25
जाति जातिया विरोधय् अगमवाणी २५-३२
अम्मोनया बारे अगमवाणी
1 परमप्रभुयागु थ्व वचन जिथाय् वल,
2 “हे सीमानिम्ह मनू, अम्मोनीतपाखे थःगु ख्वाः स्वय्काः इमिगु विरोधय् अगमवाणी ल्हा।
3 इमित धा, ‘अय् अम्मोनीत, परमप्रभु परमेश्वरयागु वचन न्यँ। परमप्रभु परमेश्वरं थथे धयादी – जिगु पवित्र थाय्यात अपवित्र याःबलय्, इस्राएल देशयात तहसनहस याःबलय् अले यहूदायापिं मनूतय्त ज्वनायंकूबलय् छिमिसं “आहा, आहा!” धाल।
4 उकिं जिं छिमित पुर्बयापिं मनूतय्गु ल्हातय् सम्पत्ति थें लःल्हानाबी। इमिसं छिमिगु दथुइ छाउनी तइ अले छिमिगु हे दथुइ थःगु पाल ग्वइ। इमिसं छिमिगु फल नइ अले छिमिगु दुरु त्वनी।
5 जिं रब्बा शहरयात ऊँटत च्वनीगु थाय् व अम्मोन देशयात फै-च्वलय् च्वनीगु थाय् दय्काबी। अले छिमिसं जि हे परमप्रभु खः धकाः सी।
6 परमप्रभु परमेश्वरं थथे धयादी – छिमिसं इस्राएल देशया विरोधय् ल्हाःपा थाःगु व प्याखं हुगु दु, छिमिगु नुगलय् दुगु ईखया कारणं छिपिं लय्ताःगु दु।
7 उकिं जिं थःगु ल्हाः छिमिगु विरोधय् ल्ह्वने, अले छिमित जाति जातितय्गु ल्हातय् लुतया सामान थें बी। जाति जातितय्गु दथुं छिमिगु नां तक नं मदय्काबी अले देश देशं छिमित नाश यानाबी। जिं छिमित भज्यंक नाश यानाबी अले छिमिसं जि हे परमप्रभु खः धकाः सी।’ ”
मोआबया बारे अगमवाणी
8 “परमप्रभु परमेश्वरं थथे धयादी, ‘मोआब व सेइरं थथे धाःगु दु, “स्व, यहूदाया घराना ला मेगु फुक्क जातित थें जूगु दु।”
9 उकिं जिं मोआबया पच्छिमयागु सिमानाय् हमला याकेबी। थुकी दुने मोआबया बांबांलाःगु शहरत बेथ-यशीमोत, बालमोन व किर्यातैम शहर नं लाः।
10 जिं मोआब व अम्मोनीतय्त पुर्ब देशयागु अधीनय् बी। अनंलि हाकनं अम्मोन छगू जाति जुयाच्वनी मखु।
11 जिं मोआबयात सजाँय बी। अले इमिसं जि हे परमप्रभु खः धकाः सी।’ ”
एदोमया बारे अगमवाणी
12 “परमप्रभु परमेश्वरं थथे धयादी, ‘एदोमं यहूदाया घरानालिसें बदला काल। अथे याःबलय् व अज्ज अप्वः दोषी जुल।
13 उकिं परमप्रभु परमेश्वरं थथे धयादी – जिं एदोमया विरोधय् थःगु ल्हाः ल्ह्वनाः अनयापिं मनूत व पशुतय्त स्यानाबी। जिं उकियात तहसनहस यानाबी, अले तेमानंनिसें ददान तक हे इमित तरवारं स्याइ।
14 जिं थः प्रजा इस्राएलपाखें एदोमयात बदला काये। थुमिसं जिगु तं व झ्वँक कथं एदोमयात व्यवहार याइ। अले थुमिसं जिगु बदला गय् च्वं धकाः सी, परमप्रभु परमेश्वरं धयादी।’ ”
पलिश्तीतय्गु बारे अगमवाणी
15 “परमप्रभु परमेश्वरं थथे धयादी, ‘पलिश्तीतय्सं बदला कायेगु ज्या यात, थःगु नुगलय् ईख तयाः बदला कायेगु ज्या यात, अले पुलांगु दुश्मनी कयाः यहूदायात नाश यायेत स्वल।
16 उकिं जि, परमप्रभु परमेश्वरं धाये – जिं पलिश्तीतय्गु विरोधय् थःगु ल्हाः ल्ह्वने त्यनागु दु, जिं करेतीतय्त खतम यानाबी, समुद्र सिथय् ल्यनाच्वंपिन्त नाश यानाबी।
17 जिं इमित तसकं ग्यानापुक बदला काये। थःगु तम्वय् इमित सजाँय बी अले जिं इमिके बदला काये धुंकाः इमिसं जि हे परमप्रभु खः धकाः सी।’ ”