60
Inkazimulo YaseZiyoni
1 “Vuka, khazimula, ngoba ukukhanya kwakho sekufikile,
lenkazimulo kaThixo iyavela phezu kwakho.
2 Khangela, umnyama wembese umhlaba,
umnyama omkhulu usibekele abantu.
Kodwa uThixo uyakhanya phezu kwakho
lenkazimulo yakhe iyabonakala phezu kwakho.
3 Izizwe zizakuza ekukhanyeni kwakho,
lamakhosi alande ukuqhama kokusa kwakho.
4 Phakamisa amehlo akho ukhangele amacele akho wonke:
bonke babuthana beze kuwe;
amadodana akho avela khatshana,
lamadodakazi akho athwelwe ngengalo.
5 Ngakho uzakhangela ubobotheke ngokujabula,
inhliziyo yakho izatshaya ikhukhumale ngenxa yentokozo;
inotho yasolwandle izalethwa kuwe,
lenotho yezizwe izakuza kuwe.
6 Imihlambi yamakamela izagcwala elizweni lakho,
amakamela asakhulayo aseMidiyani lase-Efa.
Wonke avela eShebha azakuza
ethwele igolide lempepha
ememezela udumo lukaThixo.
7 Yonke imihlambi yaseKhedari izabuthelwa kuwe;
inqama zaseNebhayothi zizakusiza;
zizakwamukeleka njengeminikelo e-alithareni lami,
njalo ngizahlobisa ithempeli lami elilodumo.
8 Ngobani laba abandiza njengamayezi
lanjengamajuba esiya ezidlekeni zawo na?
9 Ngeqiniso izihlenge zithembe mina;
ekhokheleyo yimikhumbi yaseThashishi,
iletha amadodana akho avela khatshana,
lesiliva sawo kanye legolide
ukuba kudunyiswe uThixo uNkulunkulu wakho,
oNgcwele ka-Israyeli,
ngoba ukunike inkazimulo.
10 Abezizwe bazayakha futhi imiduli yakho,
lamakhosi abo azakukhonza.
Lanxa ekuthukutheleni kwami ngakutshaya,
kodwa ngomusa wami ngizakuba lesihawu kuwe.
11 Amasango akho azahlala evulekile;
kawayikuvalwa emini loba ebusuku
ukuze abantu bakulethele inotho yezizwe,
amakhosi azo ekhokhelwe ludwendwe lokunqoba.
12 Ngoba isizwe kumbe umbuso ongayikukukhonza uzatshabalala;
uzachitheka uphele nya.
13 Udumo lwaseLebhanoni luzakuza kuwe;
zonke izihlahla ezamaphayini, umfiri lomsiphresi,
ukuzehlobisa indlu yami engcwele;
lendawo yezinyawo zami ngizayenza ikhazimule.
14 Amadodana abancindezeli bakho
azakuza akhothame phambi kwakho;
bonke abakweyisayo
bazakhothamela phansi ezinyaweni zakho,
njalo bazakubiza ngokuthi iDolobho likaThixo,
iZiyoni yakhe oNgcwele ka-Israyeli.
15 Lanxa ubulahliwe, uzondakala,
kungekho ohamba edabula phakathi kwakho,
ngizakwenza ube ligugu elingapheliyo,
uthokozise izizukulwane zonke.
16 Uzanatha uchago lwezizwe,
umunyiswe emabeleni asesikhosini.
Lapho-ke uzakwazi ukuthi nginguThixo, uMsilisi wakho,
uMhlengi wakho, uMninimandla kaJakhobe.
17 Esikhundleni sethusi ngizakulethela igolide,
lesiliva esikhundleni sensimbi.
Esikhundleni sezigodo ngizakulethela ithusi,
lensimbi esikhundleni samatshe.
Ngizakwenza ukuthula kube ngumbusi wakho,
lokulunga kube yinkosi yakho.
18 Akusayikuba lodlakela elizweni lakho,
akusayikuba khona ukuchitheka
loba ukutshabalala phakathi kwelizwe lakini,
kodwa uzakuthi imiduli yakho yiNsindiso,
lamasango akho uthi yiNdumiso.
19 Ilanga kalisayikuba yikukhanya kwakho emini
loba ukukhanya kwenyanga kukukhanyise,
ngoba uThixo uzakuba yikukhanya kwakho okungapheliyo,
loNkulunkulu wakho abe yinkazimulo yakho.
20 Ilanga lakho kaliyikutshona futhi,
lenyanga yakho ayisayikufiphala njalo.
UThixo uzakuba yikukhanya kwakho okungapheliyo,
lezinsuku zakho zezinsizi zizaphela.
21 Lapho-ke bonke abantu bakho bazakuba ngabalungileyo,
lelizwe lizakuba lilifa labo kokuphela.
Bangamahlumela engawahlanyelayo,
umsebenzi wezandla zami,
ukuba ngibonakalise inkazimulo yami.
22 Ingcosana yakho izakuba yinkulungwane,
abancinyane bazakuba yisizwe esilamandla.
Mina nginguThixo;
ngesikhathi esifaneleyo lokhu ngizakwenza ngokuphangisa.”