33
याकूब व एसाव नापलाःगु
1 याकूबं एसाव प्यसःम्ह मनूलिसे वयाच्वंगु खन। अले वं थः मस्तय्त लेआ, राहेल व निम्ह दासीतय् जिम्मा बियाः इमित ब्यागः ब्यागः छ्वत।
2 दक्वसिबय् न्ह्यःने निम्ह दासी व इमि मस्त छ्वत। अनंलि लेआ व वया मस्त छ्वत। राहेल व योसेफयात दक्वसिबय् लिपा छ्वत।
3 याकूब थः धाःसा इपिं स्वयाः न्ह्यःने वन। व थः दाजुया न्ह्यःने मथ्यंतले न्हय्कः तक बँय् भ्वसुलाः वन।
4 एसावं ब्वाँय् वयाः वयात घय्पुयाः चुप्पा नल। अले इपिं निम्हं ख्वल।
5 एसावं मिस्त व मस्त खनाः न्यन-- “छलिसे वःपिं थुपिं सु खः?”
याकूबं धाल-- “परमेश्वरं छिम्ह दासयात दया माया यानाः ब्यूगु जिमि मस्त खः।”
6 अले निम्ह दासी व इमि मस्तय्सं न्ह्यःने वयाः एसावयात भागि यात।
7 अनंलि लेआ व वया मस्तय्सं वयाः भागि यात। दक्वसिबय् लिपा योसेफ व राहेलं वयाः भागि यात।
8 एसावं याकूबयाके न्यन-- “जिं लँय् नापलानागु बथां छु खः?”
याकूबं धाल-- “छिं जितः दुनुगलं लसकुस यानादीमा धकाः खः।”
9 एसावं धाल-- “जिगु थःगु हे यक्व दु, जि किजा! थुपिं फुक्क छं हे ति।”
10 याकूबं धाल-- “मखु! छिं जितः माया यानादियागु खःसा थ्व उपहार लःल्हानाकयादिसँ। छिं जितः दुनुगलंनिसें लसकुस यानादीबलय् जितः ला छितः नापलाःगु परमेश्वरयात नापलानागु थें हे जुल।
11 आः जिं छिगु लागि धकाः हयागु थ्व उपहारत कयादिसँ। परमेश्वरं दया यानाः जितः माक्व बियादीगु दु।” थुकथं याकूबं एसावं मकातले कर यानाच्वन।
12 अले एसावं धाल-- “आः वनाछ्वये नु, जि नं छनापं वने।”
13 याकूबं धाल-- “छिं सि हे स्यू-- थ्व मस्त क्यातुसे हे च्वं नि। अले हानं जि थ्व दुरु त्वंपिं वस्तुया नं बिचाः याये माः। थुमित न्हिच्छि न्यासिकल धाःसा थुपिं सी।
14 उकिं छि न्हापा झासँ। जि बुलुहुं थ्व मस्त व वस्तुलिसे वयाः छितः सेइरय् नापलाये।”
15 एसावं धाल-- “अय्सा जिं जिमि मनूतय्त छलिसे त्वःताथके।”
याकूबं धाल-- “अथे छाय् याये माल? जितः छिगु माया जक दःसा गाः।”
16 उकिं एसाव उखुन्हु हे सेइर लिहां वन।
17 याकूब धाःसा सुक्कोतपाखे वन। वं अन थःगु लागि छेँ छखा दन, अले वस्तुया लागि बल्चात दय्कल। उकिं व थाय्यागु नां सुक्कोत धाल।
18 पद्दन-आरामं वयाः याकूब कनानया शकेम धाःगु शहरया लिक्क याउँक हे थ्यन। वं अन शहरं पिने थःगु पाल ग्वल।
19 वं व थाय् शकेमया बौ हमोरया काय्पिन्के सच्छिकू वहः बियाः न्यानाकाल।
20 वं अन छगू वेदी दय्कल। अले उकियात एल-एलोह-इस्राएल धकाः नां तल।