17
निम्ह इमाया बाखं
1 परमप्रभुयागु थ्व वचन जिथाय् वल,
2 “अय् सीमानिम्ह मनू, इस्राएलया घरानायात थ्व बाखं व उखान धा,
3 इमित धा, ‘परमप्रभु परमेश्वरं थथे धयादी – बल्लाःगु पपू व ताहाकःगु रंगिबिरंगी पा दुम्ह छम्ह तःधीम्ह इमा लेबनानय् ब्वयाः वल, अले वं छपु देवदारुया दकलय् च्वय्च्वंगु च्वका ज्वन।
4 वं व कचायात त्वथुलाः ब्यापारीतय्गु छगू देशय् यंकाः ब्यापार याइपिनिगु छगू शहरय् पित।
5 “ ‘अनंलि वं छिमिगु देशया छुं पुसा यंकाः नायुगु जमिनय् पित। वं बैँसया सिमा थें यक्व लः दुगु थासय् व पित।
6 अले व चुलि ह्वयाः चिजाःगु चकंगु मा जुल। उकिया कचात उम्ह इमापाखे स्वल तर उकिया हा धाःसा उकियागु हे क्वय् च्वन। उकिं व दाखया मा जुल अले उकियागु कचात बुयावल अले उकी यक्व हः पिहां वल।
7 “ ‘तर अन बल्लाःगु पपू व यक्व पा दुम्ह मेम्ह छम्ह तःधीम्ह इमा दु। आः व दाखया मां थःत पिनातःगु थासं थःगु हा व पाखे छ्वल, अले लःया निंतिं थःगु कचात उम्ह इमापाखे चक्कंकल।
8 उकी कचात सया वयेमा, अले फल सय्काः व छगू बांलाःगु दाखमा जुइमा धकाः उकियात यक्व लः दुगु छगू नायुगु जमिनय् पिनाब्यूगु खः।’
9 “इमित धा, ‘परमप्रभु परमेश्वरं थथे धयादी – व तःमा जुयामवइ ला? उकियात हांनिसें लिना मकाइ ला? अले उकियागु फल मखाइ ला, अले व सुकूमगनी ला? उकियागु फुक्क चुलि सुकूगनावनी। उकियात हांनिसें लिनाकायेत तसकं बल्लाःगु ल्हाः अथवा यक्व मनूत माली मखु।
10 उकियात मेथाय् तःसां छु व तःमा जुइ ला? पुर्बयागु फसं कय्के धुंकाः व फुक्क सुकूगनामवनी ला, व बुयावःगु थासय् हे सुकूगनामवनी ला?’ ”
उखानया अर्थ कंगु
11 परमप्रभुयागु थ्व वचन जिथाय् वल,
12 “थ्व विद्रोही घरानायात धा, ‘छु! छिमिसं थ्व खँया अर्थ मस्यू ला?’ इमित धा, ‘बेबिलोनयाम्ह जुजु यरूशलेमय् वल अले अनयाम्ह जुजु व भारदारतय्त थःनापं बेबिलोनय् हल।
13 वं जुजुया वंशयापिं मध्ये छम्हय्सित कयाः वयात पाफय्काः वलिसें सन्धि यात। अले देशयापिं मू मू मनूतय्त वं यंकल।
14 उगु राज्य वयागु अधीनय् च्वनेमा, अले हाकनं दने मफयेमा अले वयागु सन्धिया वचन पालन याना जक व दयाच्वनेमा धकाः वं थथे याःगु खः।
15 तर जुजुं सलत व तःधंगु सेना कयाहयेत मिश्र देशय् दूतत छ्वयाः वयागु विरोधय् विद्रोह यात। छु व ताःलाइ ला? थज्याःगु ज्या याइम्ह छु व बचय् जुइ ला? सन्धि त्वाःथलाः नं छु व सजाँयपाखें बचय् जुइ ला?
16 “ ‘गथे जि धात्थें म्वाःम्ह खः, जि, परमप्रभु परमेश्वरं धाये, व बेबिलोनय् सी। वयात बेबिलोनयाम्ह जुजुं गद्दीइ तःगु खः, वं वलिसें पाफःगु खँयात हेला याःगु खः, अले वं वलिसें याःगु सन्धि त्वाःथूगु खः।
17 बेबिलोनयाम्ह जुजुं यरूशलेमयापिं यक्व मनूत स्यायेत ल्वहं व चायागु द्वम्बःचा थनाः घेरय् याइबलय् थःके तःधंगु सेना व यक्व सिपाइँत दुम्ह फारों नं वयात ग्वाहालि याये फइ मखु।
18 वं बाचा त्वाःथल, अले पाफःगुयात हेला यात, बचं बियाः नं वं थ्व फुक्क याःगुलिं व बचय् जुइ मखु।
19 “ ‘अथे जुयाः परमप्रभु परमेश्वरं थथे धयादी – वं जिलिसें पाफःगुयात हेला यात अले जिगु बाचा त्वाःथल, उकिं गथे जि धात्थें म्वाःम्ह खः, जिं वयात सजाँय बी।
20 जिं वयागु विरोधय् थःगु जाः ह्वले, अले व जिगु जालय् लाइ। जिं वयात बेबिलोनय् हये, वं जितः विश्वासघात याःगुलिं जिं वयागु इन्साफ याये।
21 वया सकलें बिस्युं वंपिं दक्वसिबय् बांलाःपिं सिपाइँतय्त तरवारं स्याइ, म्वानाच्वंपिं प्यखें छ्यालब्याल जुइ। अले छिमिसं जि परमप्रभुं हे थ्व खँ धाःगु खः धकाः सी।’
22 “परमप्रभु परमेश्वरं थथे धयादी – जिं थःम्हं हे देवदारुया च्वकां छपु चुलि कयाः उकियात पी। जिं उकिया दकलय् च्वय्यागु कचां छपु क्यातूगु चुलि लिकयाः थुकियात तज्जाःगु व च्वय् थ्यंक थ्यंगु पहाडय् पी।
23 इस्राएलया पहाडया च्वका च्वकाय् जिं व पी। उकिया कचात दइ अले वं फल सय्की, अले व छमा देवदारुया बांलाःगु सिमा जुइ। फुक्क कथंयापिं झंगःपन्छितय्सं उकी स्वँ दय्की, अले उकिया किचलय् इपिं च्वनी।
24 गुँयागु फुक्क सिमातय्सं तःमागु सिमायात चीमागु याइम्ह, चीमागु सिमायात तःमागु याइम्ह, वाउँगु सिमायात गंकाबीम्ह अले गंगु सिमायात वाउँकाबीम्ह जि परमप्रभु हे खः धकाः गुँयागु फुक्क सिमातय्सं सी।
“ ‘जि परमप्रभुं हे धयागु खः, व जिं या हे याये।’ ”