya.
9 Ic inon in tlen Dios omosechiu, ahmo aquin maquinxelo.
10 Satepa ihtech in cali in tetlamachticahuan otetlahtlanihque oc sepa ica inon tlahtoli.
11 Huan Yehhuatzin oquiniluiloc:
―In aquin quicahuas isihuau huan motlalis ihuan oc se sihuatl, oquiahuilti isihuau.
12 Huan tla in sihuatl quicahuas inamic huan motlalis ihuan oc seya, oquiahuilti itlacau.
Jesús quintiochihualo nochten in conemen
13 Huan oteixpantilihque in conemen maquinmachililo in Jesús ica teman, huan in tetlamachticahuan oquintlacahualtihque in aquin otehualiquilihque.
14 Queman Jesús oquinitaloc, ocualanohuac huan oquiniluiloc:
―Xiquincahuacan in conemen mahualacan nechahsican huan ahmo xiquintzacuilican, tleca ipan tetlatequiutilistzin Dios nochin quineltocahque quen inin conemen.
15 Ic nele namechiluiya, in aquin ahmo quineltocas quen se conetl ahhuel calaquis ipan tetlatequiutilistzin Dios.
16 Huan Jesús oquinnapaloloc huan oquiniluiloc:
―Mamechuelitalo Tohueyitahtzin.
In telpochtli rico
17 Ihcuac inon Jesús omoan in ohtli, huan se telpochtli ohualtzecuintaya huan oteixnamic. Huan omotlancuaquetz teixpa, huan oteiluic:
―Cuali tlamachtiyani, tel, ¿tlen nicpiya nicchihuas ic nicahsis nochipa nemilistli?
18 Jesús omonanquilic:
―¿Tleca tinechiluiya nicuali tlacatl? Niyan aquin oncan nele cuali, tlahmo san Yehhuatzin in Dios.
19 Tiquixmati in tlanahuatilten: “Ahmo xitemicti, ahmo xisihuaahuilti, ahmo xitlachtequi, ahmo xitlatenehua, ahmo xitlacahcayahua, huan xiquinmahuestili motata huan monana.”
20 Huan inon telpochtli otenanquilic:
―Tlamachtiyani, nochin inon nictlacamautoc de ihcuac niquitzinin.
21 Jesús oquiyolitaloc huan omotlasohtlac. Huan omoluic:
―Se tlamantli mitzpolohua. Xiyau, xicnemaca tlen ticpixtoc huan xiquintlocoli in prohues. Tla ticchihuas inon ticpiyas motlatlan neluicac. Huan xihuala huan xinechcuitlapanui.
22 Queman oquicac inon tlahtoli, yehhua omoixtocac, huan oya tlocoxtiu tleca quipixtoc miyac tlen iyaxca huan ahmo oquinec temactis.
23 Ihcuac inon Jesús omoixitaque in tetlamachticahuan huan oquiniluiloc:
―Tlahuel tequiyo ic calaquis in rico ipan tetlatequiutilistzin Dios.
24 In tetlamachticahuan quen tel oquimauteuque ica inon tlahtoli, huan Jesús oc sepa oquiniluiloc:
―Nocnihuan, tlahuel tequiyo ic calaquisque ipan tetlatequiutilistzin Dios in aquin quichihuahque cuenta ica in ricohyo.
25 Ahhuel panos in hueyi yolcatl itoca camello ihtech in itlacoyoc in acoxa. Masque in tla cuali, molui tequiyo yesquiyani. Huan ocachi tequiyo calaquis in rico ipan tetlatequiutilistzin Dios.
26 Ic oquicajque inon, ocachi quen tel quimauteuque huan omotlahtlanihque ic yehhuan:
―Tel, ¿aquin cuali maquisas?
27 In Jesús oquintlachiyaliloc huan oquiniluiloc:
―In tlacatl isel ahhuel, huan ica in Dios cuali, tleca nochin tlamantli cuali mochihua in Dios.
28 In Pedro oteiluic:
―Mamota, tehhuan oticauque nochin tlen oticpiyayahque huan axan titecuitlapanuihtinemihque.
29 Jesús omihto:
―Ic nele namechiluiya, in aquin oquicau ichan, noso icnihuan, noso inana, noso itata, noso conemen, noso itlaluan nopampa huan ipampa in cuali itlahtoltzin Dios, yehhua quiselis itlaxtlahuil ipan inin nemilistli.
30 Quiselis se ciento ocachi den calten, huan icnihuan, huan inanahhuan, huan conemen, huan in tlali, huan nochipa ica in tlamohsihuilistli. Huan ipan in yancuic tlalticpactli quiahsis in nemilistli nochipa.
31 Huan miyacten aquin nesi hueyi nican tlalticpac ahmo yes hueyi ipan tetlatequiutilistzin Dios. Huan in aquin ahmo hueyi axan ompayes hueyi.
Ic yexpa in Jesús mihtohua quen micohuas
32 Ohuihhuilohuataya ipan ohtli Jerusalén, huan Jesús quinyecanalotiu in tetlamachticahuan. Huan yehhuan quen tel oquimauteuque tleca ahmo momoutilos ic tlehcolos ompa. Huan in oc sequin tlacamen otemoucacuitlapanuihque. Oncan Jesús oquinnotzaloc oc secnin in mahtlactli huan ome huan opehualoc quiniluiloc tlen tepanotiu.
33 Oquiniluiloc:
―Xiquitacan, titlehcohuahque Jerusalén, huan ompa tlatemactili yes nehhuatl aquin Nitetiachicau ica nochin tlacatl inmajco in achtohque tiopixcamen huan in tlamachtiyanimen den itlanahuatil in Moisés. Huan nechtlahtlacoltisque manimiqui huan nechtemactisque inmajco in tequihuahmen romanohteco.
34 Yehhuan nechtlayehyecaluisque, huan nechixchihchahuisque, huan nechuihhuitequisque huan nechmictisque. Huan ipan yiyi tonali niihsas.
In Jacobo huan Juan omotlatlautihque ica tlen oquinejque
35 In Jacobo huan in Juan, ipiluan in Zebedeo, omopachohque tenahuac in Jesús huan oteiluihque:
―Tlamachtiyani, ticnequihque matechchihuililo tlen titetlahtlanisque.
36 Huan Jesús oquintlahtlaniloc:
―¿Tlen nanquinequihque namechchihuilis?
37 Yehhuan otenanquilihque:
―Techcahuililos timotlalisque seya ic teyejcan huan oc seya ic oc se lado queman mochihualo hueyixtoc.
38 Huan Jesús oquiniluiloc:
―Ahmo nanquinehnehuiliyahque tlen nannechtlahtlaniliyahque. Tel, ¿cuali nanquixicosque tla nantlapanosque quen nehhuatl nitlapanos?
39 Yehhuan otenanquilihque:
―Tehhuan cuali.
Oncan Jesús oquiniluiloc:
―Ic nele, ic inon tlen nitlapanos, namehhuan nanquixicosque noyojqui.
40 Huan neh ahhuel niquihtos aquin motlalis nonahuac. Yimoluihtoc in Dios aquin motlalis ompa.
41 Queman in oc mahtlactli tetlamachticahuan oquicajque inon, ocualanque ica in Jacobo huan Juan.
42 Huan Jesús oquiniluiloc:
―Quen nanquimatihque namehhuan, yehhuan aquin quintequiutiyahque in tlacamen den tlalticpac mohueyiliyahque ica yehhuan.
43 Huan ahmo ojcon yesquiyanihque ica namehhuan.
44 In aquin de namehhuan quinequi mochihuas in achto quipiya tlen san quimpalehuis nochten.
45 Tleca nehhuatl aquin Nitetiachicau ica nochin tlacatl ahmo onihuala ic nechpalehuisque, tlahmo ic nitlapalehuis huan ic nictemactis nonemilis ic niquinmaquixtis miyacten.
Jesús mopahtiya in Bartimeo in ixpatzac
46 Oahxihuato Jesús inuan in tetlamachticahuan ipan in altepetl Jericó. Huan oquixohuataya de inon altepetl inuan in tetlamachticahuan huan miyac tlacamen. Huan ihcuac se ixpatzac itoca Bartimeo iconeu Timeo oyehuatoya itentla in ohtli, quitlahtlanticatca limosna.
47 Queman oquimat omahsitaya in Jesús tealtepeu Nazaret, opeu tetzatziliya:
―¡Ixuiu in David, noca xitlocoya!
48 Miyacten oquiahhuaque ic mamocahua, huan yehhuatl ocachi otenotz:
―¡Ixuiu in David, noca xitlocoya!
49 Jesús omoquetzaloc huan oquintequiutiloc:
―Xinechanilican.
Huan oquinotzque huan oquiluihque:
―Ximoyolchicahua huan ximoquetza. Mitznotzalo.
50 Yehhuatl oquitohuetzoc ipampijca huan ohualtzecuin tenahuac in Jesús.
51 Huan Jesús oquitlahtlaniloc:
―¿Tlen ticnequi manimitzchihuili?
Huan in ixpatzac oquiteluic:
―Neh nicnequi nitlachiyas.
52 Huan Jesús oquiluiloc:
―Yixiyau, yotiteneltocac huan ic inon yomitzpahtiloc.
Huan niman otlachix, huan otecuitlapanuic in Jesús.