6
Ukuthunywa Kuka-Isaya
1 Ngomnyaka inkosi u-Uziya eyafa ngawo, ngabona uThixo ehlezi esihlalweni sobukhosi esiphezulu esiphakemeyo, injobo yesembatho sakhe igcwele ithempeli.
2 Ngaphezu kwakhe kwakulamaserafimu, elinye lelinye lilempiko eziyisithupha. Ayegubuzele ubuso bawo ngezimpiko ezimbili, egubuzele inyawo zawo ngezimbili, ephapha ngezimbili.
3 Elinye lamemezela kwelinye lisithi:
“Ungcwele, ungcwele, ungcwele uThixo uSomandla,
umhlaba wonke ugcwele inkazimulo yakhe.”
4 Ekuzwakaleni kwamazwi awo imigubazi lombundu kwanyikinyeka, kwathi ithempeli lagcwala intuthu.
5 Mina ngakhala ngathi, “Maye mina! Sengibhujisiwe! Ngoba ngingumuntu olezindebe ezingcolileyo, njalo ngihlala phakathi kwabantu abalezindebe ezingcolileyo, lamehlo ami asebone iNkosi, uThixo uSomandla.”
6 Lapho-ke elinye lamaserafimu laphaphela kimi liphethe ilahle elivuthayo esandleni salo elalilithethe ngodlawu e-alithareni.
7 Lathinta umlomo wami ngalo lathi, “Khangela, lokhu sekuthinte izindebe zakho; icala lakho selisusiwe, njalo lesono sakho sesihlawulelwe.”
8 Ngasengisizwa ilizwi leNkosi lisithi, “Ngizathuma bani na? Ngubani na ozasihambela?”
Mina ngathi, “Ngilapha. Ngithuma!”
9 Yasisithi, “Hamba uyetshela abantu uthi:
‘Zwanini kokuphela, kodwa lingaqedisisi;
libone kokuphela, kodwa lingabonisisi.’
10 Yenza inhliziyo yalababantu ibe lukhuni;
wenze indlebe zabo zibe buthundu,
uvale amehlo abo.
Hlezi babone ngamehlo abo,
bezwe ngezindlebe zabo,
baqedisise ngezinhliziyo zabo,
baphenduke basiliswe.”
11 Ngasengisithi, “Koze kube nini, Nkosi?”
Yona yaphendula yathi:
“Amadolobho aze achitheke
njalo kungaselabantu kuwo,
izindlu zize zisale zingaselabantu,
lamasimu ephundleke abhuquzeka,
12 uThixo aze axotshele umuntu wonke khatshana
njalo ilizwe lidelwe ngokupheleleyo.
13 Lanxa ingxenye eyodwa etshumini isala elizweni
izachithwa futhi.
Kodwa njengezihlahla zetherebhinti lemi-okhi
zitshiya izidindi lapho seziganyulwe,
ngokunjalo inhlanyelo engcwele izakuba yisidindi elizweni.”