28
टुरोसयाम्ह जुजुया विरोधय् अगमवाणी
1 परमप्रभुयागु थ्व वचन जिथाय् वल,
2 “अय् सीमानिम्ह मनू, टुरोसयाम्ह जुजुयात धा, ‘परमप्रभु परमेश्वरं थथे धयादी –
“ ‘छं तःधंछुयाः थथे धाःगु दु, जि छम्ह द्यः खः,
जि समुद्रया दथुइ द्यःयागु सिंहासनय् च्वंच्वनागु दु।
तर छ छम्ह मनू जक खः, द्यः मखु,
खः ला, छं थःत द्यः ति हे बुद्धिमान ताय्कूगु दु।
3 छु छ दानिएल स्वयाः बुद्धि दुम्ह खः ला?
छु छपाखें छुं रहस्य सुलाच्वंगु मदु ला?
4 छंगु बुद्धि व दुग्यानं छं थःगु निंतिं यक्व धन-सम्पत्ति कमय् याःगु दु,
छं थःगु धुकुतिइ लुँ व वहः मुंकूगु दु।
5 छं तःधंगु बुद्धि व व्यापारं थःगु धन-सम्पत्ति अप्वय्कूगु दु।
छंगु धन सम्पत्तिं यानाः छंगु मन तःधंछूगु दु।
6 “ ‘उकिं परमप्रभु परमेश्वरं थथे धयादी –
“ ‘छं थःत छम्ह बुद्धि दुम्ह
द्यः ताय्कूगु दु।
7 अथे जुयाः जाति जातित मध्ये
दकलय् सास्ती याइपिं विदेशीतय्त जिं छन्थाय् हये।
इमिसं थःगु तरवार छंगु बांलाःसू व अजू चाइपुगु बुद्धिया विरोधय् चले याइ,
छंगु गौरवयात स्यंकाबी।
8 इमिसं छन्त मृत्यु लोकय् क्वकाइ
अले छ समुद्रया दथुइ ग्यानापुक सी।
9 छु छन्त स्याइपिनिगु न्ह्यःने छं अज्ज नं “जि द्यः खः” धकाः धायेगु ला?
छन्त स्याइपिनिगु ल्हातय् छ द्यः मखु, मनू जक जुइ।
10 विदेशीतय्गु ल्हातं छन्त
छम्ह म्हय् चिं मतःम्ह मनूयात थें स्याइ।
“ ‘जिं थ्व खँ धयागु खः, परमप्रभु परमेश्वरं धयादी।’ ”
टुरोसयाम्ह जुजुया निंतिं बिलापया म्ये
11 हाकनं परमप्रभुयागु थ्व वचन जिथाय् वल,
12 “अय् सीमानिम्ह मनू, टुरोसयाम्ह जुजुया बारे बिलापया म्ये दय्काः वयात धा, ‘परमप्रभु परमेश्वरं थथे धयादी,
“ ‘छंके सिद्धया चिं तःगु खः,
छ तसकं बांलाःम्ह व बुद्धिं जाःम्ह खः।
13 छ ला परमेश्वरया क्यब
अदनय् दुम्ह खः,
छन्त फुक्क मू वंगु थीनं बांलाकःगु दु –
कार्नेलेन, पुखराज, पन्ना,
पुष्पराज, आनिक्स, बिल्लौर,
नीलम, यू व फिरोजां, छ बांलाकाच्वंगु दु।
छंगु मणिक्ययात लुं हिनातःगु दु।
छन्त दय्कू खुन्हु हे उमित तयार याःगु खः।
14 सुरक्षा बीम्ह करूब जुइत छन्त अभिषेक याःगु खः,
जिं छन्त थ्व पद बियागु खः।
छ परमेश्वरया पवित्र पर्वतय् दुगु खः।
छ मि थें थीगु ल्वहंतय्गु दथुइ थुखे उखे जुइगु खः।
15 जिं छन्त दय्काबलय् निसें छंगु अधर्म मलूतले
छ थःगु फुक्क पहःचहलय्
दोष मदुम्ह जुल।
16 तर यक्व थासय् दुगु व्यापारया कारणं
ल्वापुख्यापुं जायाः
छ पापी जुल।
उकिं जिं छन्त परमेश्वरया पर्वतं अपमान यानाः कुतुकाछ्वया,
हे सुरक्षा बीम्ह करूब,
जिं छन्त मि थें थीगु ल्वहंतय्गु दथुं नाश याना।
17 थः बांलाःगुलिं छंगु मन तःधंछुयाः,
वैभवं यानाः छंगु बुद्धि स्यनावन।
जिं छन्त बँय् वांछ्वयाबिया,
जिं छन्त जुजुपिनिगु न्ह्यःने इमित क्यनेत तयाबिया।
18 छंगु यक्व पाप व बेइमान व्यापारपाखें
छं छंगु पवित्रगु थाय् अशुद्ध यात।
थुकिं यानाः जिं छपाखें हे मि पिकयाबिया,
उकिं हे छन्त भस्म यात।
छन्त क्वथीक स्वइपिं सकसिगु न्ह्यःने
जिं छन्त जमिनय् नौ यानाबिया।
19 जाति जातियापिं छन्त म्हस्यूपिं
छ खनाः वातां जूगु दु।
छंगु अन्त ग्यानापुक जुइत्यंगु दु,
छ हाकनं गुबलें दइ मखुत।’ ”
सीदोनया विरोधय् अगमवाणी
20 परमप्रभुयागु थ्व वचन जिथाय् वल,
21 “अय् सीमानिम्ह मनू, थःगु ख्वाः सीदोनपाखे स्वय्काः वयागु विरोधय् थ्व अगमवाणी ल्हा,
22 अले थथे धा, ‘परमप्रभु परमेश्वरं थथे धयादी,
“ ‘हे सीदोन, जि छंगु विरोधय् दु,
छंगु दुने हे जिं महिमा काये।
जिं वयात सजाँय बीबलय्
छं जि हे परमप्रभु परमेश्वर खः धकाः सी।
अले जिं थःगु पवित्रता वयागु दुने हे क्यने।
23 जिं छन्थाय् महामारी छ्वये,
छंगु गल्लि गल्लिइ जिं हिबाः वय्काबी।
छंगु प्यखेरं वयागु तरवार चले जुइ,
अले छंगु दुने हे स्याःपिं क्वःदली।
अले छं जि हे परमप्रभु खः धकाः म्हसी।’ ”
इस्राएलया बारे अगमवाणी
24 “ ‘आवंलि इस्राएलयापिं मनूतय् सिउँडी व च्वामुगु कँ दुपिं ईख याइपिं जःलाखःलात दइ मखुत। अले इमिसं जि हे परमप्रभु परमेश्वर खः धकाः सी।
25 “ ‘परमप्रभु परमेश्वरं थथे धयादी – जात जातितय् दथुइ छ्यालब्याल जूपिं इस्राएलयापिं मनूत जिं मुंके, अले जाति जातितय्गु न्ह्यःने जिं थःम्हं थःत छिमिगु दथुइ पवित्र क्यने। अले जिम्ह दास याकूबयात जिं बियागु इमिगु थःगु हे देशय् इपिं च्वनी।
26 अन इपिं सुरक्षित जुयाः याउँक च्वनी, इमिसं छेँ दय्की अले दाखक्यब दय्की। इमित मयय्कीपिं सकसितं जिं सजाँय बी, अले इपिं सुरक्षित जुइ। अले इमिसं जि हे परमप्रभु खः धकाः सी।’ ”