Ihubo 148
1 Dumisani uThixo.
Dumisani uThixo emazulwini,
mdumiseni eziqongweni ngaphezulu.
2 Mdumiseni zingilosi zakhe zonke,
mdumiseni lonke mabutho asezulwini.
3 Mdumiseni, langa lenyanga,
mdumiseni lonke zinkanyezi ezikhazimulayo.
4 Mdumiseni lina ziqongo zamazulu
lani manzi ngaphezulu komkhathi.
5 Konke kakudumise ibizo likaThixo
ngoba yena watsho ilizwi kwadaleka.
6 Wazibeka ezindaweni zazo okwanini lanini;
wanika isahlulelo esingela kuguquka.
7 Dumisani uThixo emhlabeni,
lina zidalwa zasolwandle lezinziki zalo zonke,
8 umbane lesiqhotho, ungqwaqwane lamayezi,
umoya wesiphepho owenza intando yakhe,
9 lina zintaba lamaqaqa wonke,
zihlahla zezithelo lemisedari yonke,
10 zinyamazana zeganga lenkomo zonke,
zinanakazana lezinyoni eziphaphayo,
11 makhosi omhlaba lezizwe zonke,
lina makhosana lababusi bonke emhlabeni,
12 majaha lezintombi,
maxhegu labantwana.
13 Kabalidumise ibizo likaThixo,
ngoba ibizo lakhe lodwa liphakeme;
inkazimulo yakhe ingaphezulu komhlaba lamazulu.
14 Ubaphakamisele abantu bakhe uphondo,
indumiso yabo bonke abathembekileyo bakhe,
eka-Israyeli, abantu abasesifubeni sakhe.
Dumisani uThixo.