23
ख्वाः स्वयाः न्याय याये मते
1 “मखुगु खँ ल्हाये मते। मभिंम्ह मनूलिसे जानाः मखुगु साक्षी बी मते।
2 “मखुगु ज्या याना च्वंपिं मनूतय्गु हुलया ल्यूल्यू वने मते। साक्षी बीबलय् न्याय स्यनीकथं हुलयागु पं लिनाः साक्षी बी मते।
3 न्याय याइबलय् चीमि धकाः सुयागुं पं ली मते।
4 “थः शत्रुया द्वहं वा गधा मखु थाय् वना च्वंगु खन धाःसा छिमिसं वयात ज्वनाः वया थाय् यंका ब्यु।
5 छिमिसं थःत मतःपिं मनूतय् गधायात कुं ल्हानाच्वंगु खन धाःसा वयात अथें त्वःताःवने मते। ग्वाहालि यानाः वयात थुनाब्यु।
6 “चीमिपिं मनूतय्त न्याय बीत लिचिले मते।
7 “मखुगु खँ पाखें तापाक्क च्वँ। द्वं मदुम्ह व खःकथं जुइम्ह मनूयात स्याये मते, छाय्धाःसा द्वं याःम्हय्सित जिं गुबलें नं द्वं मयाःम्ह ठहरे याये मखु।
8 “घुस नये मते छाय्धाःसा घुसं मनूतय्त कां याना बी, अले खःगु खँयात अःखः याना बी।
9 “परदेसीतय्त क्वत्यले मते। छिपिं थःपिं नं मिश्रय् परदेसी जुया च्वने धुंकूगुलिं छिमिसं परदेसीतय्त गथे जुइयः धकाः स्यू।
शबाथ दँ व शबाथ दिं गुकथं हनेगु
लेवी २५:४-७
10 “खुदँ तक थःगु बुँइ पुसा ह्वलाः उकियागु बालि मुँ।
11 अले न्हय्दँय् दिपाः कयाः छुं नं पी मते। अन अथें बुयावःगु छिमिथाय् च्वंपिं चीमिपिं मनूतय्सं नइ। इमिसं नयाः ल्यं दुगु गुँ पशुतय्सं नइ। छिमिसं थःपिनिगु दाखया क्यब व जैतूनया ख्यःयात नं अथे हे या।
12 “खुन्हु तक थःगु ज्या या, न्हय्न्हु खुन्हु झासु लँ। थुकिं छिमि द्वहं, गधा, थःथाय् छेँय् बूपिं दासतय्सं व परदेशीतय्सं नं झासु लनेदइ।
13 “जिं धयागु फुक्क खँ बांलाक न्यँ। मेपिं द्यःतय्गु पुजा याये मते। इमिगु नां तक नं काये मते।
स्वंगू तःधंगु नखः
14 “दँय् स्वक्वः छिमिसं जिगु निंतिं नखः हनेगु या।
15 “छिमिसं सोडा मतःगु मरिया नखः हनेगु या। छिमित आज्ञा बिया थें आबीब लाया क्वःछिनातःगु इलय् न्हय्न्हु तक सोडा मतःगु मरि नयेगु या, छाय्धाःसा व हे लाय् छिपिं मिश्रं पिहां वःगु खः।
“सु नं जिगु न्ह्यःने ल्हातय् छुं मदय्क खने दः वये मते।
16 “थःगु बुँइ सःगु बालिया न्हापांगु ब्व लयाः सामाज्याया नखः हँ।
“अले दक्वसिबय् लिपा थःगु बुँइ सःगु फल खानाः ‘फल खायेगु नखः’ हँ।
17 “दँय् स्वक्वः फुक्क मिजंत परमप्रभुया न्ह्यःने खनेदः वयेमाः।
18 “जितः बलि ब्यूम्ह पशुयागु हि सोडा दुगु मरिनापं छाये मते।
“जिगु निंतिं नखःया बलि ब्यूम्ह पशुयागु दाः सुथय् तक तये मते।
19 “छिमिगु बुँइ सःगु दक्वसिबय् भिंगु न्हापांगु फल परमप्रभु थः परमेश्वरया छेँय् हजि।
“च्वलय्चिया मचायात वया मांयागु दुरुइ दय्के मते।”
स्वर्गदूतं लँपु तयार याःगु
20 परमप्रभुं धयादिल, “स्व, लँय् छिमिगु बिचाः यायेत अले जिं तयार यानागु थासय् छिमित हयेत जिं छम्ह दूत छिमि न्ह्यः न्ह्यः छ्वया बी।
21 वयागु न्ह्यःने होश याना च्वँ अले वं धाःगु खँ न्यँ। वयागु विरोधय् वने मते। छाय्धाःसा वयाके जिगु नां दुगुलिं वं छिमिगु अपराध क्षमा याइ मखु।
22 थथे छिमिसं वयागु खँ न्यन धाःसा अले जिं धाःथें यात धाःसा जि छिमि शत्रुतय् शत्रु व छिमि विरोधीतय् विरोधी जुइ।
23 जिमि दूत छिमि न्ह्यःने न्ह्यःने वनी, अले एमोरी, हित्ती, परिज्जी, कनानी, हिव्वी व यबूसीतय्गु देसय् छिमित हइ। अले जिं इमित नाश याना बी।
24 इमि द्यःतय्त भागि याये मते, इमिगु पुजा याये मते। अय्नं उपिं द्यःतय्त स्यंका ब्यु। अले इमिसं पुजा याइगु ल्वहंतय्त तछ्यानाब्यु।
25 “छिमिसं परमप्रभु थः परमेश्वरयागु जक आराधना या अले वय्कलं छिमिगु नसा त्वंसाय् आशिष बियादी। अले जिं छिमिथासं ल्वय् चीका छ्वये।
26 छिमिगु देसय् सु नं मचा क्वहां वइम्ह वा बाझः जुइ मखु। अले जिं छिमिगु आयु पूवंका बी।
27 “छिमिगु विरोध याइपिं मनूतय्त जिं जिगु भय काइपिं याना बी। छिपिं वनीगु देसयापिं मनूतय्त इतिमिति कंका बी। जिं छिमि शत्रुतय्त छिमिगु न्ह्यःनं लिना छ्वये।
28 जिं छिमिगु न्ह्यःने क्वंचाहात छ्वया बी। इमिसं हिव्वी, कनानी व हित्तीतय्त छिमिगु लँपुं याकनं हे लिना छ्वइ।
29 जिं इमित छगू हे दँय् पितिना छ्वये मखु, मखुसा देसय् झिजांमिजां दनी। अले जंगलया पशुत ल्याखय् अप्वः दया वइ।
30 छिपिं न्ह्यज्यानाः व देस थःगु अधिकारय् मकातले भचा भचा यानाः जिं इमित छिमिगु न्ह्यःनं लिना छ्वये।
31 “जिं छिमिगु सिमाना लाल समुद्रनिसें पलिश्तीतय्गु समुद्रतक, अले मरुभूमि निसें यूफ्रेटिसतक हे क्वःछिना बी। जिं व देसयापिं मनूतय्त छिमिगु ल्हातय् बी, अले छिमिसं इमित लिना छ्वइ।
32 “छिमिसं इपिं नापं अले इमि द्यःत नापं स्वापु तये मते।
33 छिमिगु देसय् इमित च्वने बी मते, मखुसा छिमित जिगु विरोधय् पाप याके बी। छिमिसं इमि द्यःतय्गु पुजा यात धाःसा छिपिं धात्थे हे इमिगु जालय् तक्यनी।”