21
परमेश्वरया न्याययागु तरवार
1 परमप्रभुयागु थ्व वचन जिथाय् वल,
2 “अय् सीमानिम्ह मनू, थःगु ख्वाः यरूशलेमपाखे स्वय्काः पवित्र थाय्या विरोधय् अगमवाणी ल्हा! इस्राएल देशया विरोधय् अगमवाणी ल्हा,
3 वयात थथे धा, ‘परमप्रभुं थथे धयादी, स्व! जि छंगु विरोधय् दु। जिं दापं थःगु तरवार लिकयाः छिपिं मध्ये धर्मी व दुष्ट निखलःसितं स्यानाबी।
4 धर्मी व दुष्ट निखलःसित जिं खतम यानाबी, अथे जुयाः दच्छिनंनिसें उत्तर तक फुक्कसिगु विरोधय् जिगु तरवार दापं पिहां वइ।
5 थुकथं जि, परमप्रभुं हे थःगु तरवार दापं लिकाःगु खः धकाः फुक्कसिनं सी। व दापय् हाकनं लिहांवनी मखु।’
6 “अय् सीमानिम्ह मनू, झसुका ति! ख्वःगु नुगलय् तसकं दुःख चायाः इमिगु न्ह्यःने झसुका ति!
7 अले इमिसं छन्त ‘छं छाय् झसुका तयाच्वनागु’ धकाः न्यन धाःसा थथे लिसः ब्यु, ‘वयाच्वंगु खबरं यानाः सकसिगु नुगः खाइ अले सकसिगु ल्हाः याताप्याता जुइ। सकसिगु नुगः क्वतुनी अले सकसिगु पुलि लः थें याग्लाप्याग्ला जुइ। स्व! थथे जुइत्यंगु दु, अले थथे हे जुइ,’ जि, परमप्रभु परमेश्वरं थथे धाये।”
8 हाकनं परमप्रभुयागु थ्व वचन जिथाय् वल,
9 “अय् सीमानिम्ह मनू, अगमवाणी ल्हानाः थथे धा, ‘परमप्रभुं थथे धयादी,
“ ‘छपु तरवार, ज्वय्कातःगु तरवार
व प्वालप्वाल थीकातःगु तरवार,
10 स्यायेत ज्वय्कातःगु,
हाबलासा थें प्वालाक्क च्यायेत थीकातःगु।
“ ‘छु! जिपिं जिम्ह काय् यहूदाया राजदण्डय् लय्तायेगु ला? तरवारं ला अज्याःगु फुक्क कथियात हेला याइ।
11 “ ‘तरवारयात छ्यलेत प्वालप्वाल थीकल अले ज्वय्कल,
ल्हातय् ज्वनेत,
व स्याइम्हय्सिगु ल्हातय् बीत तयार याःगु दु।
12 अय् सीमानिम्ह मनू, तसलं ख्वयाः बिलाप या!
छाय्धाःसा थ्व जिगु प्रजाया विरोधय् दु।
थ्व इस्राएलया फुक्क शासकतय्गु विरोधय् दु।
इमित जिम्ह मनूतनापं हे तरवारया अधीनय् ब्यूगु दु।
उकिं छाति दा!
13 “ ‘धात्थें हे परीक्षा वइ, अले तरवारं हे हेला याइगु यहूदाया राजदण्ड हे दया मच्वन धाःसा? परमप्रभु परमेश्वरं धयादी।’
14 “उकिं अय् सीमानिम्ह मनू,
अगमवाणी ल्हा, ल्हातं ल्हातय् दा।
तरवार, खः, तरवारं निकः तक पालेमा!
खः, स्वकः तक नं!
थ्व तरवार स्याये पालेत खः।
तःधंगु नाशया निंतिं फुक्कपाखें वं इमित घेरय् याइ।
15 मनूतय्गु नुगः ग्यानाः नाया वनेमा,
अले यक्व मनूत क्वःदयेमा धकाः
इमिगु फुक्क मू ध्वाखाय् स्याये पालेत
जिं तरवार तयागु दु।
हाबलासा थें थीत उकियात दय्कूगु दु,
उकियात स्याये पालेत ज्वनी।
16 अय् तरवार, छंगु धाः गुखेपाखे स्वःगु दु,
जवपाखे कि खवपाखे,
छ उखेपाखे हुँ!
17 जिं नं ल्हातं ल्हातय् दाये,
अले जिगु तं क्वलाइ।
जि परमप्रभुं हे धयागु खः।”
बेबिलोनयाम्ह जुजुं ज्वखना स्वइ
18 परमप्रभुयागु थ्व वचन जिथाय् वल,
19 “अय् सीमानिम्ह मनू, बेबिलोनयाम्ह जुजु तरवार ज्वनाः वइगु निपु लँय् चिं ति। थुपिं निपु लँ छगू हे देशं शुरु जूगु जुइ, उकिया दोबातय् छगू नां च्वइगु थां ति।
20 छं अम्मोनीतय्गु रब्बा शहरय् तरवार वयेत छपु लँ व यहूदा अले किल्ला दुगु यरूशलेम शहरय् तरवार वयेत छपु लँ ल्य!
21 छाय्धाःसा बेबिलोनयाम्ह जुजु ज्वखना स्वयेत निपु लँ बायावनीगु थासय् दोबातय् दनी। वं वाणत चिट्ठा तइ, वं थः मूर्तितलिसें सल्लाह काइ, वं पशुया स्येँ जाँचय् याइ।
22 पःखाः तछ्याइगु ततग्वःगु धलिंत तयेत, तसलं स्याये पालेत आज्ञा बीत, लडाइँया सः न्यंकेत, ध्वाखा तछ्यायेत तग्वःगु धलिं तयेत, द्वम्बःचा थकायेत व घेरय् याइगु चाया पःखाः दय्केत वयागु जव ल्हातय् यरूशलेमया चिट्ठा लाइ।
23 यरूशलेमयापिं मनूतय्सं थ्व मखुगु ज्वखनाः खः धकाः बिचाः याइ, छाय्धाःसा इमिसं बेबिलोनियानापं सन्धि याःगु खः। तर बेबिलोनियायाम्ह जुजुं इमिगु दोष लुमंकी अले हमला यानाः इमित ज्वनी।
24 “उकिं परमप्रभु परमेश्वरं धयादी, ‘तःकः मछि हे छिमिसं छिमिगु पाप व अपराध जितः लुमंकाब्यूगु दु। छिमिसं थुकियात सुचुकेगु तक नं मयाः। छिमिसं याःगु फुक्क खँय् छिमिसं थःगु पाप क्यनी। उकिं यानाः हे छिमित शत्रुतय्सं ज्वना यंकी।
25 “ ‘अय् इस्राएलयाम्ह अपवित्र व दुष्ट शासक, छंगु लिपांगु दिं व सजाँयया ई थ्यंकः वःगु दु।
26 परमप्रभु परमेश्वरं थथे धयादी – फेटा लिका! मुकुट नं त्वः! आः हाकनं छुं खँ न्हापा थें जुयाच्वनी मखु। चिधंपिन्त तःधंकीगु जुइ, अले तःधंपिन्त चिधं याइ।
27 नाश! नाश! जिं थ्व शहरयात सत्यानाश यानाबी। थ्व शहरयात न्याय यायेगु अधिकार दुम्ह मवतले हाकनं थ्व शहरयात दय्की मखु। व वये धुंकाः जिं वयात थ्व लःल्हानाबी।’ ”
अम्मोनीतय्गु विरोधय् अगमवाणी
28 “अय् सीमानिम्ह मनू, छं अगमवाणी यानाः धा, ‘अम्मोनीत व इमिगु अपमानया बारे परमप्रभु परमेश्वरं थथे धयादी,
“ ‘छपु तरवार, छपु तरवार,
दापं स्याये पालेत लिकाःगु दु।
हाबलासा थें प्वालाक्क च्यायेत
व थीकातःगु दु।
29 छंगु बारे मखुगु दर्शन खंसां तबि,
छंगु लागि मखुगु ज्वखना स्वःसां तबि
उपिं स्याये हे माःपिं दुष्टत,
गुपिनिगु दिं वये धुंकल,
गुपिनिगु लिपांगु सजाँयया ई वये धुंकल,
इमिगु ककुइ पालेत व तरवारयात छ्यलीगु जुइ।
30 “ ‘व तरवार दापय् ति!
अय् तरवार, छन्त दय्कूगु थासय् हे,
छं पुर्खातय्गु देशय् हे
जिं छंगु इन्साफ याये।
31 जिं थःगु तं छंके प्वंके।
जिगु च्याःगु तंया मि छंगु विरोधय् पिकाये।
जिं छन्त नाश याये सःपिं
व दयामदुपिं मनूतय्गु ल्हातय् बी।
32 छ मिया लागि सिँ जुइ।
छंगु हि छंगु हे देशय् बाः वइ।
छन्त हाकनं गुबलें लुमंकीगु जुइ मखु,
छाय्धाःसा जि परमप्रभुं हे थ्व खँ धयागु खः।’ ”