15
ໄລ່ ກາ ເຣືາບ ຊັນຕຣັ່ນ ແຣັ່ງ ລ່ຳ ຍ່ອງ ມວຍ ເພງ
1 ແວັດ ກັອຍ, ເກົາ ເຮີມ ມວຍ ຣາມຶ່ຮ ຕຶ່ງ ມັນລັ່ອງ, ປື່ດ ລາລື່ ກະ ຄານະ ລາລື່. ເບີນ ຕາປູ່ລ ນະ ເທວາດາ, ໄລ່ ຕາລາ ຕາປູ່ລ ຣາມຶ່ຮ ຕຸ່ຮ ກັ່ດ ປັຣຊົດ ເລີ່ຍ. ຍ່ອນ ແວັດ ມັຮ ຕຸ່ຮ ກັ່ດ ກັອຍ, ເຢືາງ ເຈົາຣາຊີ ຕາ ເບີນ ຊັອງ ອຶງຄື່ນ ນັ່ອງ.
2 ເກົາ ເຮີມ ນ່ະ ແດີອ໌ ທາເລ ຕະ ແຕ ຊັຣລັ່ງ ກັຣຈຸ ກະ ອູ່ຍຮ. ກະ ເບີນ ກວາຍ ຕາຢຶ່ງ ລຍາບ ປຶ່ຮ ແດີອ໌ ທາເລ ກັອຍ. ກວາຍ ກັອຍ ລາ ໄລ່ ກາ ຣາຊູ່ ເຣືາບ ຊັນຕຣັ່ນ ແຣັ່ງ ກະ ຣູ່ບ ອັນ, ກະ ໄລ່ ຕາ ເບີນ ປຣ່ອມ ເບີນ ເບີ ກາ ເຕ່ນ ຣາມຶ່ຮ ອັນ. ໄລ່ ຕາຢຶ່ງ ລຍາບ ປຶ່ຮ ແດີອ໌ ທາເລ, ກະ ໄລ່ ຢຸມ ພີນ ມັຮ ກາ ເຢືາງ ເຈົາຣາຊີ ໂອນ ໄລ່.
3 ໄລ່ ລ່ຳ ຍ່ອງ ມວຍ ເພງ ກາ ໂມເຊ, ອັນ ກາ ຕະ ຣານະ ເຢືາງ ເຈົາຣາຊີ ຄຽນ ໂອນ ໄລ່, ກະ ມວຍ ເພງ ກາ ແກະ ກອນ ໂອນ ໄລ່ ລ່ຳ ຍ່ອງ ນ່ະໄນ່:
"ອຶນເຈົາ ຮິ ເອີຍ! ເຍືາ ລາ ເຢືາງ ເຈົາຣາຊີ,
ອັນ ກາ ຊົດ ອຶນແຍ່ະ!
ຣານະ ເຍືາ ຕະ ລາ ປື່ດ
ກະ ຕາ ເກີ່ຍ ເຮີມ ລາລື່.
ເຍືາ ລາ ເຕືາວ ປັຣເຍືາ ກາ ຊົດ ກູ່ ກຣວາງ ກວາຍ.
ຣານະ ເຍືາ ລາ ຕານັ່ອງ ກະ ປຍາຍ໌ ເລືອຍໆ.
4 ເອີ ອຶນເຈົາ ເອີຍ! ຕາ ເບີນ ເນົ່າ ກາ ຕາ ເບີນ ຢຳນັ່ບ ເຍືາ.
ກະ ຕາ ເບີນ ເນົ່າ ກາ ຕາ ເບີນ ຍ່ອງ ເຍືາ.
ແອີງ ເຍືາ ແຕິ່ ກາ ຕາ ເບີນ ໂລ່ຍຮ ອຶນເຕົ່າ.
ປັຣແນີ ມັນເຕຣືາ ກູ່ ກຣວາງ ກວາຍ ແຕີ່ອ໌ ຊາງ ຢັ່ຮ ເມືາງ ເຍືາ,
ຍ່ອນ ໄລ່ ເບີນ ເຮີມ ຣານະ ເຍືາ ຕະ
ລາ ຕານັ່ອງ ອໍ ເລືອຍໆ."
ຕາປູ່ລ ຕາງານ ຕຸ່ຮ ກັ່ດ ລາລື່
5 ແວັດ ກັອຍ ເກົາ ເນ່, ເຈີ່ ເກົາ ເຮີມ ຕຶ່ງ ມັນລັ່ອງ ເນົ່າ ເປິຮ ດຸງ ຊາງ ປື່ດ ເຢືາງ ເຈົາຣາຊີ, ລາ ອຶນຕຸ ເຢືາງ ເຈົາຣາຊີ ແອີດ.
6 ໄລ່ ຕາປູ່ລ ນະ ເທວາດາ ກາ ເບີນ ຕາປູ່ລ ຣາມຶ່ຮ ຕຸ່ຮ ກັ່ດ ປັຣຊົດ, ໄລ່ ລັ່ອຮ ແຕ ດຸງ ຊາງ ກັອຍ. ໄລ່ ແຊິບ ເກຣີ່ງ ເນົ່າ ຕະ ແຕ ອາຣິ ກຼໍອ໌ ບຣັຮ ອໍ ລາລື່, ກະ ໄລ່ ກາຕັ່ນ ກັນຕັ່ນ ແຢງ ຕຶ່ງ ອາເປີ່ມ ໄລ່.
7 ເຈີ່ ມານຳ ແຕ ປູນ ລຳ ຊັນຕຣັ່ນ ກັອຍ, ອັນ ມ່ອບ ໂອນ ຕາປູ່ລ ເທວາດາ ກັອຍ ມານະ ມວຍ ຕາງານ ແຢງ. ຕາປູ່ລ ຕາງານ ກັອຍ ລາ ປັ່ນ ຣາມຶ່ຮ ຕຸ່ຮ ກັ່ດ ລາລື່ ແຕ ເຢືາງ ເຈົາຣາຊີ, ອັນ ກາ ອາມົ່ງ ຊົດ ແດີຍ, ອີ ຕະ ໂຕ່ດ ກວາຍ.
8 ເຈີ່ ປັຣນາຍ ຍ່ອງ ເຢືາງ ເຈົາຣາຊີ ກະ ອຳນາດ ເຢືາງ ເຈົາຣາຊີ ປຼັຮ ອຶນແຍ່ະ ຕຶ່ງ ດຸງ ຊາງ ປື່ດ ເຢືາງ ເຈົາຣາຊີ ນ່ະ ປາຮຍາອ໌. ນ່ະກັອຍ ຕາ ເບີນ ເນົ່າ ເຕ່ອ໌ ມູ່ດ ຕຶ່ງ ດຸງ ຊາງ ກັອຍ ຈົນ ແວັດ ຕາປູ່ລ ຣາມຶ່ຮ ຕຸ່ຮ ກັ່ດ ກາ ແຕີ່ອ໌ ແຕ ອາຕີ ຕາປູ່ລ ນະ ເທວາດາ.