40
नापलायेगु पालयागु पलिस्था
1 अले परमप्रभुं मोशायात धयादिल,
2 “न्हापांगु लाया न्हापांगु दिं खुन्हु पवित्र पाल व नापलायेगु पाल ग्वः।
3 उकी बाचाया सनू तयाः उकिया न्ह्यःने पर्दा यख्खाना ब्यु।
4 तेबिल पवित्र पालय् हयाः उकि द्यःने ज्वलं ब्वया ब्यु। अले त्वाःदेवा नं हयाः उकीया पाल्चा च्याकेत मिलय् या।
5 “बाचाया सनूया न्ह्यःने दुगु पर्दाया पिने लुँयागु गुंगू थनेगु वेदी तया ब्यु, अले पवित्र पालया लुखाय् पर्दा कयख्खाना ब्यु।
6 “नापलायेगु पालया ध्वाखाया दुनेपाखे होमबलिया वेदी तया ब्यु।
7 अनं लिपा नापलायेगु पाल व वेदीया दथुइ बाता तयाः उकी लः जाय्का ब्यु।
8 अले छचाःखेरं चुकया ख्वातुगु कापः व थां थनाब्यु। ध्वाखाय् नं पर्दा यख्खाना ब्यु।
9 “अभिषेक यायेगु चिकं हयाः नापलायेगु पाल व उकी दुगु फुक्क ज्वलंयात अभिषेक या। अले उकियात व फुक्क ज्वलं नापं पलिस्था या, अले व पवित्र जुइ।
10 होमबलिया वेदी व उकिया फुक्क ज्वलं नापं अभिषेक यानाः उकियात पलिस्था या, अले व तच्वकं पवित्र जुइ।
11 बाता व उकिया लिधंसा नं अभिषेक यानाः पलिस्था या।
12 “अनंलि हारुन व वया काय्पिन्त नापलायेगु पालया ध्वाखा दुने हयाः इमित म्वःल्हुकि।
13 अले हारूनयात पवित्र वसः फीकाः वयात अभिषेक या। अले पुजाहारी जुयाः सेवा यायेत वयात पलिस्था या।
14 वया काय्पिन्त हयाः इमित जामालं फीका ब्यु,
15 अले छं इमि बौयात गथे यानाः अभिषेक यानागु खः अथे हे यानाः इमित नं अभिषेक या। इमिगु अभिषेक धाःसा छगू सदांया पुजाहारीया ज्याकथं लिपाथ्यंकया पुस्ता तक जुइ।”
16 मोशां फुक्क ज्या परमप्रभुं वयात उजं बियादीगु कथं हे यात।
17 इस्राएलीतय्सं मिश्र देसं त्वःतूगु दच्छि लिपा निगूगु दँया न्हापांगु लाया न्हापांगु दिं खुन्हु नापलायेगु पाल धस्वाकल।
18 नापलायेगु पाल थुकथं धस्वाकल - वं लिधंसात तयेमाःगु थासय् तल, सिँपौ धंस्वाका तल, खगः दुछ्वत अले थांत धंस्वाका तल।
19 अनंलि परमप्रभुं वयात उजं बियादीगु कथं इमिसं पवित्र पालया द्यःने नितँ इलां प्यनाः उकी द्यःने मेगु नितँ इलां तया बिल।
20 अले वं ल्वहं पौ हयाः सनू दुने तयाः न्वःत सनूइ तयाबिल, अले कृपा आसन सनूया द्यःने तल।
21 वं बाचाया सनूयात महा पवित्र थासय् हल। परमप्रभुं वयात उजं बियादीगु थें पर्दा यख्खाना बिल। थुकथं बाचाया सनू खने मदय्क तयाबिल।
22 वं छाये हःगु मरि तयातःगु तेबिल पर्दाया पिने पवित्र पालया उत्तरपाखे तल।
23 परमप्रभुं वयात उजं बियादीगु थें मरियात उकिया च्वय् परमप्रभुया न्ह्यःने तयाबिल।
24 वं पवित्र पालय् दच्छिनपाखे तेबिलया अःखः त्वाःदेवा तयाबिल।
25 अले परमप्रभुं वयात उजं बियादीगु थें परमप्रभुया न्ह्यःने पाल्चा च्याकल।
26 मोशां पवित्र पालय् पर्दाया न्ह्यःने लुँयागु वेदी तल।
27 वं परमप्रभुं उजं बियादीगु थें उकी नस्वाःगु गुंगू च्याकल।
28 अले वं पवित्र पालया लुखाय् पर्दा यख्खाना बिल।
29 अले वं परमप्रभुं उजं बियादीगु थें नापलायेगु पालया ध्वाखाया दुने होमबलिया वेदी तयाः उकी होमबलि व अन्नबलि देछाल।
30 वं पवित्र पाल व वेदीया दथुइ बातायात तयाः उकी लः तल।
31 अले मोशा, हारुन व वया काय्पिन्सं उकी थःथःगु ल्हाः तुति सिलेगु यात।
32 पवित्र पालय् दुहां वनीबलय् वा वेदीया न्ह्यःने वनीबलय् इमिसं परमप्रभुं मोशायात उजं बियादीगु थें थःथःगु ल्हाः तुति सिलेगु यात।
33 दकलय् लिपा वं पवित्र पाल व वेदीया प्यखेरं घेरय् यानाः चुक दय्कल। अले चुकया ध्वाखाय् पर्दा यख्खाना बिल। थुकथं मोशां फुक्कं ज्या सिधय्कल।
परमप्रभुया महिमा
34 अले नापलायेगु पालयात सुपाँचं त्वपुल, व परमप्रभुयागु महिमां पवित्र पाल जाल।
35 मोशा पवित्र पालय् दुहां वने मफुत छाय्धाःसा व सुपाँय् उकी च्वना हे च्वन अले परमप्रभुयागु महिमां पवित्र पाल जाया च्वन।
36 व सुपाँय् पवित्र पालं चिला वनीबलय् इस्राएलीत थःगु लँपुइ न्ह्यःज्याइ।
37 अय्नं ग्वःन्हु तक सुपाँय् च्वय् थहां वनीमखु इपिं अन हे च्वना च्वनी।
38 इस्राएलीतय्गु फुक्क यात्रा ज्वःछिं दिनय् परमप्रभुया सुपाँय् पवित्र पालया च्वय् खनेदइ, चान्हय् धाःसा उकी इमिसं मि खनी।