Ihubo 144
ElikaDavida.
1 Udumo kalube kuThixo iDwala lami,
yena ofundisa izandla zami ukulwa impi,
leminwe yami ukuhlasela.
2 UnguNkulunkulu wami othandekayo lenqaba yami,
inqaba yami lomkhululi wami,
isihlangu sami engiphephela kuso,
othobisa abantu bami ngaphansi kwami.
3 Kambe Thixo, umuntu uyini ungaze umnanze,
indodana yomuntu ukuthi uyikhumbule na?
4 Umuntu unjengomphefumulo;
insuku zakhe zinjengesithunzi esidlulayo masinyane.
5 Yahlukanisa izulu lakho, Oh Thixo, wehlele phansi;
thinta izintaba, ukuze zithunqe intuthu.
6 Thumela umbane uzihlakaze izitha;
phosa imitshoko yakho zichitheke.
7 Yelula isandla sakho sisuka phezulu;
ngihlenga ungikhulule
emanzini alamandla abezizweni
8 omilomo yabo igcwele amanga,
ozandla zabo zokunene zilenkohliso.
9 Ngizakuhlabelela ingoma entsha, Oh Nkulunkulu;
ngechacho lezintambo ezilitshumi ngizakutshayela ingoma,
10 kuye yedwa onika amakhosi ukunqoba,
ohlenga inceku yakhe uDavida enkembeni ebulalayo.
11 Ngihlenge, ungikhulule
ezandleni zabezizwe
omilomo yabo igcwele amanga,
ozandla zabo zokunene zilenkohliso.
12 Kuzakuthi amadodana ethu ebutsheni bawo
azakuba njengezihlahla ezikhuliswa kuhle,
kuthi amadodakazi ethu
abe njengezinsika ezibazelwe ukucecisa isigodlo.
13 Iziphala zethu zizagcwala
ngemihlobo yonke yokudla.
Izimvu zethu zizakwanda ngezinkulungwane,
ngamatshumi ezinkulungwane emadlelweni ethu;
14 inkabi zethu zizadonsa imithwalo enzima.
Akusayikuba khona ukubhidlizwa kwemiduli,
ukuya ebugqilini,
lokukhala kosizi emigwaqweni yakithi.
15 Babusisiwe labobantu lokhu okuzakwenzakala kubo;
babusisiwe abantu oNkulunkulu wabo ngu Thixo.