37
U-Elihu Uqhubeka Ekhuluma
1 “Konke lokhu kwenza inhliziyo yami itshaye
ize itshede endaweni yayo.
2 Lalela! Lalela ukubhonga kwelizwi lakhe,
ukuzamazama okuphuma emlonyeni wakhe.
3 Uyawukhulula umbane wakhe ngaphansi kwawo wonke amazulu
awuthumele emikhawulweni yomhlaba.
4 Ngemva kwalokho kuza umdumo wokubhonga kwakhe;
uduma ngelizwi lakhe lobukhosi.
Nxa ilizwi lakhe seliqaqamba
ulikhulula lonke angaligodli.
5 Ilizwi likaNkulunkulu liduma ngezindlela ezimangalisayo;
wenza izinto ezinkulu ngaphezu kokuzwisisa kwethu.
6 Utshela ungqwaqwane athi, ‘Khithika phezu komhlaba,’
lezulu athi kulo, ‘Thululeka ube yisihlambo esikhulu.’
7 Ukuze kuthi bonke abantu abadalayo bakwazi ukusebenza kwakhe,
uyamisa umuntu wonke emsebenzini wakhe.
8 Izinyamazana ziyacatsha;
zihlale ezikhundleni zazo.
9 Isiphepho siyaphuma ekamelweni laso,
umqando uphume entshongolweni esikayo.
10 Ukuphefumula kukaNkulunkulu kukhupha iliqhwa,
amanzi aluwaca ajiye abe yilitshe.
11 Ugcwalisa amayezi ngamanzi;
ahlakaze umbane wakhe ngawo.
12 Ngokuqondisa kwakhe ayaqhela embese umhlaba wonke
ukuze enze loba yini awalaya yona.
13 Uyawaletha amayezi ajezise ngawo abantu,
loba ukuthelezela umhlaba wakhe ukuze atshengise uthando lwakhe.
14 Lalela lokhu, Jobe;
akume ukhumbule izimangaliso zikaNkulunkulu.
15 Uyakwazi na ukuthi uNkulunkulu uwalawula njani amayezi
enze umbane wakhe ulavuke?
16 Uyakwazi na ukuthi amayezi emi njani elengile,
leyomimangaliso yakhe yena lowo opheleleyo elwazini?
17 Wena oginqiswa yikutshisa kwezigqoko zakho
nxa umhlaba uthule zwi kubetha umoya waseningizimu,
18 ungamncedisa yini ukwendlala isibhakabhaka,
esilukhuni njengesibuko sensimbi yethusi?
19 Ake usitshele ukuthi pho sithini kuye;
ngeke siyimise kuhle indaba yethu ngoba kumnyama nje lapha kithi.
20 Atshelwe kambe ukuthi ngifuna ukukhuluma?
Ukhona umuntu ongacela ukuthi aginywe?
21 Phela kakho ongalikhangela ilanga,
njengoba licazimula kangaka esibhakabhakeni
nxa umoya uwaphephule wonke amayezi kwacethula.
22 Esuka enyakatho uqhamuka ngenkazimulo enjengegolide;
uNkulunkulu uqhamuka ngobukhosi obesabekayo.
23 USomandla asingeke simfinyelele njalo uphakeme ulamandla;
ekwahluleleni kwakhe okuhle lokulunga okukhulu kancindezeli.
24 Ngakho-ke abantu bayamhlonipha,
ngoba kanti kabanaki yini bonke abahlakaniphileyo enhliziyweni?”