2
INiniva Izachitheka
1 Umhlaseli uyasondela kuwe, Nineve.
Vikela inqaba,
linda umgwaqo,
zilungiselele,
qoqa wonke amandla akho!
2 UThixo uzabuyisela ubuhle bukaJakhobe
njengobuhle buka-Israyeli,
lanxa abachithi bebaqothule
batshabalalisa lezivini zabo.
3 Amahawu amabutho akhe abomvu,
amabutho agqoke okubomvu gebhu.
Insimbi ezinqoleni zempi iyaphazima
ngosuku ezilungiselwe ngalo;
imikhonto yesihlahla sephayini iyazunguzwa.
4 Izinqola zempi zihlasela ngesiqubu emigwaqweni,
zisiya emuva laphambili ezigcawini.
Zinjengezibane ezikhanyisiweyo;
ziyaphaziphazima njengombane.
5 Ubiza amabutho akhe akhethiweyo
kodwa ayakhubeka endleleni yawo.
Agijimela emdulini wedolobho;
isivikelo silungiswe.
6 Amasango omfula ayavulwa,
indlu yobukhosi ibhidlike.
7 Kumiswe ukuthi idolobho lizathunjwa,
abantu balo basiwe ebugqilini.
Izintombi zalo eziyizigqili zikhala njengamajuba
zizitshaya amabele azo.
8 INiniva injengesiziba,
njalo amanzi aso ageleza ehamba.
Bayaklabalala besithi, “Mana! Mana!”
Kodwa kakho onyemukulayo.
9 Phangani isiliva!
Phangani igolide!
Umthapho kawupheli,
inotho evela eziphaleni zayo zonke!
10 Ibhuqiwe, iphangiwe, iphundliwe!
Inhliziyo ziphela amandla, amadolo ayaxega,
imizimba iyaqhaqhazela, ubuso bonke bunyukubele.
11 Khathesi-ke ungaphi umhome wezilwane,
lapho ezinikela khona abantwana bazo ukudla,
lapho okwaya khona isilwane lesilwanekazi,
kanye lemidlwane, kungekho lutho olwesatshwayo na?
12 Isilwane sibulalele imidlwane yaso okwaneleyo
sabambela lesilwanekazi saso okwenyama yokudliwa,
sagcwalisa isikhundla saso ngesikujimbileyo
lomhome waso ngenyama.
13 “Ngimelane lawe,”
kutsho uThixo uSomandla.
“Ngizazitshisa izinqola zakho zempi zibe yintuthu;
lenkemba izakudla izilwane zakho ezisakhulayo.
Kangiyikukutshiyela ongakubamba ukudle njengenyama emhlabeni.
Amazwi ezithunywa zakho
kawasayikuzwakala futhi.”