8
Inkulumo KaBhilidadi
1 UBhilidadi umShuhi wasephendula wathi:
2 “Koze kube nini ukhuluma izinto ezinjalo?
Amazwi akho angumoya ophenquzayo.
3 Kambe uNkulunkulu uyakuhlanekela ukulunga na?
Kambe uSomandla uyakuhlanekela okuhle na?
4 Lapho abantwabakho besona kuye,
wabapha isijeziso sokona kwabo.
5 Kanti nxa wena uzakhangela kuNkulunkulu
uncenge kuSomandla,
6 nxa umsulwa ulungile,
lamanje nje uzaphakama akusize
akubuyisele esimeni sakho.
7 Lapho owaqalisa khona kuzakhanya sekukuncinyane,
ngoba ngezinsuku ezizayo uzabe usuphumelela kakhulu.
8 Buza izizukulwane ezingaphambili
udinge ukuthi okhokho babo bafundani,
9 ngoba thina sizelwe izolo nje, kasazi lutho,
lezinsuku zethu emhlabeni zilithunzi kuphela.
10 Kambe kaziyikukulaya zikutshele na?
Kaziyikuletha amazwi okuzwisisa na?
11 Konje imihlanga ingakhula ibe mide ingekho exhaphozini na?
Imizi ingaphila kungelamanzi na?
12 Nxa leyonqodi isakhula ingakaqunywa
imane ibune masinyane kulotshani.
13 Sinjalo isiphetho sabo bonke abakhohlwa uNkulunkulu;
litshabalala kanjalo ithemba lalowo ongakholwayo.
14 Lokho akuthembayo kufohlozeka lula;
lokho eyeme kukho yibulembu besayobe.
15 Uyeyama kulobubulembu bakhe, kodwa bubhidlike;
uyabambelela kubo, kodwa bukhithike.
16 Unjengesihlahla esithelelwa kakhulu sikhula elangeni,
esisabalalisa ingatsha zaso esivandeni;
17 sinxibanise impande zaso enqunjini yamatshe,
sizama ukuzuza ukugxila kuhle ematsheni.
18 Kodwa singasitshulwa kuleyondawo,
leyondawo isisilandula ithi, ‘Angikaze ngikubone.’
19 Ngeqiniso impilo yaso iyabuna,
ezinye izihlahla zibe zilokhu zikhula emhlabathini lowo.
20 Ngeqiniso uNkulunkulu kamlahli umuntu ongelasici
futhi kaqinisi izandla zezigangi.
21 Usazogcwalisa umlomo wakho ngohleko
lezindebe zakho ngokumemeza ngentokozo.
22 Izitha zakho zizakwembathiswa ngehlazo,
lamathente ababi azatshabalala.”