8
U-Isaya Labantwabakhe Njengezibonelo
1 UThixo wathi kimi, “Thatha isibhebhedu selitshe esikhulu ulobe kuso ngolimi olujwayelekileyo ukuthi: Maheri-Shalali-Hashi-Bhazi (okutsho ukuthi: abaphanga ukuhuquluza okuphangiweyo).
2 Ngizabiza u-Uriya umphristi loZakhariya indodana kaJebherekhiya njengabofakazi bami abathembekileyo.”
3 Ngemva kwalokho ngaya kumphrofethikazi, wathatha isisu, wazala indodana. UThixo wasesithi kimi, “Mbize ngokuthi nguMaheri-Shalali-Hashi-Bhazi.
4 Kuzakuthi umfana engakakwazi ukuthi ‘Ubaba’ loba ‘Umama,’ inotho yaseDamaseko lempahla ethunjwe eSamariya kuzathathwa yinkosi yase-Asiriya.”
5 UThixo wakhuluma kimi futhi wathi:
6 “Ngenxa yokuthi abantu laba sebewalile
amanzi ageleza kuhle aseShilowa
bethokozela uRezini
lendodana kaRemaliya,
7 ngakho-ke iNkosi isiseduze ukubalethela
izikhukhula zamanzi ezilamandla,
eziyinkosi yase-Asiriya lobukhosi bayo bonke,
zivela eYufrathe.
Azachithekela ngaphandle kwayo yonke imigelo yawo,
ageleze phezu kwamakhumbi ayo wonke,
8 afohlele koJuda, agcwale kulo,
adlule phakathi kwalo efika entanyeni.
Impiko zawo ezeluliweyo
zizakwembesa ububanzi belizwe lakho,
Awu, Emanuweli!”
9 Hlabani umkhosi wempi lina zizwe, lichithwe!
Lalelani lonke lina mazwe akude.
Lungiselani impi, lichithwe!
Lungiselani impi lichithwe!
10 Lungisani icebo lenu, kodwa kalisoze liphumelele:
bumbani isu lenu, kodwa kaliyikuma,
ngoba uNkulunkulu ulathi.
Mesabeni UThixo
11 UThixo wakhuluma kimi isandla sakhe esilamandla siphezu kwami, engixwayisa ukuba ngingalandeli indlela yalababantu. Wathi:
12 “Ungabokuthi kungamacebo amabi
konke abantu laba abathi kungamacebo amabi;
ungakwesabi abakwesabayo
njalo ungakuqhuqhi.
13 UThixo uSomandla
nguye okumele limazi engongcwele,
nguye okumele limesabe,
nguye okumele limqhuqhe.
14 Uzakuba yisiphephelo;
kodwa kuzo zombili izindlu zako-Israyeli
uzakuba yilitshe elikhubekisa abantu
ledwala elibenza bawe.
Ebantwini baseJerusalema uzakuba
yisifu lomjibila.
15 Inengi labo lizakhubeka;
bazakuwa bephuke,
bazathiywa bathunjwe.”
16 Bopha ubufakazi besixwayiso,
uqinise umthetho phakathi kwabafundi bakaNkulunkulu.
17 Ngizamlindela uThixo,
ofihlela indlu kaJakhobe ubuso bakhe.
Ngizabeka ithemba lami kuye.
18 Mina ngilapha, kanye labantwana uThixo angiphe bona. Siyizibonakaliso lempawu ku-Israyeli ezivela kuThixo uSomandla, ohlala entabeni iZiyoni.
Ubumnyama Buphenduka Ukukhanya
19 Nxa abantu bekutshela ukuthi buza abalamadlozi labalemimoya yobuthakathi, labanyenyezayo bengunguza, kambe abantu akumelanga babuzisise uNkulunkulu wabo na? Kungani abaphilayo libabuzela kwabafayo na?
20 Emthethweni lakubo ubufakazi! Nxa bengakhulumi ngokumayelana lelizwi leli, kabalakho ukukhanya kokusa.
21 Bazazula lelizwe behlulukelwe, belambile. Lapho sebephalwe yindlala, bazathukuthela, bathuke inkosi yabo loNkulunkulu wabo bekhangele phezulu.
22 Emva kwalokho bazakhangela emhlabeni babone usizi kuphela, lomnyama owesabekayo, njalo bazaphoselwa emnyameni opheleleyo.