10
UJobe Uqhubeka Ekhuluma
1 “Senginengwa yimpilo yami;
ngakho sengizasola ngingasathikazi
ngithulule ubuhlungu bomphefumulo wami.
2 Ngizakuthi kuNkulunkulu: Ungangilahli,
kodwa ngitshela ukuthi ungethesa cala bani.
3 Kuyakuthabisa na ukungizwisa ubuhlungu,
ukulahla umsebenzi wezandla zakho,
ikanti uyahlekelela ngamacebo ababi?
4 Ulamehlo enyama na?
Ubona njengokubona kwabantu na?
5 Insuku zakho ziyafanana lezabantu yini,
kumbe iminyaka yakho njengeyomuntu yini,
6 osungaze uphenye iziphambeko zami
njalo ulandelele isono sami,
7 loba wena ukwazi ukuthi angilacala
lokuthi kakho ongangikhulula esandleni sakho?
8 Izandla zakho zangibumba zangenza.
Pho usuzaphenduka ungibhidlize na?
9 Khumbula ukuthi wangibumba njengomdaka.
Pho usuzabuye ungiphendule uthuli na?
10 Kawungichithanga yini njengochago
njalo wangijiyisa njengolaza,
11 wangigqokisa ngesikhumba lenyama,
wangithungela ndawonye ngamathambo lemisipha?
12 Wangipha ukuphila wangitshengisa umusa,
ukunanza kwakho kwawelusa umoya wami.
13 Kodwa lokhu yikho owakufihla enhliziyweni yakho,
njalo ngiyazi ukuthi lokhu kwakukhona engqondweni yakho:
14 Nxa ngona, ngabe wawungikhangele
wawungeke wekela ukona kwami kungajeziswa.
15 Aluba ngilecala, maye mina!
Laloba ngimsulwa, akukho engingakwenza,
ngoba ngiyafa ngenhloni
njalo ngiyagalula ekuhluphekeni kwami.
16 Nxa ngingathi ngivusa ikhanda ungicwathela njengesilwane
uphinde utshengise amandla akho esabekayo kimi.
17 Uletha ofakazi abatsha abangilahlayo,
wandise ulaka lwakho kimi;
amabutho akho angihlasela amaviyo ngamaviyo.
18 Pho kungani wangikhupha esibelethweni na?
Ngifisa ukuthi ngabe ngafa ngingakabonwa laloba yiliphi ilihlo.
19 Aluba ngavele ngingabi ngophilayo,
loba ngathwalwa ngisuka esibelethweni ngasiwa ethuneni!
20 Insuku zami ezilutshwane kaseziphelile nje?
Akungifulathele ukuze ngizuze umzuzwana wentokozo nje
21 ngingakayi lapho okungabuywa khona,
elizweni lobumnyama lethunzi elikhulu,
22 elizweni lobusuku obujule ngempela,
elethunzi elinzima lengxubevange,
lapho lokukhanya kunjengobumnyama.”