32
1 “Lalelani, we mazulu, ngizakhuluma,
zwana, we mhlaba, amazwi omlomo wami.
2 Akuthi imfundiso yami inethe njengezulu
kuthi amazwi ami ehle njengamazolo,
njengemifefezo etshanini obutsha,
njengezulu elinengi phezu kwamahlumela.
3 Ngizaliphakamisa ibizo likaThixo.
Yebo dumisani ubukhulu bukaNkulunkulu wethu!
4 UliDwala, imisebenzi yakhe iphelele,
njalo zonke izindlela zakhe zilungile.
UNkulunkulu othembekileyo ongenzi okubi,
uqotho njalo ulungile yena.
5 Sebenze okubi phambi kwakhe;
balihlazo kabase bantwabakhe,
kodwa isizukulwane esixhwalileyo lesingaqondanga.
6 Yiyonale na indlela yokubonga kwenu uThixo,
lina ziwula zabantu abangelakuhlakanipha?
KasuYihlo, uMdali wenu,
owalenzayo njalo owalibumbayo na?
7 Khumbulani insuku zakudala;
likhumbule izizukulwane zasendulo.
Buza uyihlo yena uzakutshela,
abadala benu, njalo bazakuchasisela.
8 Kwathi oPhezukonke esephe izizwe ilifa lazo,
eselwahlukanisile uluntu,
walufakela imingcele,
kusiya ngenani lamadodana ka-Israyeli.
9 Ngoba isabelo sikaThixo ngabantu bakhe,
uJakhobe yisabelo sakhe esikhethiweyo.
10 Wamfica elizweni eliyinkangala,
indawo engatheli lutho njalo elodlame.
Wamvikela, wamonga;
wamsingatha njengegugu lakhe,
11 njengokhozi lunyakazisa isidleke salo,
beselundiza phezu kwamachwane alo,
lwelule amaphiko alo ukuwagola,
luwathwale ngamaphiko alo.
12 Nguye yedwa uThixo owamkhokhelayo;
kungekho unkulunkulu wezizweni owayelaye.
13 Wamkhweza engqongeni yelizwe
wamondla ngezithelo zeganga.
Wamondla ngoluju olwaluvela edwaleni,
langamafutha aphuma ezingoxweni zeliwa,
14 lezankefu langochago oluvela emihlambini yenkomo leyezimvu;
lamazinyane anonisiweyo ezimvu lembuzi,
lenqama zekhethelo zaseBhashani,
kanye lengqoloyi elezinhlamvu ezinhle.
Wanatha igazi eliphuphumayo lesithelo samavini.
15 UJeshuruni wazimuka watshakala;
esesuthi ukudla, wakhuluphala waba butshelezi.
Wamlahla uNkulunkulu owamdalayo
waliphika iDwala uMsindisi wakhe.
16 Bambangela ubukhwele ngabonkulunkulu babo bezizweni
bamthukuthelisa ngezithombe zabo ezinengekayo.
17 Benza imihlatshelo kuwo amadimoni, wona angasiNkulunkulu,
onkulunkulu ababengazange babazi,
onkulunkulu ababesanda kuvela,
onkulunkulu ababengakhonzwa ngoyihlo.
18 Walihlamukela iDwala, elinguyihlo;
wakhohlwa uNkulunkulu owakuzalayo.
19 UThixo wakubona lokhu wabafulathela
ngoba wathukutheliswa ngamadodana lamadodakazi akhe.
20 ‘Ngizabufihla ubuso bami kubo,’ watsho uThixo,
‘ngize ngibone ukuthi bazaphetha ngani;
ngoba bayisizukulwana esixhwalileyo
abantwana abangathembekanga.
21 Bangenza ngaba lobukhwele ngalokho okwakungasinkulunkulu
njalo bangithukuthelisa ngezithombe zabo ezingasizi lutho.
Ngizabavusela umhawu ngesizwe esingesibantu balutho;
ngibazondise ngesizwe esingazwisisiyo.
22 Ngoba umlilo usulunyathiswe yikuthukuthela kwami,
wona otshisa ujule uze uyethinta ukufa ngaphansi.
Uzahangula udle umhlaba kanye lesivuno sawo
uthungele lezinsika zezintaba.
23 Ngizabehlisela izigigaba,
imitshoko yami iphelele phezu kwabo.
24 Ngizabathumela inkengane eqeda amandla,
izifo ezibhubhisayo lomkhuhlane otshabalalisayo;
ngizabathumela amazinyo abukhali ezinyamazana zeganga,
ubuthi bezinhlangwana ezihuquzelayo emhlabathini.
25 Ezindleleni inkemba izabaswelisa abantwana,
emizini kuzabusa uchuku.
Amadodana lamadodakazi azabhujiswa aphele,
abantwana abancinyane kanye lamadoda alenwele ezimhlophe.
26 Ngithe ngizabachitha
ngisuse imbali yabo bakhohlakale emhlabeni,
27 kodwa ngesaba ukweyisa kwesitha,
funa isitha singezwisisi
besesisithi, “Isandla sethu sinqobile,
njalo uThixo kakwenzanga konke lokhu.” ’
28 Bayisizwe esingelangqondo,
akukho ukuqedisisa kubo.
29 Ngabe kodwa bahlakaniphile njalo bezwisise lokhu,
babe lokuqedisisa ukuthi sizakuba yini isiphetho sabo!
30 Kungenzeka njani ukuthi umuntu oyedwa axotshane lenkulungwane,
loba ababili basukele izinkulungwane ezilitshumi zibaleke na,
ngaphandle kokuthi iDwala labo nxa labathengisa;
langaphandle kokuthi uThixo wabo esebahlanekele?
31 Ngoba elabo idwala alinjengelethu iDwala,
njengoba lezitha zethu zivuma.
32 Iwayini labo livela esivinini saseSodoma
lasemasimini aseGomora.
Amagrebisi abo agcwele itshefu,
lamaxha awo amunyu.
33 Iwayini labo liyibuthi bezinyoka,
ubuhlungu obubulalayo bezinhlangwana.
34 ‘Kambe lokhu angikugodlanga na
ngakugcikela eziphaleni zami na?
35 Ukuphindisela ngokwami; ngizabuyisela.
Ngesikhathi esifaneleyo unyawo lwabo luzatshelela;
usuku lwabo lokubhujiswa luseduze,
ukuchitheka kwabo kubalanda ngesiqubu.’
36 UThixo uzakwahlulela abantu bakhe,
abe lozwelo ezincekwini zakhe
lapho esebona amandla abo ephela
njalo kakho ozasala, isigqili loba okhululekileyo.
37 Uzakuthi: ‘Kanti bangaphi onkulunkulu babo,
lelodwala ababephephela kulo,
38 onkulunkulu abadla amafutha emihlatshelo yabo
njalo banatha iwayini elingumnikelo wokunathwayo kwabo?
Kabaphakame balincedise!
Kabaliphe umthunzi wokuphephela!
39 Angithi liyazibonela ukuthi Mina ngiNguye!
Kakho omunye unkulunkulu ngaphandle kwami.
Ngiyabhubhisa njalo ngiyaphilisa.
Ngilimazile njalo ngizelapha,
kakho ongaphunyuka esandleni sami.
40 Ngiphakamisela isandla sami ezulwini ngithi:
Njengoba ngeqiniso ngiphila nini lanini,
41 nxa ngilola inkemba yami ephazimayo
lesandla sami siyibamba ekwehluleleni,
ngizaphindisela kuzozonke izitha zami,
ngiphindisele kulabo abangizondayo.
42 Imitshoko yami izagava igazi,
kanti inkemba izakudla enyameni:
igazi lalabo ababulawayo labathunjwayo,
amakhanda alabo abangabakhokheli bezitha.’
43 Jabulani, lina zizwe, kanye labantu bakhe,
ngoba uzaphindisela igazi lezinceku zakhe,
uzaphindisela ezitheni zakhe,
njalo enzele ilizwe lakhe labantu bakhe indlela yokubuyisana.”
44 UMosi weza loJoshuwa indodana kaNuni wethula wonke amazwi engoma le abantu bonke besizwa.
45 UMosi wathi eqeda ukuwethula lamazwi phambi kwabo bonke abako-Israyeli,
46 wathi kubo, “Alondolozeni ezinhliziyweni zenu wonke lamazwi engiwethule phambi kwenu ngesifungo lamuhla, ukuze libe lakho ukubalaya abantwabenu ukuba bawalalele ngonanzelelo amazwi alo umthetho.
47 Akusimazwi alula nje kini, ayikuphila kwenu. Ngala amazwi lizaphila isikhathi eside elizweni eselingena kulo lichapha uJodani ukuba lilithathe libe ngelenu.”
UMosi Uzafela Entabeni YaseNebho
48 Ngalolosuku uThixo watshela uMosi wathi,
49 “Khwela uye okhahlamba lwezintaba zase-Abharimi eNtabeni yaseNebho kwelamaMowabi, ngaphetsheya kweJerikho, ukuze ubone iKhenani, ilizwe engilinika abako-Israyeli ukuba balithathe libe ngelabo.
50 Phezu kwaleyontaba okhwele phezu kwayo uzakufa umbelwe uye kubokhokho bakho njengoba u-Aroni laye wafela entabeni yaseHori wembelwa kwabakibo.
51 Lokhu kungenxa yokuthi lina lobabili lalahla ithemba lenu kimi phambi kwabako-Israyeli emachibini aseMeribha Khadeshi, eNkangala yaseZini langenxa yokuthi alizange lime ngobungcwele bami phambi kwabako-Israyeli.
52 Ngenxa yalokho, ilizwe uzalibonela kude, awusoze ungene elizweni esengilinika abako-Israyeli ukuba bangene kulo.”