Ihubo 35
ElikaDavida.
1 Xabana labo, Thixo abaxabana lami;
lwana labo abalwa lami.
2 Thatha isihlangu lewisa;
phakama uzongilamulela.
3 Phakamisa umkhonto lesijula,
ukuqondise kwabangihlaselayo.
Ngitshela ukuthi,
“Ngiyikusindiswa kwakho.”
4 Sengathi labo abazingela impilo yami
bangayangiswa bathelwe ngehlazo;
sengathi labo abazama ukungidiliza
bangabuyiselwa emuva bedumazekile.
5 Sengathi bangaba njengamakhoba emoyeni,
ingilosi kaThixo ibe ibadudula ibaxotsha;
6 sengathi indlela yabo ingaba mnyama itshelele,
ingilosi kaThixo ibe ibahlezi ezithendeni.
7 Ngoba bangithiya ngamambule abo ngingonanga lutho,
baphinda bangembela umgodi kungelasizatho,
8 sengathi bangadilizwa belibele
lawomambule abawathiyileyo abahilele,
sengathi bangawela kulowomgodi babhidlizwe.
9 Lapho-ke umoya wami uzathokoza kuThixo
ujabule ekusindiseni Kwakhe.
10 Mina qobo lwami ngizamemeza ngithi,
“Ngubani onjengawe, Oh Thixo?
Uyabakhulula abahluphekayo kulabo abalamandla kulabo,
abahluphekayo labaswelayo kulabo ababantshontshelayo.”
11 Ofakazi bolunya bayangivelela;
bangibuza ngezinto engingazaziyo.
12 Bangiphindisela okuhle ngokubi
umphefumulo wami usale usudabukile.
13 Ikanti kwathi bona begula ngembatha amasaka
ngazithoba ngazila ukudla.
Kwathi lapho imikhuleko yami ingaphendulwa
14 ngaba sesililweni
kwangathi ngililela umngane wami loba umfowethu.
Ngakhothamisa ikhanda lami ngokudabuka
kwangathi ngililela umama.
15 Kodwa ngathi sengikhubekile baqwebana bokha insini;
abahlaseli bangihlanganyela ngilibele.
Bangichothoza okungapheliyo.
16 Bakloloda ngomona njengabangakholwayo;
bangigedlela amazinyo abo.
17 Nkosi, uzakuma ubukele kuze kube nini na?
Yenyula impilo yami ekungilimazeni kwabo,
impilo yami eligugu kulezizilwane.
18 Ngizakubonga phakathi komhlangano omkhulu;
ngikudumise ngiphakathi kwamaxuku abantu.
19 Ungabayekeli abayizitha zami ngingabonelanga lutho,
bantele phezu kwami.
Ungayekeli labo abangizondayo kungelasizatho,
banginyonkoloze ngomona.
20 Kabakhulumi okuqondileyo
kodwa babumba amacala amanga,
ngalabo abaphila ngokuthula elizweni.
21 Bangikhamisela imilomo bathi, “Hiya belo!
Sizibonele ngawethu amehlo la.”
22 Oh Thixo, usukubonile lokhu; ungathuli.
Ungabi khatshana kwami, Oh Nkosi.
23 Vuka, uphakame ungilamulele!
Ngilwela, Nkulunkulu Thixo wami.
24 Ngigeza ngokulunga Kwakho,
Thixo, Nkulunkulu wami;
ungabayekeli bantele phezu kwami.
25 Ungabayekeli bacabange bathi, “Ehe, yikho ebesikufuna!”
loba bathi, “Sesimginyile.”
26 Sengathi bonke abantela ngokuhlupheka kwami
bangathelwa ngehlazo basanganiseke;
sengathi bonke abazikhukhumezayo phezu kwami
bangembeswa ngokuyangeka langehlazo.
27 Sengathi labo abathokoza ngokugezwa kwami
bangahalalisa ngentokozo lenjabulo;
sengathi bangatsho kokuphela bathi,
“Makaphakanyiswe uThixo
othokoza ngokuhlala kuhle kwenceku yakhe.”
28 Ulimi lwami luzakhuluma ngokulunga Kwakho
langendumiso Yakho ilanga lonke.