9
परमेश्वरं छाय् ग्वाहालि बियादी?
1 न्यँ, हे इस्राएल, छिपिं स्वयाः ततःधंगु व बल्लाःगु जातित अले ततःजाःगु व आकाश थ्यंक पखाः ग्वयातःगु ततःधंगु शहर त्याका कायेत छिपिं यर्दनया उखे वनेत्यंगु दु।
2 अनयापिं मनूत बल्लापिं व तःधिकःपिं अनाकीत खः। इमिगु खँ छिमिसं स्यू, अले इमिगु बारे थथे धाःगु नं छिमिसं न्यंगु दु, “अनाकीतय्गु न्ह्यःने दंवने फुम्ह सु दु?”
3 अय्नं थौं छिमिसं थ्व खँ बांलाक सीकि, ह्वाना ह्वाना च्यानाच्वंगु मि थें छिमिगु न्ह्यःने न्ह्यःने झाइम्ह परमप्रभु छिमि परमेश्वर हे खः। वय्कलं इमित नाश यानादी अले छिमिगु न्ह्यःने क्वत्यलादी। परमप्रभुं छिमित बचं बियादीगु थें छिमिसं इमित लिनाछ्वयाः याकनं हे नाश याइ।
4 परमप्रभु छिमि परमेश्वरं छिमिगु न्ह्यःने इमित पित छ्वयादी धुंकाः छिमिसं थःगु मनय् थथे धाये मते, “झीगु धार्मिकतां यानाः परमप्रभुं थ्व देशय् अधिकार यायेत झीत हयादीगु खः।” अथे मखु, इपिं जातितय्गु मभिंगु ज्यां यानाः परमप्रभुं इमित छिमिगु न्ह्यःनं लिनाछ्वयादी।
5 छिपिं भिंपिं व नुगः यचुपिं जूगुलिं इमिगु देश त्याका कायेत वनेत्यंगु मखु। अय्नं इमिसं याःगु मभिंगु ज्यां यानाः वय्कलं छिमि पुर्खा अब्राहाम, इसहाक व याकूबलिसें पाफयादीगु खँ पूवंकादीत परमप्रभु छिमि परमेश्वरं इमित छिमिगु न्ह्यःनं लिनाछ्वयादी।
6 अथे जुयाः छिमिगु भिंगु ज्यां यानाः थ्व भिंगु देश परमप्रभु छिमि परमेश्वरं छिमित ल्हातय् बियादीत्यंगु मखु धकाः ध्वाथुइकि। छिपिं ला जिराहा मनूत खः।
लुँयाम्ह द्वहंचाया मूर्ति लुमंकूगु
प्रस ३२
7 मरुभूमिइ छिमिसं गथे यानाः परमप्रभु छिमि परमेश्वरयात तं चाय्कागु खः, व खँ लुमंकि, अले गुबलें ल्वःमंके मते। छिपिं मिश्र त्वःता वःगु दिंनिसें थन थ्यंकः वःगु दिं तक छिमिसं परमप्रभुयागु विरोध याना हे च्वंगु दु।
8 होरेबय् नं छिमिसं परमेश्वरयात तसकं तंचाय्कल। अथे जुयाः वय्कलं छिमित भज्यंक नाश यानादीत्यंगु खः।
9 परमप्रभुं छिपिंलिसें चिनादीगु बाचाया ल्वहं पौ कायेत जि पहाडय् थाहां वना। अले पिइन्हु व पिइचा जि व पहाडय् च्वना। जिं मरि नं मनया लः नं मत्वना।
10 अबलय् परमप्रभुं जितः थःगु हे ल्हातं च्वयातःगु निपा ल्वहं पौ बियादिल। उकी वय्कलं छिपिं पहाडया क्वय् छथाय् मुंबलय् मिया दथुं धयादीगु खँ च्वयातःगु दु।
11 अले पिइन्हु व पिइचा बीधुंकाः परमप्रभुं बाचायागु उपिं निपा ल्वहं पौ जितः बियादिल।
12 परमप्रभुं जितः धयादिल, “आः थत्थें पहाडं क्वहां हुँ, छाय्धाःसा छं मिश्रं पित हःपिं मनूत स्यनावने धुंकल। जिं इमित बियागु आज्ञा इमिसं थत्थें हे त्वःताः इमिसं मूर्ति दय्कूगु दु।”
13 परमप्रभुं जितः धयादिल, “थुपिं मनूत गुलि जिराहा धकाः जिं स्यू। थुमित जिं स्वये धुन।
14 इमित नाश यायेत छं जितः पने मते। जिं इमिगु नां पृथ्वीं हे मदय्काः छ्वये। अले छपाखें हे इपिं स्वयाः तःधंगु व बल्लाःगु जाति दय्के।”
15 अथे जुयाः ल्हातय् बाचाया निपा ल्वहं पौ ज्वनाः जि पर्वतं क्वय् कुहां वया। उबलय् पहाडय् मि च्यानाच्वन।
16 अले छिमिसं परमप्रभु छिमि परमेश्वरया विरोधय् पाप यानाः थःगु निंतिं नाय्काः छम्ह द्वहंचाया मूर्ति दय्कूगु जिं खना। परमप्रभुं हुँ धकाः धयादीगु लँपुयात छिमिसं थुलि याकनं त्वःतावन।
17 अथे जुयाः जिं उपिं निपा ल्वहं पौ थःगु हे ल्हातं कयाः वांछ्वयाबिया, छिमिसं खंक हे तछ्यानाबिया।
मोशां इस्राएलीतय्गु निंतिं इनाप याःगु
18 छिमिसं परमप्रभुया मिखाय् पाप ज्या यानाः वय्कःयात तंचाय्कूगुलिं जि न्हापा थें पिइन्हु व पिइचा तक परमप्रभुया न्ह्यःने भ्वसुलाच्वना। जिं मरि मनया लः नं मत्वना।
19 परमप्रभुया तं खनाः जि ग्यात, छाय्धाःसा वय्कलं तसकं तंचायाः छिमित नाश हे यानादीत्यंगु खः। अय्नं उबलय् नं परमप्रभुं जिगु बिन्ति न्यनादिल।
20 परमप्रभु हारूनलिसे तसकं तंचायादिल, वय्कलं वयात तंम्वय् नाश यानादीत्यंगु खः। अय्नं उबलय् जिं हारूनया निंतिं नं प्रार्थना याना।
21 अनंलि जिं छिमिगु व पापं जाःगु बस्तु, छिमिसं दय्कूम्ह द्वहंचा कयाः मिइ छ्वय्काबिया, अले उकियात निनाः चुंचुं यानाः पर्वतं क्वहां वयाच्वंगु खुसिइ वांछ्वयाबिया।
22 छिमिसं तबेरा, मस्साह व किब्रोथ-हत्तावाय् नं परमप्रभुयात तंचाय्कल।
23 परमप्रभुं छिमित कादेश-बर्नेनं थथे धयाः छ्वयादिल, “वनाः जिं छिमित बियागु देश अधिकार या।” अय्नं छिमिसं परमप्रभु छिमि परमेश्वरया आज्ञायागु विरोध यात। अले छिमिसं वय्कःयात पत्याः नं मया, वय्कःया खँ नं मन्यं।
24 जिं छिमित म्हस्यूबलय्निसें हे न्ह्याबलें छिमिसं परमप्रभुया विरोध याःगु दु।
25 परमप्रभुं छिमित नाश याये धकाः धयादीगुलिं परमप्रभुया न्ह्यःने जि पिइन्हु व पिइचा तक भ्वसुलाच्वना।
26 जिं प्रार्थना यानाः धया, “हे परमप्रभु परमेश्वर, छिं ल्ययादीपिं थःगु तःधंगु बलं त्वःतकाः बल्लाःगु ल्हातं मिश्रं पित हयादीपिं थः मनूतय्त व थःगु सर्बययात नाश यानादी मते।
27 थः च्यःपिं अब्राहाम, इसहाक व याकूबयात लुमंकादिसँ। थुपिं मनूतय्गु जिराहा, मभिंगु ज्या व पापपाखे स्वयादी मते,
28 मखुसा मिश्रीतय्सं थथे खँ ल्हाइ, ‘परमप्रभुं बचं बियादीगु देशय् इमित यंके मफुगुलिं अले इमित यय्कामदीगुलिं वय्कलं इमित मरुभूमिइ स्यायेत यंकादिल।’
29 अय्नं थःगु तःधंगु बलं व थःगु चकंगु लप्पूं पित हयादीपिं थुपिं मनूत छिगु हे प्रजा व छिगु थःगु हे सर्बय खः।”