25
अब्राहामया कतूरा पाखें दुपिं सन्तान
(२५:१-६)
1 अब्राहामं मेम्ह छम्ह मिसालिसे ब्याहा यात। वयागु नां कतूरा खः।
2 वयापाखें जिम्रान, योक्षान, मदान, मिद्यान, यिशबाक व शूह बुल।
3 योक्षान शेबा व ददानया अबु खः। ददानया सन्तान अश्शूरी, लतूशी व लऊम्मीत खः।
4 मिद्यानया काय्पिं एपा, एपेर, हानोक, अबीदा व एल्दा खः। थुपिं फुक्कं कतूराया सन्तान खः।
5 अब्राहामं थःके दुगु फुक्कं इसहाकयात त्वःताथकल।
6 थः मसिवं हे अब्राहामं मेपिं कलाःपिनि पाखें दुपिं काय्पिन्त उपहार बियाः थः काय् इसहाकया पाखें ब्यागः यानाः पुर्बपाखे छ्वयाब्यूगु खः।
अब्राहाम सीगु
(२५:७-११)
7 अब्राहाम मुक्कं १७५ दँ तक म्वात।
8 व ताः आयु म्वानाः गाक्कं बुह्रा जुयाः सित। अले थः पुर्खापिंलिसे मुंवन।
9 वया काय्पिं इसहाक व इश्माएलं वयात सोहोर धाःम्ह हित्तीया काय् एप्रोनयागु बुँइ च्वंगु मम्रेया लिक्कसं च्वंगु मक्पेलाया गुफाय् थुनाबिल।
10 थ्व बुँ अब्राहामं हित्तीतय्के न्यानाकाःगु खः। अब्राहाम व वया कलाः सारा निम्हय्सितं थन हे थुंगु खः।
11 अब्राहाम सीधुंकाः परमेश्वरं वया काय् इसहाकयात आशिष बियादिल। उबलय् इसहाक बेअर-लहै-रोइ लिक्कसं च्वनाच्वंगु खः।
इश्माएलया सन्तान
(२५:१२-१८)
12 साराया मिश्र देशयाम्ह दासी हागारया पाखें दुम्ह अब्राहामया काय् इश्माएलया सन्तानया धलः थुकथं दु --
13 न्हापां बूकथं इमिगु नां थथे दु-- नबायोत, केदार, अदबेल, मिब्साम,
14 मिश्मा, दुमा, मस्सा,
15 हदद, तेमा, यतूर, नापीश व केदमा।
16 इश्माएलया काय्पिं थुपिं हे खः। थुपिं हे झिंनिगू कुलया नायः जुल। इमिगु हे नामं गांया नां च्वन।
17 इश्माएल १३७ दँ दुबलय् मन्त।
18 इश्माएलया काय्पिं मिश्रया पुर्ब पाखे अशूर वनेगु लँय्-- हबीलां निसें शूर तक च्वनाच्वंगु खः। इपिं अब्राहामया मेपिं सन्तानलिसे मिले मजुसे ब्यागलं च्वनाच्वंगु खः।
इसहाक व वया परिवार
(२५:१९–२८:९)
19 अब्राहामया काय् इसहाकया खँ थथे दु-- अब्रहमया काय् इसहाक बुल।
20 इसहाकं ४० दँ दुबलय् अरामी बतूएलया म्ह्याय् व लाबानया केहें रिबेकालिसे ब्याहा यात। इपिं पद्दन-आरामयापिं खः।
21 रिबेका थारिम्ह मिसा जूगुलिं इसहाकं परमप्रभुयात वया पाखें मचा दय्काबीत प्रार्थना यात। परमप्रभुं वयागु प्रार्थना न्यनादिल। अले रिबेकाया प्वाथय् दत।
22 रिबेकाया प्वाथय् निम्ह मचा दुगु जुयाच्वन। अले इपिं प्वाथय् दुने हे थवंथवय् ल्वायेगु यानाच्वन। उकिं वं थथे मतिइ तल-- “जितः थथे छाय् जुल?” अले वं परमप्रभुयाके न्यन।
23 परमप्रभुं वयात लिसः बियादिल --
“छंगु प्वाथय् निगू जाति दु।
इपिं बुसांनिसें हे ब्यागः जुयाः बुइ।
चीधीम्ह तःधीम्ह स्वयाः बल्लाइ।
तःधीम्हय्स्यां चीधीम्हय्सिगु सेवा याइ।”
24 मचा बुइगु ई जुल। रिबेकाया प्वाथय् धाथें हे निम्ह मचा दयाच्वन।
25 न्हापांम्ह मचा ह्याउँसे च्वंम्ह बुल। वयागु म्ह छम्हं सँया सं भुनातःगु दु। उकिं वयागु नां एसाव तल।
26 वयां लिपा बूम्ह मचा थः दाजु एसावयागु ग्वालि ज्वनाः बुल। उकिं इमिसं वयागु नां याकूब तल। इपिं बूबलय् इसहाक ६० दँ दयेधुंकल।
27 इपिं तःधि जुसेंलिं एसाव छम्ह बांलाःम्ह शिकारी व पिने जुयाः जुइम्ह जुल। याकूब धाःसा सोझाम्ह व छेँज्या जक याइम्ह जुल।
28 एसावं शिकार यानाः ला हयाबीगुलिं इसहाकं वयात अप्वः माया याः। रिबेकां धाःसा याकूबयात अप्वः माया याः।
एसावं थःगु अधिकार लःल्हानाब्यूगु
29 छन्हु याकूबं मुसूति दाय्काच्वंबलय् एसाव नये पित्याकाः पिनें लिहांवल।
30 वं धाल-- “जि नयेपित्यानाः सीन, उकिं आम ह्याउँगु मुसूति भचा ति।” (अय्जूगुलिं वयात एदोम नं धायेगु याः)।
31 याकूबं धाल-- “न्हापां जितः छिम्ह तःधिम्ह काय्या अधिकार निं बियादिसँ।”
32 एसावं धाल-- “जि नये पित्यानाः सीन, उकिं जितः व अधिकार छु यायेत?”
33 याकूबं धाल-- “दक्वसिबय् न्हापां पाः निं पाःफयादिसँ।” अले वं पा फल। थुकथं वं थःम्ह तःधिम्ह काय्या अधिकार मियाबिल।
34 याकूबं एसावयात मरि व मुसूति बिल। नयेनी यानाः एसाव थःगु लँ लिना वन।
थुकथं एसाव थःम्ह तःधिम्ह काय्या अधिकारया च्यूताः मतसे वन।