15
परमेश्वरं अब्रामलिसे बाचा चिनादीगु
(१५:१-२१)
1 थथे जूगुयां छुं ई लिपा परमप्रभुं अब्रामयात दर्शन बियाः थथे धयादिल --
“ग्याये मते अब्राम।
जिं छन्त बचय् याये।
जिं छन्त तःधंगु सिरपाः बी।”
2 अब्रामं लिसः बिल-- “हे परमप्रभु परमेश्वर, मचा हे मदय्क छिं जितः छु तःधंगु सिरपाः बियादी? जि सी धुंकाः जिगु दहं दमस्कसयाम्ह एलीएजरं काइ।
3 छिं जितः छम्ह हे मचा बियामदी। अले जिम्ह थ्व दासं जिगु दहं काइ।”
4 अले परमप्रभुं वयात धयादिल-- “एलीएजर छंगु दहं काइम्ह मनू जुइ मखु। छं थःहे काय् दइ। अले छंगु फुक्क हक वं हे काइ।”
5 परमप्रभुं अब्रामयात पिने हयाः धयादिल-- “आकाशय् स्व, अले फुसा नगुत ल्याः खा।” वय्कलं हानं धयादिल-- “छं सन्तान नं थथे हे दइ।”
6 अले अब्रामं परमप्रभुयात विश्वास यात। परमप्रभुं वयात धार्मिक मनूया ल्याः खानातयादिल।
7 वय्कलं वयात धयादिल-- “छन्त थ्व थाय् बीत कल्दीतय्गु ऊरं थन हयाम्ह परमप्रभु जि हे खः।”
8 अब्रामं धाल-- “परमप्रभु परमेश्वर, थ्व थाय् जिगु जुइ धकाः जिं गय् यानाः सीकेगु?”
9 परमप्रभुं धयादिल-- “जितः स्वदँ दुम्ह सा छम्ह, स्वदँ दुम्ह च्वलय् छम्ह, स्वदँ दुम्ह छम्ह फै, छम्ह सुकुभत्तु व छम्ह मचाम्ह बखुं हति।”
10 अब्रामं फुक्कं हल। अले वं इमित बाम्हय् लाक्क पालाः निकू निकू यानाः जवय् खवय् लाकाः तयाबिल। वं सुकुभत्तु व बखुंयात धाःसा निकू मयाः।
11 गिद्धत स्यानातःपिं पशुपंछिया ला नयेत कुहां वःबलय् अब्रामं इमित ख्यानाछ्वत।
12 निभाः बीथे च्वंकाः अब्रामयात छुं हे मचाय्क न्ह्यः वय्काबिल। अले वयात तसकं ख्वातुगु व ग्यानापुगु खिउं त्वपुल।
13 अले परमप्रभुं अब्रामयात धयादिल-- “थ्व खँ थुइकाति, छिमि सन्तान कर्पिनिगु देशय् च्वंवनेमाली, अले इपिं अन प्यसः दँ तक दासदासी जुयाः क्वत्यय्काः च्वनेमाली।
14 जिं इमित दासदासी याःपिं जातियात सजाँय बी। अले इपिं अनं यक्व धनसम्पत्ति ज्वनाः पिहां वइ।
15 छ जक छिमि तापाःबाज्यापिन्थाय् आनन्दं च्वंवनि। गाक्क बुह्रा जुइ धुंकाः छन्त थुनेयनी।
16 प्यंगू पुस्ता लिपा छिमि सन्तान थन लिहां वइ। उबलय् तक एमोरीतय्गु पाप जाइ मखुनि।”
17 निभाः बिनाः खिउँसे च्वन। अबलय् अब्रामं निब्व थलाः तयातःगु लाया दथुं कुँ पिहां वयाच्वंगु छगः मकः व च्यानाच्वंगु मिप्वाः छप्वाः वंगु खन।
18 अबलय् हे परमप्रभुं अब्रामलिसे थुकथं बाचा चिनादिल --
“जिं छिमि सन्तानयात मिश्र
देशयागु खुसिं निसें तःधंगु
खुसि यूफ्रेटिसतकयागु थ्व
देशत बियागु दु --
19 केनी, कनज्जी, कदमोनी,
20 हित्ती, परिज्जी, रपाई,
21 एमोरी, कनानी, गिर्गाशी व यबूसीतय्गु देश।”