6
1 परमेश्वर नाप जिमिसं थथे ज्या यानाच्वनागुलिं वय्कःयागु दया माया छिमिसं सितिं छ्वयेगु स्वये मते धकाः जिमिसं इनाप यानाच्वनागु खः।
2 परमेश्वरं थथे धयादीगु दु --
“पाय्छिगु इलय्
जिं छिमिगु खँ न्यनागु दु।
अले उद्धारया दिनय्
जिं छिमित ग्वाहालि यानागु दु।”
स्व, पाय्छिगु ई थ्व हे खः, उद्धारया दिं नं आः हे खः!
पावलया दुःखकष्ट
3 जिमिसं सुयातं पंगः जुइकथं ज्याखँ मयाना। मखुसा जिमिगु ज्याखँयात क्वह्यंकाः खँ ल्हाइ।
4 न्ह्यागु हे याःसां जिपिं परमेश्वरयागु ज्या याइपिं मनूत खः धकाः क्यना। सह यानाः सह याये मफयेगु दुःखकष्ट जुलं नं, नये मखनं नं, अले तसकं थाकु लँ नं जिमिसं सह यानाच्वना।
5 दालं नं, झ्यालखानाय् कुनं नं, मनूतय्सं हय्क्कावःसां, सिक्क ज्या याये माःसां, नये मखंसां, द्यने मखंसां।
6 जिमिसं यानागु भिंगु ज्यां व बुद्धिं यानाः सह याये फुगुलिं, दया माया यानाजुयागुलिं, पवित्र आत्मा दुगुलिं, धात्थेंगु माया यानाः जिपिं परमेश्वरयागु ज्या याइपिं मनूत खः धकाः क्यना।
7 जिमिसं विश्वास यानाः सत्य खँ न्यंकाजुया, परमेश्वरया शक्तिं यानाः जिमिसं थथे याये फुगु खः। परमेश्वरयागु न्ह्यःने धर्मी ठहरय् जुइगु हे जिमिगु छगू जक ल्वायेगु नं पनेगु नं हतियार खः।
8 जिमित तःधंकूसां, क्वह्यंकूसां, भिंकूसां, मभिंकूसां जिमिसं परमेश्वरयागु सेवा याना। सत्य खँ ल्हाना जूसां जिपिं फताहा थें जुइमाल।
9 जिपिं म्हमस्यूपिं जूसां जिमित सकसिनं म्हस्यू। सीथें च्वंसां जिपिं आःतक म्वानाच्वना। जिमित बाम्हसिक्क दायाहल।
10 नुगः ख्वःपिं थें जूसां न्ह्याबलें लय्तायाच्वना। जिपिं गरिब जूसां मेपिन्त तःमि यानाबिया। जिमिके छुं हे मदु थें च्वंसां जिमिके सकतां दु।
11 कोरिन्थय् च्वंपिं यःपिं दाजुकिजापिं, धाये माःगु खँ फुक्कं सुमचुकुसे छिमित धयाबियागु हे दु। जिमिगु नुगः चक्कं।
12 छिमित मधासे छुं नं खँ जिमिसं सुचुका तयागु मदु। बरु छिमिसं थःपिनिगु नुगः कय्कुंका तःगु दु।
13 छिपिं जिम्ह मस्त थें जूगुलिं थथे धयाच्वनागु खः। छिमित जिमिसं माया यानाच्वना थें छिमिसं नं जिमित माया यानाच्वँ। छिमिसं नं थःगु नुगः चक्कंकि।
विश्वासी मखुपिं नाप बुला जुइ मते
14 विश्वासी मखुपिं मनूत नाप बुला जुयाः इमिसं थें ज्या सनाजुइ मते। इमिसं यानाजू थें झीसं यानाजुइ मज्यू। भिंगु व मभिंगु मिलय् जुइ फइ ला? अले जः व खिउँ मिलय् जुइ फइ ला?
15 अथे हे ख्रीष्ट व शैतान नं मिलय् जुइ फइ ला? अले ख्रीष्टयात विश्वास याइपिं मनूत व विश्वास मयाइपिं मनूत मिलय् जुइ फइ ला?
16 परमेश्वरयागु देगःलिसे मूर्तियागु छु स्वापु? झीपिं हे म्वाःम्ह परमेश्वर च्वनिगु देगः खः। थथे ला परमेश्वरं हे धयादीगु दु --
“जि इपिं नापं च्वने,
अले इपिं नापं जुइ।
जि इमि परमेश्वर जुइ
अले इपिं जिमि मनूत जुइ।”
17 अले हानं प्रभुं थथे धयादीगु दु --
“छिपिं इमिगु पुचलं पिहां वा,
अले छखे च्वँ।
अशुद्ध खँ थी मते।
अले जिं छिमित थः मनू याये।
18 जि छिमि बाः जुइ।
अले छिपिं जिम्ह काय्म्ह्याय्पिं जुइ धकाः
दकलय् तःधंम्ह परमप्रभुं धयादीगु खः।”