33
इजकिएलयात इस्राएलीतय् पिवाः ल्यःगु
1 परमप्रभुयागु थ्व वचन जिथाय् वल,
2 “अय् सीमानिम्ह मनू, थः देशय् च्वंपिं मनूतनापं खँ ल्हाः, अले इमित थथे धा, ‘देशया विरोधय् जिं छगू सेना हयेबलय्, अले उगु देशयापिं मनूतय्सं थःपिं मध्ये छम्हय्सित पिवाः च्वनेत ल्यइबलय्,
3 पिवाः च्वंम्ह मनुखं शत्रुत वयाच्वंगु खनाः मनूतय्त सुचं बीत तुरही पुल धाःसा
4 सुनानं तुरहीया सः न्यनाः नं ध्यान मबिल वा शत्रुत वयाः वयात स्यात धाःसा व सीगुया दोषी व हे जुइ।
5 वं तुरहीया सः न्यना नं सुचंयात वास्ता मयाःगुलिं वयागु हि वयागु हे छेनय् लाइ। वं सुचं मानय् याःगु जूसा बचय् जुइगु खः।
6 तर शत्रुत वयाच्वंगु खनाः नं उम्ह पिवाः च्वंम्हय्सिनं सुचं बीत तुरही मपुल धाःसा अले शत्रुत वयाः सुं छम्हय्सित स्यात धाःसा उम्ह मनू थःगु हे पापया कारणं सीगु जुइ, तर व मनू सीगुया ल्याःचाः जिं पिवाः च्वंम्हय्सिके काये।’
7 “अय् सीमानिम्ह मनू, जिं छन्त इस्राएलया घरानाया पिवाः यानागु दु। उकिं जिं आः धयाच्वनागु खँ न्यँ, अले इमित जिगुपाखें ख्याच्वः ब्यु!
8 जिं छम्ह मभिंम्ह मनूयात ‘हे मभिंम्ह मनू, छ धात्थें हे सी’ धकाः धायेबलय् तर वयागु ज्यान बचय् यायेत छं ख्याच्वः मबिल, वा वयागु मभिंगु पहःचहःया लागि वयागु विरोधय् सल्लाह मबिल धाःसा व मनू पापया कारणं सी, अले वयागु हियागु ल्याःचाः जिं छंके काये।
9 तर छं व मभिंम्ह मनूयात ख्याच्वः बिल अले व थःगु मभिंगु ज्यापाखें वा थःगु मभिंगु पहःपाखें लिहां मवल धाःसा व थःगु अधर्मय् हे सी, तर छं धाःसा थःम्हं थःत बचय् याइ।”
पिवाःया बुखँ
10 “अय् सीमानिम्ह मनू, इस्राएलया घरानायात धा, ‘छिमिसं थथे धयाच्वंगु दु, “जिमिगु पाप व अपराधं जिमित क्वत्यलातःगु दु। उकिं यानाः जिपिं बमलाना वनाच्वंगु दु। जिपिं गथे यानाः म्वानाच्वनेगु?” ’
11 उकिं छं इमित थथे धा, ‘गथे जि धात्थें म्वाःम्ह खः, जि, परमप्रभु परमेश्वर न्ववानागु दु, मभिंपिं मनूत सीगु खनाः जि लय्ताय् मखु, तर इमिसं थःगु मभिंगु पहःचहः त्वःताः इपिं म्वाःगु जितः स्वयेमास्ति वः। थःगु मभिंगु पहःचहः त्वःति! अय् इस्राएलया घराना छिपिं छाय् सीगु?’
12 “अथे जुयाः अय् सीमानिम्ह मनू, छिमि मनूतय्त धा, ‘सुं धर्मीम्ह मनुखं आज्ञा पालन मयात धाःसा इमिगु भिंगु ज्यां इमित बचय् याये फइ मखु, सुं मनुखं मभिंगु ज्या यायेगु त्वःतल धाःसा इमित इमिसं न्हापा याःगु मभिंगु ज्याया सजाँय जुइ मखु। सुं धर्मीम्ह मनुखं अपराध यात धाःसा वं याःगु न्हापायागु धार्मिकतां वयात बचय् याकेबी मखु।’
13 जिं उम्ह धर्मीम्ह मनूयात ‘छ धात्थें म्वाइ’ धकाः धाइबलय् वं थःगु धार्मिकताय् भलसा तयाः मभिंगु ज्या यात धाःसा वयागु छुं नं धार्मिकताया ज्यायात लुमंकीगु जुइ मखु। वं याःगु मभिंगु ज्याया कारणं हे व सी।
14 जिं मभिंम्ह मनूयात ‘छ धात्थें सी’ धकाः धाइबलय् वं थःगु पाप त्वःताः न्याययागु व खःगु ज्या यात धाःसा,
15 धाये कि, वं त्यासा ब्यूबलय् कयातःगु बरः लित बिल, थःम्हं खुयायंकूगु सामान लित बिल, अले जीवन बीगु नियम मानय् यात व मभिंगु ज्या मयात धाःसा व धात्थें म्वाइ, व सी मखु।
16 वं याःगु न्ह्यागु नं पाप वयागु विरोधय् लुमंकीगु जुइ मखु। वं न्याय व खःगु ज्या याःगु दु, व धात्थें हे म्वाइ।
17 “अय्नं छिमि मनूतय्सं थथे धयाच्वंगु दु, ‘परमप्रभुया चाला थीक मजू।’ तर इमिगु हे चाला ठीक मजू।
18 सुं धर्मीम्ह मनुखं थःगु धार्मिकता त्वःताः मभिंगु ज्या यात धाःसा धात्थें हे व सी।
19 सुं मभिंम्ह मनुखं थःम्हं यानावयाच्वंगु मभिंगु ज्या त्वःताः न्याय व खःगु ज्या यात धाःसा उकिया कारणं व म्वाइ।
20 तर अय् इस्राएलया घराना, छिमिसं धाइ, ‘परमप्रभुं खःगु ज्या यानामदी।’ जिं छम्ह छम्ह मनूया न्याय वयागु पहःचहःकथं याये।”
यरूशलेम नाश जूगु खबर
21 जिमित ज्वनाहःगु झिंनिगूगु दँया झिगूगु लाया न्यान्हु दुखुन्हु यरूशलेमं बिस्युं वःम्ह छम्ह मनुखं जिथाय् वयाः धाल, “शहर नाश जुल।”
22 व मनू थ्यंकः वःगु दिंया छन्हु न्ह्यःयागु सन्ध्याकाः इलय् परमप्रभुया शक्ति जिके वल। सुथय् व मनू थ्यंकः वये न्ह्यः वय्कलं जिगु म्हुतु चाय्काबिल। उकिं जिगु म्हुतु चाल, उबलय् निसें जि सुम्क मच्वना।
23 परमप्रभुया वचन जिथाय् वल,
24 “अय् सीमानिम्ह मनू, नाश जूगु इस्राएल देशय् च्वनाच्वंपिं मनूतय्सं धयाच्वंगु दु, ‘अब्राहाम छम्ह हे जक मनू जूसां वं इस्राएल देशयात अधिकार यात। तर झीपिं ला यक्व दु। धात्थें हे झीत थ्व देश अधिकार यायेत ब्यूगु दु।’
25 अथे जुयाः इमित धा, ‘परमप्रभु परमेश्वरं थथे धयादी – छिमिसं लानापं हि नइगु, छिमिसं मूर्तित पुजा याइगु, छिमिसं मनूत स्याइगु, धात्थें हे छिमिसं थ्व देश छिमिगु खः धकाः मतिइ तयागु ला?
26 छिमिसं थःगु तरवारय् भलसा तइगु, छिमिसं घच्चाइपुगु ज्या याइगु, छिपिं सकसिनं छम्हय्सिनं मेम्हय्सिया कलाःयात स्यंकीगु। धात्थें हे छिमिसं थ्व देश छिमिगु खः धकाः मतिइ तयागु ला?’
27 “इमित धा, ‘परमप्रभु परमेश्वरं थथे धयादी – गथे जि धात्थें म्वाःम्ह खः, नाश जूगु शहरय् च्वनाच्वंपिं मनूत तरवारं सी। ख्यलय् दुपिन्त जिं गुँपशुतय्त नयेत बी। किल्लाय् व गुफाय् दुपिं महामारीं सी।
28 जिं व देशयात तहसनहस व झिजांमिजां यानाबी, अले तधंछुयाः बलयात नाश यानाबी। इस्राएलया पहाडत सुं नं वये वने मफय्क झिजांमिजां यानाबी।
29 जिं इमिसं याःगु घच्चाइपुगु ज्याया निंतिं देशयात झिजांमिजां व सुनसान यानाबीबलय् इमिसं जि हे परमप्रभु खः धकाः सी।’
30 “अय् सीमानिम्ह मनू, छंगु बारे देशय् च्वंपिं छिमि मनूत छथाय् मुनाः पःखाः व लुखाया कुनय् कुनय् दनाः छम्हय्सिनं मेम्हय्सित थथे धाइ, ‘वा, परमप्रभुपाखें वःगु खबर छु खः व न्यनेनु।’
31 इमिसं न्ह्याबलें याःथें जिमि मनूत छन्थाय् वइ अले छंगु खँ ध्यान बियाः न्यनेत छंगु न्ह्यःने च्वनी। तर इमिसं छं धाःथें याइ मखु। इमिगु म्हुतुइ मिसाह्यः खँ जक दइ, तर इमिगु नुगलं ध्यबा जक माली।
32 छ इमिगु लागि बांलाःगु सः दुम्ह वा बांलाक बाजं थायेसःम्ह मनू स्वयाः अप्वः छुं नं मखु। छं धाःगु खँ ला इमिसं न्यनी तर छं धाःथें याइ मखु।
33 “छं धाःगु फुक्क खँ जुइबलय् इमिसं छम्ह अगमवक्ता इमिगु दथुइ वःगु खः धकाः इमिसं सी।”