Ihubo 77
Kumqondisi wokuhlabela. KuJeduthuni, Elika-Asafi. Ihubo.
1 Ngakhala kuNkulunkulu ngicela uncedo;
ngakhala kuNkulunkulu ukuthi angizwe.
2 Ngathi ngikhathazekile ngamdinga uThixo;
ebusuku ngazelula izandla azazezadinwa
lomphefumulo wami wala ukududuzeka.
3 Ngakukhumbula, Oh Nkulunkulu, ngabubula;
ngacabanga, umoya wami wancipha.
4 Wala ukuthi amehlo ami avaleke;
ngangikhathazekile ngisehluleka ukukhuluma.
5 Ngakhumbula ngezinsuku ezedlulayo,
insuku zakudala;
6 ngakhumbula izingoma zami ebusuku.
Inhliziyo yami yacabanga lomoya wami wadinga:
7 “INkosi izakhalala kokuphela na?
Ayisayikuphinde itshengise uthando lwayo njalo na?
8 Kanti uthando lwayo olungapheliyo selunyamalele kokuphela na?
Kanti isithembiso sayo sesiphelile kokuphela na?
9 Kanti uNkulunkulu usekhohliwe ukuba lesihawu na?
Usethe ngokuzonda wagodla uzwelo lwakhe na?”
10 Ngasengikhumbula ngathi, “Yilokhu okunginqundayo,
ukuthi isandla sokunene soPhezukonke kasisekho phezu kwami.
11 Ngizayikhumbula imisebenzi kaThixo;
yebo, ngizayikhumbula imimangaliso yakho yekadeni.
12 Ngizacabanga ngayo yonke imisebenzi yakho
nginakane ngazozonke izenzo zakho ezinkulu.”
13 Izindlela zakho, Oh Nkulunkulu, zingcwele;
nguphi unkulunkulu omkhulu njengoNkulunkulu wethu na?
14 Nguwe Nkulunkulu owenza izimanga;
uyawatshengisa amandla akho ebantwini.
15 Ngengalo yakho elamandla wabakhulula abantu bakho,
izizukulwane zikaJakhobe loJosefa.
16 Amanzi akubona wena, Oh Nkulunkulu,
amanzi akubona atshotshobala;
inziki zagonyuluka.
17 Amayezi awathulula amanzi,
isibhakabhaka sandindiza ngokuduma;
imitshoko yakho yaphazima yaya le lale.
18 Umdumo wakho wezwakala uphakathi kwesivunguzane,
umbane wakho wawukhanyisa umhlaba;
umhlaba wavevezela wanyikinyeka.
19 Indlela yakho yadabula olwandle,
umkhondo wakho phakathi kwamanzi,
kodwa izinyathelo zakho zazingabonakali.
20 Wabahola abantu bakho njengomhlambi wezimvu
ngesandla sikaMosi lo-Aroni.