34
U-Elihu Uqhubeka Ekhuluma
1 U-Elihu waqhubeka esithi:
2 “Zwanini amazwi ami, lina madoda ahlakaniphileyo;
lalelani kimi, lina madoda ayizifundiswa.
3 Phela indlebe iyawahlola amazwi
njengolimi lunambitha ukudla.
4 Asizihluzeleni thina okulungileyo;
kasifundeni ndawonye okuhle.
5 UJobe uthi, ‘Kangilacala,
kodwa uNkulunkulu kangahluleli ngokulunga.
6 Loba mina ngiqondile,
kuthiwa ngilamanga;
loba ngingelacala,
umtshoko wakhe ungihlaba isilonda esingelaphekiyo.’
7 UJobe kanti ungumuntu bani,
onatha ukuklolodela njengamanzi?
8 Uzwanana labantu abenza ububi;
uhambisana labantu ababi.
9 Ngoba uthi, ‘Umuntu kakumsizi ngalutho
ukuzama ukuthokozisa uNkulunkulu.’
10 Ngakho lalelani kimi lina madoda azwisisayo.
Kakube khatshana laye uNkulunkulu
ukwenza ububi, khatshana kukaSomandla ukona.
11 Uyamphindisela umuntu ngalokho akwenzileyo;
umehlisela lokho okufanele ukuziphatha kwakhe.
12 Kakungeni engqondweni
ukuthi uNkulunkulu angenza ububi,
ukuthi uSomandla
angakutshila ukwahlulela ngokulunga.
13 Ngubani owambekayo phezu komhlaba na?
Ngubani owathi kalawule umhlaba wonke na?
14 Aluba wayengathanda
asuse umoya wakhe lokuphefumula,
15 bonke abantu babengatshabalala kanyekanye,
umuntu wayezabuyela othulini.
16 Nxa lilokuzwisisa, zwanini lokhu;
lalelani lokhu engikutshoyo.
17 Kambe lowo ozonda ukwahlulela ngokulunga angabusa na?
Liyamlahla yini Yena oqotho njalo olamandla?
18 Kayisuye yini othi emakhosini, ‘Kalisizi lutho,’
athi kwabayizikhulu, ‘Libabi,’
19 ongatshengisi ukwazisa amakhosana kulabanye
loba athande abanothileyo kulabayanga,
ngoba bonke bangumsebenzi wezandla zakhe?
20 Bayafa nje masinyane, loba phakathi kobusuku;
abantu bayanyikinywa bedlule;
abalamandla bayasuswa kungelasandla somuntu.
21 Amehlo akhe aphezu kwezindlela zabantu;
ubona zonke izinyathelo zabo.
22 Akulandawo emnyama loba ithunzi elisithileyo,
lapho abenzi bobubi abangacatsha khona.
23 UNkulunkulu kasweli ukuthi aphinde abahlolisise abantu,
ukuze abalethe ekwahlulelweni phambi kwakhe.
24 Engaqalanga wahlola uyabaphahlaza abalamandla
abeke abanye endaweni yabo.
25 Ngoba ezinanzelela izenzo zabo,
uyabagenqula ebusuku bahlifizeke.
26 Uyabajezisa ngenxa yobubi babo
kube segcekeni emuntwini wonke,
27 ngoba baphambuka ekumlandeleni
abaze banaka layiphi indlela yakhe.
28 Benza ukukhala kwabayanga kweza phambi kwakhe,
laye wakuzwa ukukhala kwabasweleyo.
29 Kodwa nxa elokhu ezithulele, ngubani ongamsola na?
Angafihla ubuso bakhe ngubani ongambona na?
Kanti uphezu komuntu lesizwe ngokufanayo,
30 ukwalela ongamesabiyo uNkulunkulu ukuthi abuse,
ukuze angafakeli abantu izifu.
31 Akesithi umuntu athi kuNkulunkulu,
‘Ngilecala kodwa kangisayikona njalo.
32 Ngifundisa lokho engingakuboniyo;
nxa ngenze okubi, kangisayikuphinda ngikwenze.’
33 Pho uNkulunkulu akuvuze ngokwentando yakho na,
wena usala ukuphenduka?
Kumele ukhethe wena, hatshi mina;
ngakho ngitshela lokho okwaziyo.
34 Amadoda alokuqedisisa azakutsho,
amadoda ahlakaniphileyo abangizwayo ngisithi kini,
35 ‘UJobe ukhuluma engelalwazi;
amazwi akhe kawalambono.’
36 Oh, uJobe angasake alingwe ngokweqileyo
ngoba uphendule njengomuntu omubi!
37 Phezu kwesono sakhe wengeza ukuhlamuka;
uyakloloda ngokuqakeza izandla zakhe phakathi kwethu
andise amazwi akhe aphikisa uNkulunkulu.”