39
UThixo Uqhubeka Ekhuluma
1 “Uyakwazi na ukuthi amagogo azala nini?
Uyawubukele yini nxa impalakazi izala izinyane layo?
2 Uyawuzibale yini izinyanga zize zizale?
Uyasazi isikhathi ezizazala ngaso na?
3 Ziyalala phansi zizale abantwana bazo;
kube sekuphela ubuhlungu bokuhelelwa kwazo.
4 Amazinyane azo ayaqina akhule abe lamandla egangeni;
ayasuka ahambe angabuyi.
5 Ngubani owakhulula ubabhemi weganga na?
Ngubani owathukulula igoda lakhe na?
6 Ngamupha ugwadule lwaba likhaya lakhe,
lenkangala yetswayi ibe ngumango wakhe.
7 Uyazincifela iziphithiphithi zedolobho;
kakuzwa ukukhahlanyezwa ngumtshayeli.
8 Uyazihambela abhode izintaba emadlelweni akhe
edinga loba yini eluhlaza.
9 Inyathi kambe izavuma ukukusebenzela na?
Izahlala esibayeni sakho ebusuku na?
10 Ungayibamba ngomchilo ulime ngayo na?
Ingazilima na izigodi zakho?
11 Ungayithemba yini ngenxa yamandla ayo amakhulu na?
Ungawuyekelela yona umsebenzi wakho onzima na?
12 Ungayithemba ukuthi izalayitsha amabele akho na
iwase esizeni?
13 Impiko zentshe zitshaya kakuhle,
kodwa ngeke zilinganiswe
lempiko kanye lezinsiba zengabuzane.
14 Ibekela amaqanda ayo emhlabathini
iwayekele afudumale etshebetshebeni,
15 inganakananga ukuthi unyawo oluthile lungawahlifiza,
ukuthi inyamazana yeganga ethile ingawanyathela.
16 Amatsiyane ayo iyawakhahlameza, kube sengathi akusi wayo;
ingakhathali ukuthi ukubekela kwayo kwaba yize,
17 ngoba uNkulunkulu kayiphanga ukuhlakanipha
loba ingqondo yokubona okufaneleyo.
18 Kodwa nxa isiselula impiko zayo ukuthi igijime,
iyalihleka ibhiza lomgadi walo.
19 Uyalipha na wena ibhiza amandla
kumbe ugqokise intamo yalo ngomhlonga na?
20 Uyalenza leqe njengentethe na,
lingethuse ngokuhwabha kwalo kokuziqenya?
21 Liyaphanda ngenkani, lithokoziswa ngamandla alo,
lidlubulunde lihlasela isitha.
22 Liyakuhleka ukwesaba, kalesabi lutho;
kaliyikhekhelezi inkemba.
23 Umxhaka wemitshoko ukhehlezela emhlubulweni walo,
ndawonye lomkhonto obenyezelayo kanye lomdikadika.
24 Liyafuthelana ngamadlabuzane ligijime limbe phansi;
kakulivumeli ukuma nxa icilongo selikhala.
25 Konela ukuthi likhale icilongo lihwabhe lithi, ‘Aha!’
Lihle lilizwe iphunga lempi isesekhatshana,
ukukhwaza kwezinduna lomkhosi wempi.
26 Ukhozi luphatshiswa yikuhlakanipha kwakho na
lwelule impiko zalo ziqonde eningizimu?
27 Ukhozi luntweza ngokutshelwa nguwe yini
kanye lokwakhela isidleke salo esiqongweni?
28 Luhlala eliweni, lulale khona ebusuku;
idwala elililiwa yilo inqaba yalo.
29 Ludinga ukudla kwayo lusuka khona;
amehlo alo akubona ekude.
30 Amatsiyane alo azitika ngegazi,
kuthi lapho okulokubuleweyo khona lalo lukhona.”