Ihubo 68
Kumqondisi wokuhlabelela. ElikaDavida. Ihubo. Ingoma.
1 UNkulunkulu kaphakame, izitha zakhe azihlakazwe;
izitha zakhe azimbalekele.
2 Njengentuthu iphetshulwa ngumoya lawe baphephulele kude;
njengengcino encibilikiswa ngumlilo,
ababi kababhubhe phambi kukaNkulunkulu.
3 Kodwa sekungathi abalungileyo bangajabula
bathokoze phambi kukaNkulunkulu;
sengathi bangathaba bathokoze.
4 Hlabelelani kuNkulunkulu,
hlabelelani indumiso ebizweni lakhe,
mphakamiseni yena ohlezi phezu kwamayezi
lithokoze phambi kwakhe obizo lakhe nguThixo.
5 Uyise wezintandane, umlamuleli wabafelokazi,
nguNkulunkulu emzini wakhe ongcwele.
6 UNkulunkulu uyabalungisela indawo ezimulini labo abalesizungu,
ukhokhela izibotshwa ngokuhlabela;
kodwa abahlamuki bahlala elizweni elomileyo.
7 Kwathi lapho ukhokhela abantu bakho, Oh Nkulunkulu,
lapho wawudabula elizweni eliyinkangala,
8 umhlaba wanyikinyeka, umkhathi walithulula izulu,
phambi kukaNkulunkulu, onguYena oweSinayi,
phambi kukaNkulunkulu ka-Israyeli.
9 Wanisa izulu elinengi, Oh Nkulunkulu;
wavuselela ilifa lakho elaselikhathele.
10 Abantu bakho bahlala kulo bazinza,
kwathi ngokuphana kwakho Nkulunkulu,
wabaphakela abangabayanga.
11 INkosi yalikhupha ilizwi,
kwaba labanengi kakhulu abalimemezelayo besithi,
12 “Makhosi lamabutho phangisani libaleke;
ezihonqweni amakhosikazi abelana impango.
13 Khonapho lisalele phakathi kwemililo yezihonqo,
impiko zejuba lami zihuqiwe ngesiliva,
izinsiba zalo ngegolide elikhazimulayo.”
14 Lapho uSomandla wawahlakaza amakhosi elizwe,
kwakunjengongqwaqwane eqoqene phezu kweZalimoni.
15 Izintaba zeBhashani yizintaba ezilesithunzi;
zilezindongandonga izintaba zaseBhashani.
16 Kungani linyonkoloza ngomona,
lina zintaba ezindongandonga,
leyontaba uNkulunkulu akhetha ukubusa kuyo,
lapho uThixo ngokwakhe uzahlala khona lanini?
17 Izinqola zikaNkulunkulu zingamatshumi ezinkulungwane;
lezinkulungwane zezinkulungwane;
iNkosi isifikile ivela eSinayi yangena endlini yayo engcwele.
18 Wathi ekukhuphukeni kwakho uqansa,
wakhokhela abathunjiweyo;
wemukela izipho ebantwini,
lakulabo abahlamukayo
ukuze wena, Oh Thixo Nkulunkulu, uhlale khona.
19 Udumo kalube kuThixo, kuNkulunkulu uMsindisi wethu,
othwala imithwalo yethu insuku zonke.
20 UNkulunkulu wethu nguNkulunkulu osindisayo;
kuThixo wobukhosi kuvela ukuphepha ekufeni.
21 Ngeqiniso uNkulunkulu uzawachoboza amakhanda ezitha zakhe,
imiqhele eloboya yalabo abaqhubekayo ngezono zabo.
22 INkosi ithi, “Ngizabaletha besuka eBhashani;
ngizabaletha besuka ekujuleni kolwandle,
23 ukuze ligxamuze inyawo zenu egazini lezitha zenu,
lezilimi zezinja zenu zibe lesabelo sazo.”
24 Udwendwe lwakho Nkulunkulu seluqhamuka, yebo
udwendwe lukaNkulunkulu wami leNkosi
lungena endlini engcwele.
25 Phambili ngabahlabeleli, kulandele abamachacho;
phakathi kwabo kulamantombazana atshaya amagedla.
26 Dumisani uNkulunkulu ebandleni elikhulu;
dumisani uThixo embuthanweni ka-Israyeli.
27 Masinyane isizwana sakoBhenjamini sibakhokhele,
nantiyana ixuku elikhulu lamakhosana kaJuda,
njalo nankayana amakhosana kaZebhuluni lakaNafithali.
28 Veza amandla akho, Oh Nkulunkulu,
sitshengise amandla akho Nkulunkulu,
njengowakwenza endulo.
29 Ngenxa yethempeli lakho eliseJerusalema
amakhosi azakulethela izipho.
30 Khuza isilo esiphakathi kwemihlanga
umhlambi wenkunzi phakathi kwamathole ezizwe.
Sezithotshisiwe kazilethe izibhebhedu zesiliva.
Hlakaza izizwe ezithokoza ngempi.
31 Amanxusa azavela eGibhithe;
iKhushi izazithoba kuNkulunkulu.
32 Hlabelelani kuNkulunkulu, awu lina mibuso yomhlaba,
hlabelelani indumiso kuThixo,
33 kuye ohlala phezu kwesibhakabhaka sekadeni,
okhwaza ngelizwi elikhulu.
34 Fakazani ngamandla kaNkulunkulu,
obukhosi bakhe buphezu kuka-Israyeli;
omandla akhe asesibhakabhakeni.
35 Uyamangalisa, Oh Nkulunkulu, usendlini yakho engcwele;
uNkulunkulu ka-Israyeli upha amandla ebantwini bakhe.
Indumiso kayibe kuNkulunkulu!