Ihubo 109
Kumqondisi wokuhlabela. ElikaDavida. Ihubo.
1 Oh Nkulunkulu, wena engikudumisayo,
ungali ulokhu uthule,
2 ngoba abantu ababi abalenkohliso
bayivulile imilomo yabo bekhuluma ngami;
bakhuluma bengigcona ngendimi zabo zamanga.
3 Bangihonqolozela ngamazwi enzondo;
bayangisukela nje kungelasizatho.
4 Ukubathanda kwami bakuphindisela ngokungisola,
kodwa ngingumuntu womkhuleko.
5 Bangiphindisela okuhle ngokubi,
langenzondo ukubathanda kwami.
6 Bathi, “Khethani umuntu omubi ozamelana laye;
ombeka icala kame kwesokunene sakhe.
7 Nxa esethonisiswa kafunyanwe elecala,
futhi sengathi imikhuleko yakhe ingamlahla.
8 Sengathi insuku zakhe zingabazilutshwana;
kakube lomunye ozathatha isikhundla sakhe sobukhokheli.
9 Sengathi abantwabakhe bangaba zintandane
lomkakhe abe ngumfelokazi.
10 Sengathi abantwabakhe bangaba zinzulane zeziceli;
sengathi bangaxotshwa emizini yabo esingamanxiwa.
11 Sengathi lowo aboleke kuye angamemuka konke alakho;
sengathi labezizweni bangaphanga izithelo zamandla akhe.
12 Akungabikhona omenzela umusa
loba ozwela izintandane zakhe.
13 Sengathi izizukulwane zakhe zingaphela,
amabizo abo esulwe esizukulwaneni esilandelayo.
14 Sengathi ububi bukayise bungakhunjulwa phambi kukaThixo,
sengathi isono sikanina singacitshi lanini.
15 Sengathi izono zabo zingahlala zisobala phambi kukaThixo,
ukuze aphelise du ukukhunjulwa kwabo emhlabeni.
16 Ngoba kazange akhumbule ukwenza umusa
kodwa wabazingelela ukufa abayanga
labaswelayo labadabukileyo enhliziyweni.
17 Wayekuthanda ukwethesa isithuko,
sengathi singehlela kuye.
Wayengakuthandi ukubusisa
sengathi kungaba khatshana laye.
18 Wayevunula ukuthuka njengesigqoko;
kwangena emzimbeni wakhe njengamanzi,
emathanjeni akhe njengamafutha.
19 Sengathi kungaba njengengubo athandelwe ngayo
njengebhanti abotshwe ngalo lanini.”
20 Sengathi lokhu kungaba yisijeziso sikaThixo kulabo abangethesa amacala,
labo abakhuluma okubi ngami.
21 Kodwa wena, Oh Thixo woBukhosi,
ngenzela kuhle ngenxa yebizo lakho;
ngenxa yokulunga kothando lwakho akungikhulule.
22 Ngoba ngingumyanga ngiyaswela,
lenhliziyo yami ilimele ngaphakathi kwami.
23 Ngiyafiphala njengethunzi lakusihlwa;
ngiyaphetshulwa njengentethe.
24 Amadolo ami asebuthakathaka ngokuzila ukudla;
umzimba wami usuzacile usutshwabhene.
25 Sengiyinto yokuhlekisa kulabo abangibeka amacala;
bathi bengibona banyikinye amakhanda abo.
26 Akungisize, Oh Thixo Nkulunkulu wami;
ngisindisa ngokuya ngothando lwakho.
27 Kumele bakwazi ukuthi lokhu ngokwesandla sakho;
wena, Oh Thixo, nguwe okwenzileyo.
28 Bangangiqalekisa, kodwa wena uzabusisa;
bathi bayahlasela bayangiswe,
kodwa inceku yakho izathokoza.
29 Abangivukelayo kabembeswe ihlazo
bagoqelwe ngokuyangeka njengengubo.
30 Ngomlomo wami ngizambabaza kakhulu uThixo;
ngisemphakathini ngizamdumisa.
31 Ngoba umi ngakwesokunene salowo oswelayo,
ukusindisa impilo yakhe kulabo abamnikela ekufeni.