16
यरूशलेमय् छ्वयेत भेटी ब्यूगु
1 यहूदियाय् च्वंपिं परमेश्वरया मनूतय्त ग्वाहालि बीत भेटी कायेगु खँय् गथे जिं गलातियाय् च्वंगु मण्डलीतय्त धयागु खः अथे हे छिमिसं नं या।
2 छिमिसं थःम्हं कमय् यानागुलिं लिकयाः गुलि बी फु उलि आइतबार पतिकं बियाः मुंका ति। थथे याःसा जि आम्कन वयेबलय् भेटी कया च्वने माली मखु।
3 जि आम्कन वयेबलय् छिमिगु भेटी यरूशलेमय् बीके छ्वयेत छिमि हे यःपिं मनूतय्त पौ बियाः छ्वया बी।
4 जि थः हे वने माःसां इमित नं नापं ब्वना यंके।
यात्राया ग्वसाः ग्वःगु
5 माकेडोनिया वने माःगुलिं जि माकेडोनिया जुयाः जक छिमिथाय् वये।
6 छिमिथाय् वयाः जि छन्हु निन्हु च्वनेगु मतिइ दु, फुसा चिकुला ज्वःछि हे च्वने। अनं लिपा जि न्ह्याथाय् वंसां छिमिसं जितः ग्वाहालि ब्यु।
7 दुस्वः वये थें जक जि छिमिथाय् वये मास्ति मवः। प्रभुं जितः धयादिल धाःसा जि छिमिथाय् तःन्हु हे च्वनेगु मतिइ दु।
8 अय्नं पेन्तिकोस नखः तक जि थन एफिससय् हे च्वने।
9 थन जिगु विरोधीत यक्व दुसां जिं थन तसकं हे तःधंगु ज्या पूवनिगु खना।
10 तिमोथी आम्कन वःसा वयात दुनुगलंनिसें लसकुस या, छाय्धाःसा जिं थें वं नं प्रभुयागु ज्या यानाच्वंगु दु।
11 छिपिं सुनानं वयात हेपय् याये मते, बरु छिमिसं वयात जिथाय् वयेत ग्वाहालि या। मेपिं दाजुकिजापिं नाप जिं वयागु लँ स्वयाच्वना।
12 किजा अपोल्लोसयात जिं मेपिं दाजुकिजापिं नाप आम्कन छ्वया हयेत तःकः धाये धुन, अय्नं वं वये मंमदय्का च्वन। लिपा लात धाःसा व वइ।
दक्वसिबय् लिपायागु सल्लाह
13 होश याना च्वँ, बल्लाक विश्वास याना च्वँ, अले मग्यासे बल्लाका च्वँ।
14 न्ह्यागु हे ज्याखँ याःसां छिमिसं कर्पिन्त माया यानाः यायेगु या।
15 स्तिफनसया छेँयापिन्त ला छिमिसं म्हसि हे स्यू। अखैयाय् दकलय् न्हापालाक विश्वासी जूपिं इपिं हे खः। इमिसं परमेश्वरया मनूतय्गु निंतिं थःत हे पानाच्वंगु दु।
16 यःपिं दाजुकिजापिं, स्तिफनस थें ज्याःपिनिगु खँ न्यनेगु या। अले इपिं नाप ज्या याना च्वंपिं मनूतय्गु खँ नं न्यँ।
17 स्तिफनास, फोर्टुनाटस व अखाइकसपिं जिथाय् वःगुलिं जि तसकं लय्ताः छाय्धाःसा इमिसं छिपिं मदुसां दु थें च्वंका बिल।
18 छिमित थें इमिसं जितः नं तसकं न्ह्याइपुकल। थज्याःपिन्त झीसं हनेगु याये माः।
19 एशियाय् च्वंगु मण्डलीपाखें छिमित ज्वजलपा धया हःगु दु। अकिलास व प्रिस्का अले इमिगु छेँय् दुगु मण्डलीं नं प्रभुयागु नामं छिमित ज्वजलपा धया हःगु दु।
20 थन च्वंपिं फुक्क दाजुकिजापिन्सं नं छिमित ज्वजलपा धया हःगु दु। थःथवय् यचु नुगलं माया यानाः ज्वजलपा यायेगु या।
21 जिगु ज्वजलपा जिं थःगु ल्हातं च्वयाच्वना।
22 प्रभुयात माया मयाइम्हय्सित धिक्कार दु। “हे जिमि प्रभु, झायादिसँ।”
23 प्रभु येशूयागु दया माया छिमित दयेमा।
24 वय्कःया पाखें छिपिं सकसित जिगु माया दु। आमेन!