11
1 मादी दाराया न्हापांगु दँय् जिं वयात ग्वाहालि व बल बिया।
दच्छिन व उत्तरयापिं जुजुत
2 “आः जिं छन्त खःगु खँ धाये। फारसय् अज्ज स्वम्ह जुजुपिं खने दइ। अनंलि प्यम्हम्ह जुजु दइ। व इपिं स्वम्ह स्वयाः तःमि जुइ, व थःगु धनं यानाः बल्लाइ। अले वं ग्रीस देशलिसें ल्वायेत फुक्कसित ग्वाकी।
3 अनं लिपा छम्ह बल्लाःम्ह जुजु वइ। वं छगू तःधंगु राज्यय् शासन याइ अले थः यःथें याइ।
4 अय्नं व बल्लायेवं वयागु देश कुचा कुचा जुयाः उत्तर, दच्छिन, पुर्ब व पच्छिमय् ब्वथली। व देश वया सन्तानतय्त दइ मखु, मेपिन्सं वयागु पलेसा शासन याइ। अय्नं इपिं व थें बल्लाइ मखु छाय्धाःसा वयागु साम्राज्य लाकाकयाः मेपिन्त बीगु जुइ।”
5 “दच्छिनयाम्ह जुजु बल्लाइ तर वया कप्तानत मध्ये छम्ह व स्वयाः बल्लाइ। अले वं अज्ज तःधंगु राज्यय् शासन याइ।
6 छुं दँ लिपा इपिं मिलय् जुइ। दच्छिनयाम्ह जुजुं थः म्ह्याय् उत्तरयाम्ह जुजुयात ब्याहा यानाबी, तर इपिं तःन्हु तक मिलय् जुयाच्वनी मखु। अले राजकुमारी, वया बौ, वनापं वःपिं भारदारत सकसितं हे स्याइ।
7 “थ्वया लिपा राजकुमारीया थःलाःम्ह छम्ह मनू दच्छिन देशय् जुजु जुइ। वं उत्तर देशय् हमला याइ, अनयागु किल्ला दुने दुहां वनी अले अन च्वंपिं मनूतय्त बुकी।
8 वं इमि नँयागु द्यःया मूर्तित, लुँ व वहःयागु थीके-थीकेगु थलबल लाकाकयाः मिश्रय् यंकी। छुं दँ तक वं उत्तरयाम्ह जुजुयात हमला याइ मखु।
9 लिपा उत्तरयाम्ह जुजुं दच्छिनयाम्ह जुजुया देशय् हमला यायेत वइ। तर व याकनं हे थःगु देशय् लिहांवनी।
10 वया काय्पिं लडाइँ यायेत तयार जुइ, अले इमिसं यक्व सिपाइँत मुंकी। इमिसं बाः वःगु खुसि थें न्ह्यज्याः वनाः शत्रुया किल्ला तक हे ल्वाल्वां वनी।
11 “तसकं तंचायाः दच्छिनयाम्ह जुजु उत्तरयाम्ह जुजुलिसें ल्वायेत पिहां वइ। उत्तरयाम्ह जुजुं नं ल्वायेत यक्व सिपाइँत मुंकी तर वया सेना बुइ।
12 थथे व सेनायात बुके धुंकाः व तःधंछु जुइ अले वं द्वलंद्वः मनूतय्त स्याइ। अय्नं तःन्हु तक त्याना च्वनी मखु।
13 छाय्धाःसा उत्तरयाम्ह जुजुं हाकनं न्हापा स्वयाः यक्व सिपाइँत मुंकी। छुं दँ लिपा व तःधंगु सेना व यक्व ल्वाभः ज्वनाः न्ह्यज्याइ।
14 “अबलय् यक्व मनूत दच्छिनयाम्ह जुजुयागु विरोधय् दनी। छिमि मनूतय् दथुं नं हारांपिं मनूतय्सं दर्शनया कारणं विद्रोह याइ, तर इपिं ताःलाइ मखु।
15 अले उत्तरयाम्ह जुजु वयाः पःखाः दुगु शहरयात घेरय् यानाः उकियात त्याकाकाइ। दच्छिनयापिं सिपाइँत वयागु न्ह्यःने दनाच्वने फइ मखु। इमि सेनायापिं बबल्लाःपिं मनूत नं वयागु न्ह्यःने दनाच्वने फइ मखु।
16 हमला याः वःम्हय्सिनं इमित थः यःथें याइ। सुनानं वयात पने फइ मखु। वं थःत बांलाःगु देशय् पलिस्था याइ अले वयाके उकियात नाश यायेगु बल दइ।
17 वं थःगु देशयागु फुक्क बलनापं वयेगु क्वःछी अले दच्छिनया देशलिसे सन्धि याइ, अले व देश त्याका कायेत वं थः म्ह्याय् वयात ब्याहा यानाबी। अय्नं वयागु ग्वसाः ताःलाइ मखु, वयात ग्वाहालि नं दइ मखु।
18 लिपा वं समुद्र सिथय् लाःगु यक्व देशतय्त त्याकाकाइ। अय्नं छम्ह सेनापतिं वयागु तःधंछुयात नाश यानाबी। अले वयागु तःधंछु वयाथाय् हे लित छ्वयाबी।
19 लिपा व थःगु देशया किल्लातपाखे बिस्युं वनी, अय्नं लुफिं हानाः दइ, अले हाकनं गुबलें खने दइ मखु।
20 “वया लिपा मेम्ह छम्ह जुजु जुइ। वं कर कयाः मनूतय्त क्वत्यलाः थःगु देशया सम्पत्ति अप्वय्केगु ज्या यायेत छम्ह हाकिमयात छ्वइ। तर छुं ई लिपा सुयागुं तमय् व लडाइँलय् मलाय्क हे व नाश जुयावनी।
21 “हानं वयागु थासय् छम्ह तसकं क्वह्यंम्ह मनू वइ, न्हापा ला वयात जुजुयात दइगु हनाबना दइ मखु। तर शान्तिया इलय् व वाः मचाय्कः वइ अले वं ग्वसाः ग्वयाः व देशयात काइ।
22 अनंलि वं छगू बल्लाःगु सेनायात नाश याइ, अले बाचाया राजकुमारयात नं नाश याइ।
23 ध्वंलानाः वं थीथी सन्धि याइ, अय्नं छुं मनूतय्गु ग्वाहालिं जक व बल्लाइ।
24 वं आकाझाकां तःमिगु देशतय्त हमला याइ। अले वया पुर्खातय्सं मयाःगु ज्या वं याइ। वं थःम्हं लडाइँलय् लाकाहःगु धन-सम्पत्ति थः ल्यूल्यू वःपिन्त इनाबी। अले वं पलखया लागिं जक बबल्लाःगु किल्लातय् हमला यायेगु ग्वसाः ग्वइ।
25 “दच्छिनयाम्ह जुजुयात हमला यायेगु साहस यानाः वं यक्व व बल्लाःगु सेना दय्की। वलिसें ल्वायेत दच्छिनयाम्ह जुजुं नं ल्याः यक्व दुगु व बल्लाःगु सेना ज्वनाः तयार जुइ। तर दच्छिनयाम्ह जुजुयात ध्वं लाइ अले व लडाइँलय् बुइ।
26 वं नकातःपिन्सं नं वयात नाश यायेगु कुतः याइ। वया सेना लडाइँलय् बुइ, यक्व सिपाइँत लडाइँलय् सी।
27 इपिं निम्ह जुजुपिं मभिंगु बिचालं छगू हे टेबिलय् च्वनाः थःथवय् मखुगु खँ ल्हाइ, तर इमिगु मनसुवाः ताःलाइ मखु। क्वःछिनातःगु इलय् अन्त धात्थें हे वइ।
28 यक्व सम्पत्ति ज्वनाः उत्तरयाम्ह जुजु थःगु हे देशय् लिहांवनी तर वयागु नुगः पवित्र बाचाया विरोधय् जुइ। वं थुकिया विरोधय् ज्या याइ, अले थःगु देशय् लिहांवनी।
29 “क्वःछिनातःगु इलय् वं हानं दच्छिनय् हमला याइ, तर थुपालय्या लिच्वः न्हापायागु स्वयाः पाइ।
30 वयात हमला यायेत पच्छिमं जहाजत वइ, उकिं व नुगः क्वतुंकाः लिहां वनाः पवित्र बाचा मानय् याइपिन्त वं थःगु तं क्यनी। पवित्र बाचा त्वःतूपिन्त धाःसा दया क्यनी।
31 “वया सिपाइँतय्सं देगःयात अशुद्ध याइ, न्हियान्हिथं छाइगु बलि दिकी। इमिसं देगलय् घच्चायापुगु व ग्यानापुगु मूर्ति पलिस्था याइ।
32 बाचा त्वःतूपिन्त वं फुरफुरे यानाः स्यंकाबी। परमेश्वरयात मानय् याइपिन्सं धाःसा वयागु फुरफुरे याइगु खँ न्यनी मखु।
33 “बुद्धि दुपिं नायःतय्सं यक्व मनूतय्त स्यनेगु ज्या याइ। तर छुं ईया निंतिं इमित तरवारं स्याइ, मिं भस्म याइ, छुं मनूतय्त लुतय् याइ वा ज्वनाः यंकी।
34 इमिगु दुःखया इलय् इमित भचा ग्वाहालि ला दइ तर इमित ग्वाहालि ब्यूवइपिं आपालं मनूत थः कतिलाःसिं जुइ।
35 अन्तया ई तक शुद्ध जुइमा, यचुसे च्वनेमा अले ख्वं मदुपिं जुइमा धकाः छुं बुद्धि दुपिं नायःतय्सं दुःख सी। परमेश्वरं क्वःछिनादीगु अन्तया ई मवतले थुपिं खँ जुया हे च्वनी।
थःम्हं थःत तःधंकीम्ह जुजु
36 “व जुजुं थः यःथें यानाः थःत फुक्क द्यःत स्वयाः तःधंकी अले द्यःतय् नं परमेश्वरयात म्हुतु वाइ। परमेश्वरया तं क्वमलाःतले व ताःलाइ, छाय्धाःसा छु क्वःछ्यूगु खः व पूवने हे माः।
37 थः पुर्खातय् द्यःत वा मिस्तय्सं यय्कूम्ह द्यःयात नं वं वास्ता याइ मखु। वं सुं द्यःयात वास्ता याइ मखु, तर वं थःत इपिं फुक्क स्वयाः तःधंकी।
38 इमिगु पलेसा वं थः पुर्खातय्सं म्हमस्यूम्ह किल्लाया द्यःयात लुँ व वहः, मू वंगु ल्वहँत व थीकेथीकेगु देछात छायाः हनाबना याइ।
39 वं थ्व हे विदेशी द्यःया ग्वाहालिं दकलय् बबल्लाःगु किल्लाय् हमला याइ अले थःत मानय् याइपिन्त वं तःधंगु हनाबना बी। अज्याःपिं मनूतय्त वं यक्व मनूतय् शासक दय्की। अले सिरपाःकथं जमिन इनाबी।
40 “अन्तया इलय् दच्छिन देशयाम्ह जुजुं वलिसें लडाइँ याइ अले उत्तरयाम्ह जुजु नं बाः वःगु खुसि थें रथ, सलगइपिं मनूत व यक्व लः जहाजत ज्वनाः हमला याःवइ। थुकथं व यक्व देशय् न्यनावनी, अले उपिं देश जुयावनी।
41 वं व बांलाःगु देशय् नं हमला याइ। ल्वानाः यक्व देशत त्याकाकाइ। एदोम, मोआब व अम्मोनया नायःतय्त धाःसा वयागु ल्हातं बचय् याइ।
42 वं यक्व देशय् हमला याइ, मिश्र देशयात नं त्वःती मखु।
43 वं लिबियालीत व कूशीतय्त अधीनय् तयाः मिश्र देशयागु लुँ, वहः व फुक्क सम्पत्तिया धुकू अधिकार याइ।
44 अनंलि पुर्ब व उत्तरपाखें वइगु बुखँ न्यनाः व ग्याइ। तसकं तंचायाः वं यक्वसित नाश यायेत लिहां वइ।
45 वं समुद्रयागु व बांलाःगु पवित्र पर्वततय् दथुइ थःगु लाय्कू पालत ग्वइ। अय्नं व नाश जुइ, सुनानं वयात ग्वाहालि बी मखु।”